ʻOku Malava ke Maluʻi Kitaua ʻe Sīsū

ʻI HE tupu hake ʻa Sīsū ʻo lahi peá ne ʻilo ʻa e founga naʻe maluʻi ai ia ʻi heʻene kei siʻí, ʻokú ke fakakaukau naʻá ne lotu kia Sihova ʻo fakamālō kiate ia?— Ko e hā ʻokú ke fakakaukau naʻe tala ange nai ki mui ʻe Sīsū kia Mele mo Siosefa ʻi heʻene ʻiloʻi naʻá na fakahaofi ʻa ʻene moʻuí ʻaki hono ʻave ia ki ʻIsipité?—

Ko e moʻoni, ʻoku ʻikai ke kei hoko ʻa Sīsū ko ha kiʻi pēpē. ʻOku ʻikai te ne kei nofo ʻi he māmaní ʻo hangē ko ia naʻá ne ʻi ai ki muʻá. Ka kuó ke fakatokangaʻi he taimí ni ʻoku hā ngali fakakaukau ʻa e kakai ʻe niʻihi kia Sīsū ko ha kiʻi pēpē pē ʻi he ʻaiʻanga kai ʻo e manú?— ʻOku moʻoni eni ʻi he taimi Kilisimasí ʻa ia ʻoku mātā ai ʻi he ngaahi feituʻu lahi ʻa e ngaahi fakatātā ʻo Sīsū ko ha kiʻi pēpē.

Neongo ʻoku ʻikai ke kei moʻui ʻa Sīsū ʻi he māmaní, ʻokú ke tui ʻokú ne moʻui?— ʻIo, naʻe fokotuʻu hake ia mei he maté, pea ʻokú ne hoko he taimí ni ko ha Tuʻi mālohi ʻi hēvani. Ko e hā ʻokú ke fakakaukau ʻoku malava ke ne fai ke maluʻi ʻa e faʻahinga ʻoku nau tauhi iá?— Sai, ʻi he taimi naʻe ʻi māmani ai ʻa Sīsuú, naʻá ne fakahaaʻi ʻa e founga ʻe malava ke ne maluʻi ai ʻa e faʻahinga ʻoku ʻofa kiate iá. Ta sio angé ki he founga naʻá ne fai ai eni ʻi he ʻaho ʻe taha naʻá ne ʻi ha vaka ai mo ʻene kau ākongá.

Ko e efiafí ia. Naʻe faiako ʻa Sīsū ʻi he ʻaho kotoa ko iá ʻi he veʻe Tahi Kālelí, ʻa ia ko ha anovai lahi ʻoku feʻunga nai hono lōloá mo e kilomita ʻe 20 pea ko hono fālahí ko e kilomita ʻe 12. ʻOkú ne pehē leva eni ki heʻene kau ākongá: ‘Tau ō ki he kauvai ʻe tahá.’ Ko ia, ʻoku nau heka ki ha vaka ʻo kamata folau ki he tafaʻaki vai ʻe tahá. ʻOku helaʻia ʻaupito ʻa Sīsū, ko ia ʻokú ne ʻalu ki he muiʻi vaká ʻo ne tokoto hifo ʻi ha pilo. ʻOku ʻikai fuoloa kuó ne māʻumohe.

ʻOku ʻāʻā pē ʻa e kau ākongá ke tauhi maʻu ʻa e vaká ʻi hono halangá. ʻOku lelei ʻa e meʻa kotoa ʻi ha kiʻi taimi, ka neongo ia ʻoku haʻu ha matangi mālohi. ʻOku ʻalu ke mālohi ange ʻa ʻene puhí, pea ʻoku fakaʻau ke toe lalahi ange mo e peaú. ʻOku kamata ke haʻu ʻa e peaú ki he loto vaká, pea ʻoku kamata foki ke fonu ʻa e vaká ʻi he vaí.

ʻOku ilifia ʻa e kau ākongá naʻa nau ngoto. Ka ʻoku ʻikai ke ilifia ʻa Sīsū ia. ʻOkú ne kei mohe pē ʻi he muiʻi vaká. Faifai atu pē, ʻoku fafangu ia ʻe he kau ākongá, ʻo nau pehē: ‘Faiako, Faiako, fakahaofi kitautolu; ko eni te tau mate ʻi he matangí ni.’ ʻI he meʻa ko iá, ʻoku tuʻu hake ʻa Sīsū ʻo ne lea ki he matangí mo e ngaahi peaú. “Longoā, ʻoua ʻe momoʻi ngu,” ko ʻene leá ia.

ʻI he taimi pē ko iá ʻoku tuʻu ʻa e puhi ʻa e matangí, pea ʻoku nonga ʻa e anovaí. ʻOku ʻohovale ʻa e kau ākongá. Kuo teʻeki ʻaupito te nau mamata ʻi ha meʻa pehē ki muʻa. ʻOku kamata ke nau feleaʻaki: “Ko hai nai ʻeni! he oku ne tuʻutuʻuni meʻa ki he matangi mo e tahi, pea nau fakaongo ki ai!”—Luke 8:​22-25; Maake 4:​35-41.

ʻOkú ke ʻilo ko hai ʻa Sīsū?— ʻOkú ke ʻilo pe ko e maʻu mei fē hono fuʻu mālohí?— Naʻe ʻikai totonu ke ilifia ʻa e kau ākongá ʻi he ʻi ai ʻa Sīsū fakataha mo kinautolú, he naʻe ʻikai ko ha tangata anga-maheni pē ʻa Sīsū. Naʻe malava ke ne fai ʻa e ngaahi meʻa fakaofo naʻe ʻikai lava ia ʻe ha toe taha kehe. Te u toe talanoa atu ha meʻa ʻe taha naʻá ne fai ʻi he taimi ʻe taha ʻi ha tahi hou.

Ko ha taimi ia ki mui, ʻi ha ʻaho kehe ia. ʻI heʻene hoko ʻo efiafí, ʻoku tala ange ʻe Sīsū ki heʻene kau ākongá ke nau heka ʻi ha vaka ʻo muʻomuʻa atu ki he tafaʻaki tahi ʻe tahá. ʻOku ʻalu hake tokotaha leva ʻa Sīsū ki he moʻungá. Ko ha feituʻu lōngonoa ia ʻa ia ʻe lava ke ne lotu ai ki heʻene Tamaí, ʻa Sihova ko e ʻOtuá.

ʻOku heka ʻa e kau ākongá ki he vaká ʻo kamata ke nau folau ki he tafaʻaki ʻe tahá. Ka ʻoku ʻikai fuoloa, ʻoku kamata ke angi mai ha matangi. ʻOku mālohi ange ʻa ʻene puhí. Pea ko e poʻulí eni. ʻOku tuku hifo ʻe he kau tangatá ʻa e laá ʻo kamata ke nau ʻaʻalo. Ka ʻoku ʻikai ke fuʻu mamaʻo ʻenau ʻalú koeʻuhí he ʻoku puhi atu ʻa e matangi mālohí ia kia kinautolu. ʻOku sēlue ʻa e vaká ʻi he ngaahi fuʻu peau lalahí, pea ʻoku haʻu ʻa e vaí ki loto. ʻOku feinga mālohi ʻa e kau tangatá ke nau aʻu ki ʻuta, ka ʻoku ʻikai te nau lava.

ʻOku kei nofo tokotaha pē ʻa Sīsū ʻi he moʻungá. Kuó ne ʻi ai ʻo fuoloa. Ka ʻoku lava ke ne sio he taimí ni ʻoku ʻi ha tuʻunga fakatuʻutāmaki ʻa ʻene kau ākongá ʻi he ngaahi peau lalahí. Ko ia, ʻokú ne ʻalu hifo mei he moʻungá ki he matātahí. ʻOku loto ʻa Sīsū ke tokoni ki heʻene kau ākongá, ko ia ʻokú ne kamata luelue atu kia kinautolu ʻi he fukahi tahi hoú!

Ko e hā ʻa e meʻa ʻe hokó kapau te ke feinga ke lue ʻi he vaí?— Te ke ngoto, pea te ke melemo nai. Ka ʻoku kehe ʻa Sīsū ia. ʻOkú ne maʻu ʻa e mālohi makehe. Ko e lue mamaʻo ʻa Sīsū ke aʻu ai ki he vaká. Ko ia, ko ʻene meimei ʻahó nai ia ʻoku sio atu ai ʻa e kau ākongá kia Sīsū ʻokú ne haʻu kia kinautolu ʻi he fukahi vaí. Ka ʻoku ʻikai ke nau tui ki he meʻa ʻoku nau sio ki aí. ʻOku nau manavahē ʻaupito, pea ʻoku nau kalanga ʻi heʻenau ilifiá. ʻOku lea atu leva ʻa Sīsū kia kinautolu: “Fiemalie pe: ko au pe: ʻoua ʻe manavahe.”

ʻI he heka hake pē ʻa Sīsū ki he vaká, ʻoku tuʻu ʻa e matangí. ʻOku toe ʻohovale ai ʻa e kau ākongá. ʻOku nau tō ki lalo ʻi muʻa ʻia Sīsū ʻo nau pehē: “Ta ko e ʻAlo ʻo e ʻOtua koe.”—Mātiu 14:​22-33; Sione 6:​16-21.

ʻIkai naʻe mei lelei ke moʻui ʻi he taimi ko iá pea sio ki hono fai ʻe Sīsū ʻa e ngaahi meʻa peheé?— ʻOkú ke ʻilo ʻa e ʻuhinga naʻe fai ai ʻe Sīsū ʻa e ngaahi meʻa fakaemana ko iá?— Naʻá ne fai ʻa e ngaahi meʻa ko iá koeʻuhí he naʻá ne ʻofa ʻi heʻene kau ākongá pea naʻá ne loto ke tokoniʻi kinautolu. Ka naʻá ne toe fai foki ʻa e ngaahi meʻa ko iá ke fakahaaʻi ai ʻa e fuʻu mālohi naʻá ne maʻu pea te ne ngāueʻaki ʻi he kahaʻú ʻi he tuʻunga ko e Pule ʻo e Puleʻanga ʻo e ʻOtuá.

Naʻa mo e ʻahó ni, ʻoku faʻa ngāueʻaki ʻe Sīsū ʻa hono mālohí ke maluʻi ʻa ʻene kau muimuí mei he ngaahi feinga ʻa Sētane ke taʻofi kinautolu mei hono tala ki he niʻihi kehé ʻa e Puleʻanga ʻo e ʻOtuá. Ka ʻoku ʻikai ke ngāueʻaki ʻe Sīsū ʻa hono mālohí ke maluʻi ʻa ʻene kau ākongá mei he hoko ʻo puké pe ke fakamoʻui kinautolu ʻi he taimi ʻoku nau puke aí. Naʻa mo e kotoa ʻo e kau ʻapositolo ʻa Sīsuú naʻe aʻu ʻo nau mate. Ko e tokoua ʻo Sione ko Sēmisí naʻe tāmateʻi, pea ko Sione tonu naʻe tuku pilīsone.—Ngāue 12:2; Fakahā 1:⁠9.

ʻOku tatau pē ʻi he ʻahó ni. Pe ʻoku tauhi ʻe he kakaí ʻa Sihova pe ʻikai, ʻoku lava ke nau hoko kotoa ʻo puke mo mate. Ka ʻoku vavé ni ke kehe ʻa e ngaahi meʻá lolotonga ʻa e pule ʻa Sīsū ko e Tuʻi ʻo e puleʻanga ʻo e ʻOtuá. ʻE ʻikai ʻaupito ha taha ʻi he taimi ko iá ʻe hoko ʻo ilifia, koeʻuhí ʻe ngāueʻaki ʻe Sīsū ʻa hono mālohí ke ʻaonga ki he tokotaha kotoa ʻoku talangofua kiate iá.—Aisea 9:​6, 7 (Ai 9:​5, 6, PM).