Naʻe Tūkia ʻi ha Motu

SIO! ʻoku faingataʻaʻia ʻa e vaká! ʻOku movete kongokonga! ʻOkú ke sio ki he kakaí kuo nau ʻosi hopo ki tahi? Ko e niʻihi kuo nau ʻosi aʻu ki he matātahí. Ko Paula ʻena? Tau ako ke ʻilo pe ko e hā naʻe hoko ki aí.

Manatuʻi, naʻe nofo pōpula ʻa Paula ʻi he taʻu ʻe ua ʻi Sesalia. Pea naʻe fakaheka ia mo ha kau pōpula ʻe niʻihi ki ha vaka, pea nau kamata ʻenau folau ki Loma. ʻI heʻenau ʻalu atu ofi ki he motu ko Kelití, naʻe maʻu ai kinautolu ʻe ha afā lahi ʻaupito. Naʻe fuʻu mālohi ʻa e matangí ʻo ʻikai malava ai ʻe he kau tangatá ke fakaʻuli ʻa e vaká. Pea naʻe ʻikai ke lava ke nau sio ki he laʻaá lolotonga ʻa e ʻahó pe ko e ngaahi fetuʻú ʻi he taimi poʻulí. Faifai atu pē, ʻi he hili ha ngaahi ʻaho lahi, naʻe ʻikai ke toe ʻi ai ha ʻamanaki ʻa e faʻahinga ʻi he vaká ki ha toe hao.

Pea naʻe tuʻu hake ʻa Paula mo ne pehē: ‘ʻE ʻikai mate ha taha ʻiate kimoutolu; ko e vaká pē ʻe molé. He naʻe haʻu kiate au ʻanepō ha ʻāngelo ʻa e ʻOtuá mo ne pehē: “ʻE Paula, ʻoua te ke ilifia! Kuo pau ke ke tuʻu ʻi he ʻao ʻo e pule Loma ko Sisá. Pea ʻe fakahaofi ʻe he ʻOtuá ʻa kinautolu kotoa ʻoku folau mo koé.”’

ʻI he tuʻuapō nai ʻo e ʻaho ia hono 14 talu mei he kamata ʻa e afaá, naʻe fakatokangaʻi ʻe he kau kauvaká ʻoku fakaʻau ke mamaha ange ʻa e tahí! Pea naʻa nau lī honau taulá koeʻuhi ko e ilifia ki haʻanau tūkia ʻi ha ngaahi maka ʻi he kaupoʻulí. ʻI he pongipongi hono hokó naʻa nau sio ki ha fanga. Naʻa nau fakakaukau ke feinga ke fakafolau atu ʻa e vaka ki he matātahí.

ʻI heʻenau ofi atu ki he matātahí, naʻe tūkia ai ʻa e vaká ʻi ha fokotuʻunga ʻoneʻone ʻo tuʻu ai. Pea naʻe kamata ke haveʻi ia ʻe he ngaahi peaú, pea kamata ke kongokonga ʻa e vaká. Naʻe pehē ʻe he ʻofisa pule fakakautaú: ‘Ko kimoutolu hono kotoa ʻoku poto he kakaú mou ʻuluaki hopo ki tahi ʻo kakau ki ʻuta. Ko e toenga ʻo kimoutolú ke mou hopo ʻo hoko atu kiate kinautolu, pea piki ki ha ngaahi kongokonga mei he vaká.’ Pea ko e meʻa ia naʻa nau faí. ʻI he founga ko ʻení naʻe hao ki ʻuta ʻa e kotoa ʻo e toko 276 naʻe ʻi he vaká, ʻo hangē tofu pē ko ia naʻe talaʻofa ʻe he ʻāngeló.

Naʻe ui ʻa e motú ko Melita. Naʻe fuʻu anga-ʻofa ʻa e kakaí, pea naʻa nau tokangaʻi ʻa e faʻahinga mei he vaká. ʻI he lelei ange ʻa e ʻeá, naʻe fakaheka ʻa Paula ki ha vaka ʻe taha ʻo ʻave ai ki Loma.