Ko e Founga Faiako ʻa Sīsuú

ʻI HE ʻaho ʻe taha naʻe tala ange ai ʻe Sīsū ki ha tangata ʻoku totonu ke ne ʻofa ki hono kaungāʻapí. Naʻe ʻeke ʻe he tangata kia Sīsū: ‘Ko hai hoku kaungāʻapí?’ Naʻe ʻilo ʻe Sīsū ʻa e fakakaukau ʻa e tangata ko ʻení. Naʻe fakakaukau ʻa e tangatá ko e kakai pē ʻo hono matakalí mo e lotu ʻokú ne kau ki aí ko hono ngaahi kaungāʻapí pē ia. Ko ia tau sio ange pe ko e hā naʻe tala ange ʻe Sīsū kiate iá.

ʻI he taimi ʻe niʻihi naʻe faiako ʻa Sīsū ʻaki haʻane fai ha talanoa. Ko e meʻa ia naʻá ne fai ʻi he taimi ko ení. Naʻá ne fai ha talanoa ʻo kau ki ha Siu mo ha Samēlia. Kuo tau ʻosi ako ʻo ʻilo naʻe ʻikai ke saiʻia ʻa e tokolahi taha ʻo e kau Siú ʻi he kau Samēliá. Sai, ko e talanoa ʻeni ʻa Sīsuú:

ʻI he ʻaho ʻe taha naʻe ʻi ai ha tangata Siu naʻe ʻalu hifo ʻi he hala ʻi he moʻungá ki Sielikō. Ka naʻe ʻohofi ia ʻe ha kau kaihaʻa. Naʻa nau toʻo ʻene paʻangá mo taaʻi ia ʻo ne meimei mate.

Ki mui mai ai, naʻe haʻu ha taulaʻeiki Siu ʻi he halá. Naʻá ne sio ki he tangata kuo ʻosi hono taaʻí. ʻOkú ke fakakaukau, ko e hā ʻa e meʻa naʻá ne faí? Naʻá ne ʻalu pē ia ki he tafaʻaki ʻe taha ʻo e halá ʻo hoko atu ai ʻa ʻene fonongá. Pea naʻe toe haʻu mo ha tokotaha lotu ʻe taha. Ko ha Līvai ia. Naʻá ne tuʻu? ʻIkai, naʻe ʻikai te ne tuʻu foki mo ia ke tokoni ki he tangata kuo ʻosi hono taaʻí. ʻOku lava ke ke sio ki he taulaʻeikí mo e Līvaí ʻokú na fononga atu ʻi he halá.

Ka ke sio ange ki he tokotaha ko ʻení mo e tangata kuo ʻosi hono taaʻí. Ko ha tokotaha Samēlia ia. Pea ʻokú ne tokoni ki he Siú. Naʻá ne ʻai ʻa e faitoʻo ki hono ngaahi laveá. ʻI he ʻosi ko iá, naʻá ne ʻave ʻa e Siú ki ha feituʻu ʻa ia naʻe lava ke ne mālōlō ai kaeʻoua ke sai.

ʻI he ʻosi ʻa e talanoa ʻa Sīsuú, naʻá ne pehē ki he tangata naʻá ne ʻeke kiate ia ʻa e fehuʻí: ‘Ko hai ʻi he toko tolu ko ʻení ʻokú ke fakakaukau naʻá ne fai ʻo hangē ha kaungāʻapi ki he tangata naʻe taaʻí? Ko e taulaʻeikí, pe ko e Līvaí pe ko e Samēliá?

Naʻe tali ange ʻe he tangatá: ‘Ko e tangata Samēliá. Naʻá ne fai ʻofa ki he tangata naʻe taaʻí.’

Naʻe pehē ange ʻe Sīsū: ‘ʻOkú ke tonu. Ko ia ʻalu mo fai pehē ki he niʻihi kehé ʻo hangē ko ʻene faí.’

ʻIkai ʻokú ke saiʻia ʻi he founga faiako ʻa Sīsuú? ʻOku lava ke tau ako ʻa e ngaahi meʻa mahuʻinga lahi ʻaupito ʻo kapau te tau fakaongo ki he meʻa naʻe leaʻaki ʻe Sīsū ʻi he Tohitapú, ʻikai ko ia?