Naʻe Fakamoʻui ʻe Sīsū ʻa e Kau Mahaki

ʻI HE fononga atu ʻa Sīsū ʻi he fonuá, naʻá ne fakamoʻui ʻa e kau mahaki. Naʻe tala ʻa e ongoongo ʻo e ngaahi mana ko ʻení ʻi he ngaahi kolo kotoa takatakaí. Ko ia naʻe ʻomai ʻe he kakaí kiate ia ʻa kinautolu ʻoku heke mo kui mo tuli, mo e tokolahi kehe ʻa ia ʻoku nau puke. Pea naʻe fakamoʻui kotoa pē kinautolu ʻe Sīsū.

Naʻe laka atu ʻeni ʻi he taʻu ʻe tolu talu mei hono papitaiso ʻe Sione ʻa Sīsuú. Pea naʻe tala ʻe Sīsū ki heʻene kau ʻapositoló ʻe vavé ni ʻa ʻene ʻalu ki Selusalema, ʻa ia ʻe tāmateʻi ai ia, pea te ne toki toetuʻu mei he maté. Kaekehe ki muʻa ai, naʻe hokohoko atu pē ʻa e fakamoʻui ʻe Sīsū ʻa e kau mahakí.

ʻI he ʻaho ʻe taha naʻe faiako ʻa Sīsū ʻi he ʻaho Sāpate. Ko e Sāpaté ko e ʻaho mālōlō ia ki he kau Siú. Naʻe fuʻu puke lahi ʻaupito ʻa e fefine ʻokú ke sio ki ai ʻi hení. Naʻe piko hono tuʻá ʻo feʻunga mo e taʻu ʻe 18 mo e ʻikai ke lava ke ne tuʻu hangatonu. Ko ia naʻe ala atu ʻa Sīsū kiate ia, pea kamata leva ke tuʻu hangatonu hake. Naʻe fakamoʻui ia!

Naʻe ʻai ʻe he meʻá ni ke ʻita lahi ʻa e kau taki lotú. Naʻe kaila atu ha taha ʻo kinautolu ki he fuʻu kakaí ʻo pehē: ‘Ko e ʻaho ʻe ono ʻoku totonu ke tau ngāue ai. Ko e ngaahi ʻaho ia ke omi ai ʻo faitoʻo, kae ʻikai ʻi he Sāpaté!’

Ka naʻe tali ange ʻe Sīsū: ‘Ko e kau tangata kovi kimoutolu. Ko ha taha pē ʻiate kimoutolu te ne vete ʻene ʻasí ʻo ʻave ke fakainu ʻi he Sāpaté. Ko ia, ʻoku ʻikai ke totonu nai ki he siʻi fefiné ni, ʻa ia kuó ne siʻi puke ʻo feʻunga mo e taʻu ʻe 18, ke fakamoʻui ʻi he Sāpaté?’ Naʻe hoko ʻa e tali ʻa Sīsuú ke mā ai ʻa e kau tangata koví ni.

Ki mui mai ai, naʻe fononga atu ʻa Sīsū mo ʻene kau ʻapositoló ki Selusalema. Pea ʻi heʻenau ʻi he tuʻakolo ʻo Sielikoó, naʻe fanongo ha ongo kui moʻui kolekole ʻoku haʻu ʻa Sīsū. Ko ia naʻá na kaila: ‘Sīsū, tokoni kiate kimaua!’

Naʻe ui leva ʻe Sīsū ʻa e ongo tangata kuí, ʻo ʻeke: ‘Ko e hā ʻokú mo fiemaʻu ke u fai kiate kimouá?’ Naʻá na pehē: ‘ʻEiki, fakaʻā homa matá.’ Naʻe ala atu ʻa Sīsū ki hona matá, pea naʻe lava leva ke na sio! ʻOkú ke ʻilo ʻa e ʻuhinga naʻe fai ai ʻe Sīsū ʻa e ngaahi mana fakaofo kotoa ko ʻení? Koeʻuhi he ʻokú ne ʻofa ki he kakaí pea ʻokú ne loto ke nau tui kiate ia. Ko ia ʻoku lava ke tau ʻilo pau ai, ʻi he taimi te ne pule mai ai ko e Tuʻí ʻe ʻikai ke toe ʻi ai ha tokotaha ia ʻi he māmaní ʻe puke.