Ko Sīsū ʻi he Ngoué

ʻI HE mavahe ʻa Sīsū mo ʻene kau ʻapositoló mei he loki ʻi ʻolungá, naʻa nau ʻalu atu ki he ngoue ko Ketisemaní. Naʻe tuʻo lahi ʻa ʻenau faʻa ōmai ki heni ki muʻa atu. Naʻe tala ange heni ʻe Sīsū ke nau ʻāʻā mo lotu. Peá ne ʻalu atu ia ʻo kiʻi mamaʻo atu, peá ne fakafoʻohifo hono fofonga ki he kelekelé ke lotu.

Hili iá naʻe foki mai ʻa Sīsū ki he feituʻu ʻoku ʻi ai ʻa ʻene kau ʻapositoló. ʻOkú ke fakakaukau ko e hā ʻa e meʻa naʻa nau faí? Naʻa nau mohe! Naʻe tuʻo tolu hono tala kiate kinautolu ʻe Sīsū ʻoku totonu ke nau ʻā, ka ʻi heʻene foki mai tuʻo tolú naʻá ne ʻilo ai pē ʻoku nau mohe. Naʻe pehē ʻe Sīsū ʻi heʻene haʻu fakaʻosí: ‘ʻOku malava fēfē ke mou mohe ʻi he taimi hangē ko ʻení? Kuo hoko ʻa e taimi kiate au ke tuku atu ki he nima ʻo hoku ngaahi filí.’

ʻI he mōmeniti pē ko iá naʻe lava ke ongona ha longoaʻa ʻa ha fuʻu kakai. Sio! Naʻe haʻu ʻa e kau tangata mo e ngaahi heletā mo e ngaahi pōvai! Pea naʻa nau toʻo ha ngaahi tūhulu ke nau maamaʻaki. ʻI heʻenau ofi maí, naʻe mavahe mai ha taha mei he fuʻu kakaí pea haʻu fakahangatonu kia Sīsū. Naʻá ne ʻuma kiate ia, ʻo hangē ko ia ʻokú ke sio ki aí. Ko e tangatá ni ko Siutasi ʻIsikaliote ia! Ko e hā naʻá ne ʻuma ai kia Sīsuú?

Naʻe ʻeke ange ʻe Sīsū: ‘ʻE Siutasi, ʻokú ke lavakiʻi au ʻaki ʻa e ʻumá?’ ʻIo, ko e ʻumá ko ha fakaʻilonga ia. Naʻe ʻai ʻe he meʻá ni ke ʻiloʻi ʻe he kau tangata naʻe omi mo Siutasí ko Sīsū ʻeni, ʻa e tangata ʻoku nau fiemaʻú. Ko ia naʻe laka mai ʻa e ngaahi fili ʻo Sīsuú ke puke ia. Ka ko Pita naʻe ʻikai te ne tuku ke nau ʻave ʻa Sīsū ʻo ʻikai ke fai ha tau. Naʻá ne unuhi hake ʻa e heletā naʻá ne ʻomai ʻo ne taaʻi ʻa e tangata naʻe ofi ki aí. Naʻe hala ʻa e heletaá mei he foʻi ʻulu ʻo e tangatá ka ne motuhi ʻa hono telinga toʻomataʻú. Ka naʻe ala ʻa Sīsū ki he telinga ʻo e tangatá ʻo fakamoʻui ia.

Naʻe tala ange ʻe Sīsū kia Pita: ‘Fakafoki ʻa hoʻo heletaá ki hono ʻaiʻangá. ʻOku ʻikai te ke ʻilo ʻe lava ke u kole ki heʻeku Tamaí ki ha kau ʻāngelo ʻe toko laui afe ke fakahaofi au?’ ʻIo, naʻe malava ke ne fai pehē! Ka naʻe ʻikai ke kole ʻe Sīsū ia ki he ʻOtuá ke fekau mai ha kau ʻāngelo, koeʻuhi he naʻá ne ʻilo kuo hoko ʻa e taimi ke ʻave ai ia ʻe hono ngaahi filí. Ko ia naʻá ne tuku ke nau taki atu ia. Tau sio ange pe ko e hā naʻe hoko kia Sīsuú.