Ko e Hū ki ha Loki Tāpuni Malu

ʻI HE ʻalu ʻa Pita mo Sione mei he fonualoto ʻa ia naʻe ʻi ai ʻa e sino ʻo Sīsuú, naʻe nofo tokotaha pē ai ʻa Mele. Naʻe kamata ke ne tangi. Peá ne punou atu ʻo sio ki loto ki he fonualotó, ʻo hangē ko ia naʻa tau sio ki ai ʻi he fakatātā ki muʻá. Naʻá ne sio ai ki ha ongo ʻāngelo! Naʻá na ʻeke ki ai: ‘Ko e hā ʻokú ke tangi aí?’

Naʻe tali ange ʻe Mele: ‘Kuo nau ʻave hoku ʻEikí, pea ʻoku ʻikai te u ʻilo pe kuo nau tuku ia ki fē.’ Naʻe toki tafoki hake ʻa Mele ʻo mamata ki ha tangata. Naʻe ʻeke ange ʻe he tangatá: ‘Ko hai ia ʻokú ke kumi ki aí?’

Naʻe fakakaukau ʻa Mele ia ko e tangata ko ʻení ko e tauhi-ngoue ia, pea naʻá ne ʻave nai ʻa e sino ʻo Sīsuú. Ko ia naʻá ne pehē ange: ‘Kapau kuó ke ʻave ia, fakahā mai pe kuó ke tuku ia ki fē.’ Ka, ko hono moʻoní, ko e tangata ko ʻení ko Sīsū pē ia. Naʻá ne ʻai ha sino ʻoku ʻikai ke ʻilo ai ia ʻe Mele. Ka ʻi heʻene ui atu hono hingoá, naʻe ʻilo ai ʻe Mele ko Sīsū ia. Naʻá ne lele ʻo tala ki he kau ākongá: ‘Kuó u sio ki he ʻEikí!’

Ki mui mai ʻi he ʻaho pē ko iá, lolotonga ha fononga ʻa e ongo ākonga ki he kolo ko ʻEmeasi, ne ʻi ai ha tangata ne fononga mo kinaua. Naʻe loto-mamahi ʻaupito ʻa e ongo ākongá koeʻuhi kuo ʻosi tāmateʻi ʻa Sīsū. Ka ʻi heʻenau fononga atú, naʻe fakamatala ʻe he tangatá ʻa e ngaahi meʻa lahi mei he Tohitapú ʻo na ongoʻi fiemālie ange ai. Faifai atu pē, ʻi heʻenau mālōlō ke maʻu meʻatokoni, naʻe ʻiloʻi ʻe he ongo ākongá ko e tangata ko ʻení ko Sīsū ia. Naʻe puli atu leva ʻa Sīsū ia, pea naʻe fakavave ʻa e ongo ākonga ko ení ʻo foki ki Selusalema ke fakahā ki he kau ʻapositoló ʻo kau kiate ia.

ʻI he lolotonga ʻa e hoko ʻo e meʻa ko iá, naʻe toe hā foki ʻa Sīsū kia Pita. Naʻe fiefia lahi ʻa e niʻihi kehe ʻi heʻenau fanongo ki he meʻa ko ʻení. Pea naʻe ʻalu leva ʻa e ongo ākonga ko ʻení ki Selusalema ke kumi ki he kau ʻapositoló. Naʻá na tala kiate kinautolu naʻe toe hā ʻa Sīsū kiate kinaua ʻi he halá. Pea ʻi he lolotonga ʻo ʻena fakamatala ʻo kau ki he meʻa ko ʻení, ʻokú ke ʻilo ʻa e meʻa fakaofo naʻe hokó?

Sio ki he fakatātaá. Naʻe hā tonu pē ai ʻa Sīsū ʻi he lokí, neongo naʻe tāpuni malu ʻa e matapaá. Ko ha fiefia ē ka ko e kau ākongá! ʻIkai ko ha ʻaho fakafiefia ia? ʻOkú ke lava ʻo lau pe ko e tuʻo fiha ʻa e hā ʻa Sīsū ki heʻene kau muimuí ʻo aʻu mai ki he taimi ko ení? ʻOkú ke lau naʻe tuʻo nima?

Naʻe ʻikai ke ʻiate kinautolu ʻa e ʻapositolo ko Tōmasí ʻi he hā ko ʻeni ʻa Sīsuú. Ko ia naʻe tala ʻe he kau ākongá kiate ia: ‘Kuo mau mamata ki he ʻEikí!’ Ka naʻe pehē ʻe Tōmasi kuo pau ke ne mamata ʻe ia tonu kia Sīsū ki muʻa peá ne toki tui ki ai. Pea ʻi he ʻaho ʻe valu ki mui mai ai naʻe toe fakatahataha ʻa e kau ākongá ʻi ha loki kuo tāpuni malu, pea naʻe ʻi ai ʻa Tōmasi mo kinautolu. Fakafokifā, naʻe hā tonu pē ʻi he lokí ʻa Sīsū. Naʻe tui leva ʻa Tōmasi.