ʻOku Māʻolunga Ange Maʻu Pē ʻa e ʻOtua ʻIa Sīsū?

NAʻE ʻikai teitei taku ʻe Sīsū ko e ʻOtua ia. Ko e meʻa kotoa pē naʻa ne lea fekauʻaki mo ia ʻoku hā ai naʻe ʻikai te ne lau ia ʻoku tatau mo e ʻOtua ʻi ha faʻahinga tafaʻaki—ʻikai ʻi he mafai, ʻikai ʻi he ʻilo, ʻikai ʻi he taʻu motuʻa.

ʻI he taimi kotoa pē ʻo ʻene moʻui, pē ʻi hēvani pē ʻi māmani, ʻoku fakahā ʻe heʻene lea mo ʻene angafai ʻa ʻene māʻulalo ange ʻi he ʻOtua. ʻOku māʻolunga ange maʻu pē ʻa e ʻOtua, pea ko Sīsū ko e toko taha māʻulalo ange ʻa ia naʻe fakatupu ʻe he ʻOtua.

Faikehekehe ʻa Sīsū Mei he ʻOtua

NAʻE fakahā tuʻo lahi ʻe Sīsū ko ha meʻa moʻui mavahe ia mei he ʻOtua pea naʻe ʻi ai ha ʻOtua ʻo Sīsū naʻe māʻolunga ʻiate ia, ko ha ʻOtua naʻa ne lotu ki ai, ko ha ʻOtua naʻa ne ui ko ʻene “Tamai.” Naʻe pehē ʻe Sīsū ʻi haʻane lotu ki he ʻOtua, ʻa ia ko e Tamai, ko “koe ko e ʻOtua moʻonia pe taha.” (Fakaʻitali ʻamautolu) (Sione 17:3) ʻIa Sione 20:17 naʻa ne pehē ai kia Mele Makitala: “Ko ʻeku ʻalu hake ʻeni ki heʻeku Tamai, pea ko hoʻomou Tamai, pea ki hoku ʻOtua pea ko homou ʻOtua.” ʻIa 2 Kolinitō 1:3, ʻoku fakapapauʻi ai ʻe he ʻapositolo ko Paula ʻa e felāveʻi ko ʻeni: “Ke fakamaloʻia pe ko e ʻOtua mo Tamai ʻa hotau ʻEiki ko Sisu Kalaisi.” Koeʻuhi naʻe ʻi ai ha ʻOtua ʻo Sīsū, ko ʻene Tamai, heʻikai malava ke ne hoko ko e ʻOtua ko ia ʻi he taimi tatau.

Naʻe ʻikai toumoua ʻa e kau ʻapositolo ʻi heʻenau lea fekauʻaki mo Sīsū mo e ʻOtua ʻoku na mātuʻaki māvahevahe: “Ka kiate kitautolu ʻoku taha pe ʻa e ʻOtua, ko e Tamai, . . . pea ʻoku taha pe ʻa e ʻEiki, ko Sisu Kalaisi.” (1 Kolinitō 8:6) ʻOku fakahā ʻe he ʻapositolo ko Paula ʻa e māvahevahe ni ʻi heʻene pehē “ko e ʻOtua e, mo Kalaisi Sisu, pea mo e kau Angelo Fili.” (1 Tīmote 5:21) Hangē ko ia ko e lea ʻa Paula fekauʻaki mo Sīsū mo e kau ʻāngelo ʻoku nau māvahevahe ʻi hēvani, ʻoku toe pehē pē ʻa Sīsū mo e ʻOtua.

ʻOku toe ʻuhinga foki ʻa e ngaahi lea ʻa Sīsū ʻia Sione 8:17, 18. ʻOku ne pehē: “Pea kuo tohi foki ʻi hoʻomou lao, kapau ko e fakamoʻoni ʻa ha ongo tangata, pea ta ʻoku moʻoni. Ko au pe ha taha ʻoku fakamoʻoni kiate au, pea ʻoku fakamoʻoni kiate au ʻe he Tamai naʻa ne fekau mai au.” ʻI heni ʻoku fakahā ʻe Sīsū ko ia mo e Tamai, ʻa ia ko e ʻOtua Māfimafiʻia, kuo pau ko e ongo meʻa māvahevahe ʻe toko ua, he ko e toe hā ha founga ʻe lava ai ʻa e fakamoʻoni ʻe toko ua?

Naʻe toe fakahā ʻe Sīsū ko ha tokotaha mavahe ia mei he ʻOtua ʻi heʻene pehē: “Ko e ha ʻoku ke ui ai au ko e lelei? ʻoku ʻikai ha taha ʻoku lelei, ngata pe ʻi he ʻOtua toko taha.” (Maʻake 10:18) Ko ia naʻe pehē ʻe Sīsū ʻoku ʻikai ha taha ʻoku lelei hangē ko e ʻOtua, naʻa mo Sīsū tonu. Ko e lelei ʻo e ʻOtua ʻoku mavahe ai ia meia Sīsū.

Ko e Sevāniti Anga-fakatōkilalo ʻa e ʻOtua

NAʻE lea tuʻo lahi ʻa Sīsū hangē ko ʻeni: “ʻOku ʻikai lava ʻe he ʻAlo ke fai ʻiate ia ha momoʻi meʻa, ngata pe ʻi he meʻa ʻoku ne vakai ʻoku fai ʻe he Tamai.” (Sione 5:19) “Kuo u ʻalu hifo mei he langi, ʻo ʻikai ke u fai ʻa e loto ʻoʻoku, ka ko e finangalo ʻo ia naʻa ne fekau mai au.” (Sione 6:38) “Ko ʻeku tokāteline ʻoku ʻikai aʻaku, ka ʻoku aʻana naʻa ne fekau mai au.” (Sione 7:16) ʻIkai ʻoku māʻolunga ange ʻa e tokotaha ʻoku ʻaʻana e fekau ʻi he tokotaha fekau?

Ko e felāveʻi ni ʻoku hā mahino ʻi he talanoa fakatātā ʻa Sīsū fekauʻaki mo e ngoue vaine. Naʻa ne fakatatau ʻa e ʻOtua, ko ʻene Tamai, ki he tokotaha ʻoku ʻaʻana ʻa e ngoue vaine, ʻa ia naʻa ne fononga mamaʻo pea ne tuku ia ki ha kau faʻa, ʻa ia naʻe fakatātāʻaki ʻa e haʻa faifekau Siu. ʻI he fekau atu ʻe he tokotaha ʻoku ʻaʻana ʻa e ngoue vaine haʻane tamaioʻeiki ke ʻomai ha fua ʻo e ngoue vaine, naʻe haha ia ʻe he kau faʻa pea fakafoki mola mai ia. Pea toe fekauʻi atu ʻe he tokotaha ʻoku ʻaʻana ʻa e ngoue vaine haʻane tamaioʻeiki hono ua, pea ki mui ko hono tolu, naʻe toe fai pē ʻa e meʻa tatau kiate kinaua fakatouʻosi. Pea toki pehē ʻe he tokotaha ʻoku ʻaʻana ʻa e ngoue vaine: “Kau fekau atu hoku foha [ko Sīsū] ko e pele: te nau tokaʻi nai ia.” Ka naʻe pehē ʻe he kau faʻa anga-fulikivanu ni: “Ko e hoko ʻena; tau tamateʻi muʻa ia, kae ʻotautolu ʻa e tofiʻa. Pea nau toho ia ki he tuaʻā ngoue, ʻo tamateʻi.” (Luke 20:9-16) Ko ia naʻe fakatātaaʻi ʻe Sīsū hono tuʻunga ko e tokotaha naʻe fekauʻi mai ʻe he ʻOtua ke fai ʻa e finangalo ʻo e ʻOtua, hangē tofu pē ko hano fekauʻi ʻe ha tamai hano foha anga-fakatōkilalo.

Naʻe fakakaukau maʻu pē ʻa e kau muimui ʻo Sīsū kiate ia ko ha sevāniti anga-fakatōkilalo ʻa e ʻOtua, kae ʻikai ko ha tatau ʻo e ʻOtua. Naʻa nau lotu ki he ʻOtua fekauʻaki mo “[hoʻo] sevaniti tapu ko Sisu, ʻa ia naʻa ke pani; . . . pea ke hoko ʻa e ngaahi meʻa mana mo fakaofo ʻi he huafa ʻo hoʻo sevaniti tapu ko Sisu.”—Ngāue 4:23, 27, 30.

Māʻolunga Ange ʻa e ʻOtua ʻi he Taimi Kotoa Pē

ʻI HE kamataʻanga pē ʻo e ngāue fakafaifekau ʻa Sīsū, ʻi heʻene ʻalu hake mei he vai papitaiso, naʻe pehē mai ʻa e leʻo ʻo e ʻOtua mei hēvani: “Ko hoku ʻAlo pele ʻena, ʻa ia kuo u hōifua ai.” (Mātiu 3:16, 17) Kuo pehē ʻe he ʻOtua ko ia pē ʻa hono ʻalo tonu, ʻo hōifua ia ʻiate ia pē, ʻo fekauʻi mai ʻe ia ʻa ia pē? ʻIkai, kuo pehē ʻe he ʻOtua ko e Tokotaha-fakatupu, ʻa ia ʻoku māʻolunga ange, kuo ne hōifua ki ha tokotaha māʻulalo ange ko hono ʻAlo ko Sīsū, ki ha ngāue ʻi he kahaʻu.

Naʻe fakahā ʻe Sīsū ʻa e māʻolunga ange ʻene Tamai ʻi heʻene pehē: “Oku iate au ae Laumalie o Jihova, koeuhi kuo ne fakanofo au keu malaga aki ae ogoogolelei ki he majiva.” (Luke 4:18, PM) Ko e fakanofo pe pani ko hono foaki ia ʻa e mafai pe ko ha lakanga ʻe ha tokotaha māʻolunga ange ki ha tokotaha teʻeki ke ne maʻu ʻa e mafai. ʻOku mahino heni ʻoku māʻolunga ange ʻa e ʻOtua, he naʻa ne fakanofo ʻa Sīsū, ʻo foaki kiate ia ʻa e mafai ʻa ia naʻe ʻikai te ne maʻu ki muʻa.

Naʻe fakamahinoʻi ʻe Sīsū ʻa e māʻolunga ange ʻene Tamai ʻi he taimi naʻe kole ai ʻa e faʻē ʻa e ongo ākonga ʻe toko ua ke nofo ʻene tama ʻe taha ʻi he toʻomataʻu pea taha ʻi he toʻohema ʻo Sīsū ʻi he taimi te ne hoko ai ki hono Puleʻanga. Naʻe tali ʻe Sīsū: “Ko e meʻa ki he nofo ki hoku toʻomataʻu mo hoku toʻohema, ʻoku ʻikai aʻaku ke ʻatu ia, ka kiate kinautolu pe kuo teuteu ia ki ai ʻe heʻeku Tamai,” ʻa ia ko e ʻOtua. (Mātiu 20:23) Kapau ko e ʻOtua Māfimafiʻia ʻa Sīsū, ʻe ʻoʻona ʻa e ongo tuʻunga ni ke foaki atu. Ka naʻe ʻikai malava ʻe Sīsū ke foaki ia he ʻoku ʻa e ʻOtua ke foaki ia, pea naʻe ʻikai ʻOtua ʻa Sīsū.

Ko e ngaahi lotu tonu ʻa Sīsū ko ha sīpinga lelei ia ki heʻene felāveʻi māʻulalo ki hono ʻOtua. ʻI he ofiofi ke pekia ʻa Sīsū, naʻa ne fakahā ʻa hono tokotaha māʻolunga ange ʻaki ʻene lotu: “Tamai, kapau ko ho finangalo, ke ke fakalaka ʻa e ipu ni meiate au: kae kehe ke ʻoua naʻa fai hoku loto ka ko hoʻou pē.” (Luke 22:42) Ko hai naʻa ne lotu ki ai? Ki ha konga ʻo ia pē? ʻIkai, naʻa ne lotu ki ha tokotaha mātuʻaki mavahe, ko ʻene Tamai, ko e ʻOtua, ʻa ia ko hono finangalo naʻe māʻolunga ange pea ʻe malava ke kehe ia mei hono loto ʻoʻona, ko e Tokotaha pē ia ʻoku malava ke ne “fakalaka ʻa e ipu ni.”

Ko ia, ʻi he ofiofi ke ne pekia, naʻe kalanga ʻa Sīsū: “Ko hoku ʻOtua, ko hoku ʻOtua, naʻa ke liʻaki au kae ha?” (Maʻake 15:34) Naʻe kalanga ʻa Sīsū kia hai? Kiate ia pē pea ki ha konga ʻo ia pē? ʻOku pau, ko e kalanga ni, “Ko hoku ʻOtua,” naʻe ʻikai haʻu ia mei ha taha ʻoku ne fakakaukau ko e ʻOtua ia. Pea kapau ko e ʻOtua ʻa Sīsū, ko hai leva naʻa ne liʻaki ia? ʻE ia pē? ʻOku ʻikai ʻuhinga lelei ia. Naʻe toe pehē ʻe Sīsū, “ʻE Tamai, ʻoku ou tuku hoku laumalie ki ho nima.” (Luke 23:46) Kapau ko e ʻOtua ʻa Sīsū, ko e hā e ʻuhinga te ne tuku ai hono laumālie ki he Tamai?

Hili ʻa e pekia ʻa Sīsū, naʻa ne ʻi he fonualoto ʻi he konga ʻo e ʻaho ʻe tolu. Kapau ko e ʻOtua ia, ta ʻoku hala ʻa Hapakuke 1:12 (NW) ʻi heʻene pehē: “ʻE hoku ʻOtua, ko hoku Tokotaha Tapuha, ʻoku ʻikai te ke pekia.” Ka ʻoku pehē ʻe he Tohitapu naʻe pekia ʻa Sīsū pea naʻe ʻikai te ne toe ʻilo ha meʻa ʻi he fonualoto. Pea ko hai naʻa ne fokotuʻu hake ʻa Sīsū mei he pekia? Koeʻuhi naʻa ne pekia moʻoni, naʻe ʻikai malava ke ne toe tuʻu ʻiate ia pē. ʻI he tafaʻaki ʻe taha, kapau naʻe ʻikai te ne pekia moʻoni, heʻikai totongi ʻe haʻane fakangalingali pekia ʻa e huhuʻi mahuʻinga ki he angahala ʻa ʻĀtama. Ka naʻa ne totongi kakato ʻa e mahuʻinga ko eni ʻaki ʻene pekia moʻoni. Ko ia ko e ʻOtua ia naʻa “ne vete hono kafai ʻe mate, ʻo toe fokotuʻu ia [ʻa Sīsū].” (Ngāue 2:24) Ko e ʻOtua Māfimafiʻia, ko e tokotaha māʻolunga ange, naʻa ne fokotuʻu hake ʻa e tokotaha māʻulalo ange, ko ʻene sevāniti ko Sīsū, mei he pekia.

Koeʻuhi naʻe malava ʻe Sīsū ke fai ʻa e ngaahi mana, hangē ko e fokotuʻu hake ʻa e kakai mei he mate, ʻoku fakahā ai ko e ʻOtua ia? Naʻe maʻu foki ʻe he kau ʻapositolo mo e ongo palōfita ko ʻIlaisiā mo ʻIlaisa ʻa e mafai ko ia, ka naʻe ʻikai ke ʻai ʻe he meʻa ni kinautolu ke nau lahi ange ʻi he tangata. Naʻe ʻoange ʻe he ʻOtua ʻa e mafai ki he kau palōfita, kia Sīsū, mo e kau ʻapositolo ke nau fai ʻa e ngaahi mana ke fakahā ai naʻa Ne poupouʻi kinautolu. Ka naʻe ʻikai ʻai ʻe he meʻa ni ha taha ʻo kinautolu ko ha konga ʻo e ʻUluʻi-ʻotua palulali.

Naʻe Fakangatangata ʻa e ʻIlo ʻa Sīsū

ʻI HONO fai ʻe Sīsū ʻene kikite fekauʻaki mo e ngataʻanga ʻo e tuʻu ko eni, naʻa ne pehē: “Ka ko e meʻa ki he ʻaho ko ia, mo hono houa, ʻoku ʻikai ha taha ʻoku ʻilo ki ai; ʻio, pe ko ha angelo ʻi he langi; naʻa mo e ʻAlo ʻoku ʻikai; ngata pe ʻi he Tamai toko taha.” (Maʻake 13:32) Kapau ko Sīsū ko e tuʻunga-ʻAlo ʻi ha ʻUluʻi-ʻotua, ʻo tatau mo e ongo konga kehe, te ne malava ʻo ʻilo ʻa e meʻa ʻoku ʻafioʻi ʻe he Tamai. Ka naʻe ʻikai ʻilo ʻe Sīsū, he naʻe ʻikai te ne tatau mo e ʻOtua.

Tatau pē, ʻoku tau lau ʻia Hepelū 5:8 ko Sīsū “naʻa ne lavaʻi ʻene talangofua, ko e ako ʻe heʻene ngaahi mamahi.” ʻE lava ke tau fakakaukau atu naʻe pau ke ako ʻe he ʻOtua ha meʻa? ʻIkai, ka naʻe fai pehē ʻa Sīsū, he naʻe ʻikai te ne ʻilo ʻa e meʻa kotoa pē naʻe ʻafioʻi ʻe he ʻOtua. Pea naʻe pau ke ne ako ki ha meʻa ʻa ia naʻe ʻikai teitei fiemaʻu ʻa e ʻOtua ke ako ki ai—ko e talangofua. ʻOku ʻikai teitei fiemaʻu ke talangofua ʻa e ʻOtua ia ki ha taha.

Ko e faikehekehe ʻi he meʻa ʻoku ʻafioʻi ʻe he ʻOtua mo e meʻa ʻoku ʻilo ʻe Kalaisi naʻe hā foki ia ʻi he taimi naʻe toetuʻu hake ai ʻa Sīsū ki hēvani ke ʻi ai mo e ʻOtua. Fakatokangaʻi ʻa e muʻaki ngaahi lea ʻo e tohi fakamuimui ʻo e Tohitapu: “Ko e meʻa fakaha ʻe Sisu Kalaisi, . . . ʻa ia naʻe tuku kiate ia ʻe he ʻOtua.” (Fakahā 1:1) Kapau ko ha konga ʻo ha ʻUluʻi-ʻotua ʻa Sīsū tonu, naʻe totonu ke tuku kiate ia ha meʻa fakahā ʻe ha konga ʻe taha ʻo e ʻUluʻi-ʻotua—ko e ʻOtua? ʻOku pau te ne ʻilo kotoa fekauʻaki mo e meʻa ko ia, he ʻoku ʻafioʻi ʻe he ʻOtua. Ka naʻe ʻikai ʻilo ia ʻe Sīsū, he naʻe ʻikai ko e ʻOtua ia.

ʻOku Kei Hokohoko ʻa e Māʻulalo Ange ʻa Sīsū

ʻI HEʻENE moʻui kimuʻa-ke-tangata, pehē foki ki heʻene moʻui ʻi māmani, naʻe māʻulalo ange ʻa Sīsū ʻi he ʻOtua. Hili ʻene toetuʻu, ʻoku kei hoko atu ai pē ʻene tuʻunga siʻi hifo mo māʻulalo ange.

ʻI he lea ʻo kau ki he toetuʻu ʻa Sīsū, naʻe tala ange ʻe Pita mo e faʻahinga naʻe fakataha mo ia ki he Sanetalimi ʻo e kau Siu: “Kuo hakeakiʻi ia [ʻa Sīsū] e he Otua aki hono nima toomatau.” (Ngāue 5:31, PM) Naʻe pehē ʻe Paula: “Naʻe matuʻaki hakeakiʻi ai ia ʻe he ʻOtua.” (Filipai 2:9) Kapau ko e ʻOtua ʻa Sīsū, naʻe anga-fēfē ke hakeakiʻi ʻa Sīsū, ʻa ia ko hono ʻohake ia ki ha tuʻunga māʻolunga ange ʻi he tuʻunga naʻe ʻi ai ki muʻa? Kuo ne ʻosi hoko ia ko ha konga māʻolunga ʻo e Tolu-tahaʻi-ʻotua. Kapau naʻe ʻosi tatau pē ʻa Sīsū mo e ʻOtua ki muʻa ʻa hono hakeakiʻi, ko hano toe hakeakiʻi ia ʻe hoko ai ia ʻo māʻolunga ange ʻi he ʻOtua.

Naʻe toe pehē ʻe Paula naʻe hū ʻa Kalaisi “ki he loto lagi, ke ne fakaha eni ia i he ao oe Otua koeuhi ko kitautolu.” (Hepelū 9:24, PM) Kapau te ke hā ki he ʻao ʻo ha tokotaha kehe, ʻe malava fēfē ko koe ʻa e tokotaha ko ia? Kuo pau ke ke faikehekehe mo māvahevahe.

Tatau pē, ki muʻa siʻi pē he tolomakaʻi ke mate ʻa e maʻata ko Sitīveni, naʻa ne “sio fakamamaʻu ki he langi naʻa ne ʻilo ʻa e sikaina ʻo e ʻOtua, pea mo Sisū ʻoku ne tuʻu mei he toʻomataʻu ʻo e ʻOtua.” (Ngāue 7:55) ʻOku hā mahino, naʻa ne sio ki he toko ua māvahevahe—ka ʻikai ha laumālie māʻoniʻoni, ʻikai ha ʻUluʻi-ʻotua Tokotolu.

ʻI he fakamatala ʻia Fakahā 4:8 ki he 5:7, ʻoku hā ai ʻa e ʻOtua ʻoku ne ʻafio ʻi hono taloni fakahēvani, ka ʻoku ʻikai hā ai ʻa Sīsū. ʻOku fakaofiofi ia ki he ʻOtua ke toʻo ha takainga tohi mei he nima toʻomataʻu ʻo e ʻOtua. ʻOku hā heni ʻoku ʻikai ko e ʻOtua ʻa Sīsū ʻi hēvani ka ʻoku mavahe ia mei he ʻOtua.

ʻI he loto tatau ki he fakamatala ʻi ʻolunga, ʻoku pehē ʻe he Bulletin of the John Rylands Library ʻi Manchester, ʻIngilani: “ʻI heʻene moʻui fakahēvani hili ʻene toetuʻu, ʻoku fakahā ʻe Sīsū ʻa ʻene kei maʻu hono tuʻunga tāutaha fakaeia heʻene kehe mo mavahe mei he ʻOtua ʻo tatau pē mo ʻene moʻui ʻi he māmani ko e Sīsū fakaemāmani. ʻOku moʻoni, ʻoku ne hā mai ʻi he tafaʻaki ʻo e ʻOtua pea ʻi hono fakatatau ki he ʻOtua ko ha tokotaha fakahēvani ia ʻi he fakamaauʻanga fakahēvani ʻa e ʻOtua, hangē ko e kau ʻāngelo—kaekehe koeʻuhi ko e ʻAlo ʻo e ʻOtua ia, ʻoku ne tuʻu ʻi ha kalasi kehe, pea ʻoku māʻolunga mamaʻo ia ʻiate kinautolu.”[76]—Fakatatau Filipai 2:11.

ʻOku toe pehē ʻe he Bulletin: “Kaekehe, ko e meʻa ʻoku fakamatala ʻo kau ki heʻene moʻui mo ʻene ngāue ʻi hono tuʻunga ko e Kalaisi fakahēvani ʻoku ʻikai ʻuhinga pe fakahuʻuhuʻu ia ʻi he tuʻunga fakaʻotua ʻoku ne tuʻu ʻo tatau pē mo e ʻOtua tonu pea ko e ʻOtua kakato ia. Kehe ʻaupito, ʻi he ʻilo ʻi he Fuakava Foʻou pe ko e tokotaha fakahēvani fēfē ia mo ʻene ngāue ʻoku tau sio ai ko ha tokotaha mavahe mo māʻulalo ange ʻi he ʻOtua.”[77]

Ki he kahaʻu taʻengata ʻi hēvani, ʻe hoko atu ai pē ʻa Sīsū ko ha sevāniti mavahe mo māʻulalo ange ʻi he ʻOtua. ʻOku fakahaaʻi ʻe he Tohitapu ʻo pehe ni: “Toki hoko ʻa e ngataʻanga, ʻo ka tukuange ʻe ia [ko Sīsū ʻi hēvani] ʻa e puleʻanga ki he ʻOtua, ʻio, ki he Tamai: . . . pea ʻe toki tuku ki lalo, ʻa e ʻAlo ʻe ia kiate ia naʻa ne fai ʻa e tuku ki lalo ʻo e meʻa kotoa pe kiate ia; koeʻuhiā ke tāfataha ʻa e ʻOtua ʻi he meʻa kotoa pe.”—1 Kolinitō 15:24, 28.

Naʻe ʻIkai Teitei Taku ʻe Sīsū ko e ʻOtua Ia

KO E tuʻunga ʻa e Tohitapu ʻoku mahino. ʻOku ʻikai ngata pē ʻi he ʻOtua Māfimafiʻia, ʻa Sihova, ko ha tokotaha mavahe meia Sīsū ka ʻi he taimi kotoa pē ʻoku Ne māʻolunga ange. ʻOku fakahā maʻu pē ʻe Sīsū ia ko ha tokotaha mavahe mo māʻulalo ange, ko ha sevāniti anga-vaivai ʻa e ʻOtua. Ko e ʻuhinga ia ʻoku tala mahino ai ʻe he Tohitapu “ko e ʻulu ʻo Kalaisi ko e ʻOtua” ʻi he founga tatau pē “ko e ʻulu ʻo e tangata kotoa pe ko Kalaisi.” (1 Kolinitō 11:3) Pea ko e ʻuhinga ia naʻe pehē ai ʻe Sīsū tonu: “ʻOku lahi ʻa e Tamai ʻiate au.”—Sione 14:28.

Ko e moʻoni ʻoku ʻikai ko e ʻOtua ʻa Sīsū pea naʻe ʻikai te ne teitei taku ko e ʻOtua ia. ʻOku lolotonga ʻiloʻi ʻeni ʻe ha kau poto mataotao tokolahi. Hangē ko ia ʻoku pehē ʻe he Rylands Bulletin: “Ko e moʻoni ke hanga ki ai, kuo taki ʻe he fakatotolo ki he Fuakava Foʻou ʻi he taʻu ʻe tolungofulu pe fāngofulu tupu kuo hili ʻa e kau poto mataotao ongoongoa ʻi he Fuakava Foʻou ki ha fakaʻosiʻaki ko Sīsū . . . naʻe ʻikai te ne teitei tui ia ko e ʻOtua ia.”[78]

ʻOku toe pehē ʻe he Bulletin fekauʻaki mo e kau Kalisitiane ʻo e ʻuluaki senituli: “Ko ia ai, ʻi heʻenau tuku [kia Sīsū] ʻa e ngaahi hingoa fakalakanga lāngilangi hangē ko Kalaisi, Fānautama ʻa Tangata, ʻAlo ʻo e ʻOtua mo e ʻEiki, ko e ngaahi founga ni ke leaʻaki ʻoku ʻikai ko e ʻOtua ia, ka naʻa ne fai ʻa e ngāue ʻa e ʻOtua.”[79]

Ko ia, ʻoku tala moʻoni ʻe he kau poto mataotao fakalotu ʻe niʻihi ko e foʻi fakakaukau fekauʻaki mo e hoko ʻa Sīsū ko e ʻOtua ʻoku fepaki ia mo e fakamoʻoni kakato ʻa e Tohitapu. ʻI ai, ʻoku māʻolunga ange maʻu pē ʻa e ʻOtua, pea ko Sīsū ko e sevāniti māʻulalo ange ia.

[Fakamatala ʻi he peesi 19]

‘Kuo taki ʻe he fakatotolo ki he Fuakava Foʻou ha kau poto mataotao tokolahi ki he fakaʻosiʻaki ko Sīsū naʻe ʻikai te ne teitei tui ko e ʻOtua ia.’—Bulletin of the John Rylands Library

[Fakatātā ʻi he peesi 17]

Naʻe tala ange ʻe Sīsū ki he kau Siu: “Kuo u ʻalu hifo mei he langi, ʻo ʻikai ke u fai ʻa e loto ʻoʻoku, ka ko e finangalo ʻo ia naʻa ne fekau mai au.”—Sione 6:38

[Fakatātā ʻi he peesi 18]

ʻI he kalanga ʻa Sīsū: “Ko hoku ʻOtua, ko hoku ʻOtua naʻa ke liʻaki au kae ha?” naʻe pau naʻe ʻikai te ne tui ko ia tonu ʻa e ʻOtua