Ko Sīsū ʻa e ʻOtua Māfimafi-Aoniú?
Tali anga-mahení:
▪ “ʻIo, ko Sīsū ʻa e ʻOtua Māfimafi-Aoniú.”
▪ “Ko Sīsū ʻa e fakahāhā mai ʻo e ʻOtuá ʻi he kakanó.”
Ko e hā naʻe leaʻaki ʻe Sīsuú?
▪ “Ka ne mou ʻofa kiate au, pehē te mou fiefia ʻi heʻeku ʻalu ki he Tamai: koeʻuhi ʻoku lahi ʻa e Tamai ʻiate au.” (Sione 14:28) Naʻe fakahaaʻi ʻe Sīsū ko ia mo ʻene Tamaí ʻoku ʻikai te na tatau.
▪ “Ko ʻeku ʻalu hake ʻeni ki heʻeku Tamai pea ko hoʻomou Tamai, pea ki hoku ʻOtua pea ko homou ʻOtua.” (Sione 20:17) Naʻe ʻikai lea ʻa Sīsū fekauʻaki mo ia ko ha ʻOtua ka naʻá ne lea fekauʻaki mo e ʻOtuá ko ha Tokotaha mavahe.
▪ “Naʻe ʻikai meiate au ʻeku lea; ka ko e Tamai naʻa ne fekau mai au, naʻe fai mai ʻe ia hoku tuʻutuʻuni ki he meʻa te u tala mo e lea te u fai.” (Sione 12:49) Ko e ngaahi akonaki ʻa Sīsuú naʻe ʻikai haʻu meiate ia; naʻe haʻu ia mei he Tamaí.
NAʻE taukaveʻi ʻe Sīsū ko e ʻAlo ia ʻo e ʻOtuá, ʻo ʻikai ko e ʻOtua Māfimafi-Aoniú. Kapau naʻe ʻOtua ʻa Sīsū, ko hai naʻá ne lotu ki ai lolotonga ʻene ʻi heni ʻi he māmaní? (Mātiu 14:23; 26:26-29) Ko e moʻoni naʻe ʻikai ke fakangalingali pē ʻa Sīsū ʻokú ne talanoa ki ha toko taha kehe!
ʻI he taimi naʻe kole ai ʻe he toko ua ʻo e kau ākonga ʻa Sīsuú kiate ia ha ongo tuʻunga makehe ʻi hono Puleʻangá, naʻá ne tali: “Ko e meʻa ki he nofo ki hoku toʻomataʻu mo hoku toʻohema, ʻoku ʻikai aʻaku ke ʻatu ia, ka kiate kinautolu pe kuo teuteu ia ki ai ʻe heʻeku Tamai.” (Mātiu 20:23) Naʻe loi ʻa Sīsū kia kinaua ʻi heʻene fakamatala naʻe ʻikai te ne maʻu ʻa e mafai ke ʻoange ʻa e meʻa naʻá na kolé? ʻIkai ʻaupito! ʻI hono kehé, naʻá ne fakahaaʻi anga-fakatōkilalo ko e ʻOtuá pē ʻokú ne maʻu ʻa e mafai ke fai ʻa e fili ko iá. Naʻe aʻu ʻo fakamatala ʻa Sīsū naʻe ʻi ai e ngaahi meʻa naʻe ʻikai te ne ʻilo pe ko e kau ʻāngeló ka ko ʻene Tamaí pē naʻá ne ʻilo iá.—Maake 13:32.
Naʻe māʻulalo ange ʻa Sīsū ʻi he ʻOtuá ʻi he taimi pē naʻá ne hoko ai ko ha tangata ʻi heni ʻi he māmaní? ʻIkai. Naʻa mo e hili ʻene pekiá mo e toetuʻú, ʻoku fakamatalaʻi ʻa Sīsū ʻi he Tohi Tapú naʻá ne māʻulalo ange ʻi he ʻOtuá. ʻOku fakamanatu mai ʻe he ʻapositolo ko Paulá ko e “ʻOtuá ʻoku māʻolunga ange ia ʻia Kalaisi.” (1 Kolinito 11:3, Today’s English Version) ʻOku pehē ʻe he Tohi Tapú ʻi he kahaʻú “ʻi hono tuku ʻa e meʻa kotoa pē ki he malumalu ʻo e pule ʻa Kalaisí, ko ia tonu leva, ʻa e ʻAló, te ne tuku ia tonu ki he malumalu ʻo e ʻOtuá, ʻa ia naʻá ne tuku ʻa e meʻa kotoa pē ki hono malumalú; pea ʻe pule fakalūkufua ʻa e ʻOtuá ki he meʻa kotoa pē.”—1 Kolinito 15:28, TEV.
ʻOku hā mahino, ko Sīsuú ʻoku ʻikai ko e ʻOtua Māfimafi-Aoniú ia. Ko e ʻuhinga ia naʻá ne lea ai fekauʻaki mo ʻene Tamaí ko “hoku ʻOtua.”—Fakahā 3:2, 12; 2 Kolinito 1:3, 4.a
[Fakamatala ʻi lalo]
a Ki ha fakamatala lahi ange ki he kaveinga ko ení, sio ki he peesi 201-204 ʻo e tohi Ko e Hā ʻOku Akoʻi Moʻoni ʻe he Tohi Tapú? ʻoku pulusi ʻe he Kau Fakamoʻoni ʻa Sihová.
[Fakatātā ʻi he peesi 7]
Naʻe pehē ʻe Sīsū naʻe ʻi ai e ngaahi meʻa naʻe ʻikai te ne ʻilo pe ko e kau ʻāngeló ka ko ʻene Tamaí pē naʻá ne ʻilo iá