Vahe 5
Ko e ʻAloʻi ʻo Sīsuú—ʻI Fē pea ʻAnefē?
KO E ʻemipola ʻo e ʻEmipaea Lomá, ko Sisa ʻAokositusi, naʻá ne tuʻutuʻuni ʻo pehē kuo pau ke foki ʻa e kakai kotoa ki he kolo naʻe fāʻeleʻi ai kinautolú ke lēsisita ai. Ko ia naʻe fononga ʻa Siosefa ki he kolo naʻe fāʻeleʻi ai iá, ko e kolo ko Pētelihema.
Naʻe tokolahi ʻa e kakai naʻa nau ʻi Pētelihema ke nau lēsisita, pea ko e feituʻu pē naʻe maʻu ʻe Siosefa mo Mele ke na nofo aí ko e fale tauhi fanga manu. Naʻe fāʻeleʻi ai heni ʻa Sīsū, ʻi he feituʻu naʻe tauhi ai ʻa e fanga ʻasi mo e fanga manu kehe. Naʻe kofuʻaki ia ʻe Mele ʻa e ngaahi konga tupenu ʻo ne fakatokoto ia ʻi he ʻaiʻangakai ʻo e fanga manú.
ʻOku pau naʻe ʻi he tataki ʻa e ʻOtuá ʻa hono ʻai ʻe Sisa ʻAokositusi ʻa e lao ʻo kau ki he lēsisitá. Naʻe ʻai ʻe he meʻá ni ke malava ke ʻaloʻi ai ʻa Sīsū ʻi Pētelihema, ko e kolo ia naʻe tala ʻi he taimi fuoloa ki muʻá ʻi he ngaahi Konga Tohitapú ʻe ʻaloʻi ai ʻa e tokotaha pule naʻe talaʻofá.
Ko ha pō mahuʻinga lahi ē! ʻI he ngoué naʻe malama mai ai ha maama ngingila ʻo takatakai ki he kau tauhi-sipí. Ko e lāngilangi ia ʻo Sihová! Pea naʻe tala ʻe he ʻāngelo ʻa Sihová kiate kinautolu: “ʻOua ʻe manavahē, he ko ʻeni kuó u haʻu mo au ha ongoongo lelei, ko e meʻa fakafiefia ʻaupito, ko e meʻa maʻá e kakai kātoa, he naʻe ʻaloʻi kiate kimoutolu ʻanenai ʻi he kolo ʻo Tēvitá ha Fakamoʻui, ʻa ia ko Kalaisi ko e ʻEiki. Pea ko hono fakaʻilonga ʻeni kiate kimoutolú: te mou ʻilo ha tamasiʻi valevale, kuo kofu fakatamasiʻi valevale, pea ʻokú ne tokoto ʻi he ʻaiʻangakai ʻo e manú.” Naʻe ʻasi fakafokifā ʻa e toe kau ʻāngelo tokolahi ange ʻo nau hivaʻaki: “Ko e kolōlia ki he ʻOtua ʻi langi taupotu, pea ko e melino ki māmani ki he kakai kuo hōifua ki ai.”
ʻI he mavahe ʻa e kau ʻāngeló, naʻe fepehēʻaki ʻe he kau tauhi-sipí: “Tau ō muʻa ʻo hoko ki Pētelihema, ʻo vakai ʻa e meʻa ko ʻeni kuo hokó, ʻa ia kuo fakahā mai ʻe Sihová.” Naʻa nau ʻalu fakavavevave ʻo nau ʻilo ʻa Sīsū ʻi he feituʻu pē naʻe tala ange ʻe he ʻāngeló. ʻI he leaʻaki ʻe he kau tauhi-sipí ʻa e meʻa naʻe tala ʻe he ʻāngeló kiate kinautolú, naʻe ofo ʻa e faʻahinga kotoa naʻe fanongo ki aí. Naʻe tānaki ʻe Mele ʻa e ngaahi leá ni kotoa ʻo ne tukulotoʻi kinautolu.
ʻOku tokolahi ʻa e kakai ʻi he ʻahó ni ʻoku nau tui naʻe ʻaloʻi ʻa Sīsū ʻi he Tīsema 25. Ka ko Tīsemá ko ha faʻahitaʻu ʻuha mo momoko ia ʻi Pētelihema. Heʻikai ke nofo ʻa e kau tauhi-sipí ʻi he ngoué mo ʻenau tākangá ʻi he taimi poʻulí ʻi he vahaʻa taimi ko ia ʻo e taʻú. Pehē foki, heʻikai ke fiemaʻu ʻe Sisa ʻo Lomá ke fai ʻe he kakai ʻa ia naʻa nau ʻosi hehema ke angatuʻu kiate iá ʻa e fononga ko ia ʻi he faʻahitaʻu momoko ʻaupitó ʻo nau lēsisita ai. ʻOku hā mahino naʻe ʻaloʻi ʻa Sīsū he taimi ʻi he kamataʻanga ʻo e faʻahitaʻu fakatōlau ʻo e taʻú. Luke 2:1-20; Maika 5:2.
▪ Ko e hā naʻe fononga ai ʻa Siosefa mo Mele ki Pētelihemá?
▪ Ko e hā ʻa e meʻa fakaofo naʻe hoko ʻi he pō naʻe ʻaloʻi ai ʻa Sīsuú?
▪ Ko e hā ʻoku tau ʻilo ai naʻe ʻikai ke ʻaloʻi ʻa Sīsū ʻi he Tīsema 25?