Naʻe Fāʻeleʻi ʻa Sīsū ʻi he Fale ki he Fanga Manú

ʻOKÚ KE ʻilo pe ko hai ʻa e kiʻi pēpē ko ʻení? ʻIo, ko Sīsū ia. Naʻe toki fāʻeleʻi ia ʻi ha fale ki he fanga manu. Naʻe fakatokoto ʻe Mele ʻa Sīsū ʻi he ʻaiʻanga kai, ʻa ia ko e meʻa ia ʻoku tuku ai ʻa e meʻakai ki he fanga ʻasi mo e fanga manu kehe. Ka ko e hā naʻe ʻi heni ai ʻa Mele mo Siosefa fakataha mo e fanga manú? ʻOku ʻikai ko ha feituʻu lelei ʻeni ia ke fāʻeleʻi ai ha pēpē, ʻikai ko ia?

ʻIo. Ka ko e ʻuhinga ʻeni naʻa nau ʻi heni aí: Ko e pule ʻo Lomá, ko Sisa ʻAkosito, naʻá ne ʻai ha lao ʻo pehē kuo pau ke foki ʻa e tokotaha kotoa pē ki he kolo naʻe fāʻeleʻi ai ke fai hano hiki hono hingoá ki ha tohi. Naʻe fāʻeleʻi ʻa Siosefa ʻi heni ʻi Pētelihema. Ka ʻi heʻene aʻu ki ai mo Melé, naʻe ʻikai ke toe maʻu ha loki kiate kinaua ʻi ha feituʻu. Ko ia naʻe pau ke na haʻu ki heni ʻo nofo fakataha mo e fanga manú. Pea ʻi he ʻaho pē ko ʻení naʻe fāʻeleʻi ai ʻe Mele ʻa Sīsū! Ka hangē ko ia ʻokú ke sio ki aí, naʻe moʻui lelei pē ia.

ʻOkú ke sio ki he kau tauhi-sipi ʻoku nau haʻu ke sio kia Sīsuú? Naʻa nau ʻi he ngoué ʻi he pō ko iá ke tokangaʻi ʻenau fanga sipí, pea naʻe ʻi ai ha maama ngingila naʻe huhulu kiate kinautolu. Ko ha ʻāngelo! Naʻe mātuʻaki ilifia ʻaupito ʻa e kau tauhi-sipí. Ka naʻe pehē ʻe he ʻāngeló: ‘ʻOua ʻe ilifia! ʻOku ou haʻu mo e ongoongo lelei kiate kimoutolu. ʻI he ʻahó ni, ʻi Pētelihema, kuo fāʻeleʻi ʻa Kalaisi ko e ʻEiki. Te ne fakahaofi ʻa e kakaí! Te mou ʻilo ia ʻoku takatakaiʻaki ha tupenu ʻo fakatokoto ʻi ha ʻaiʻanga kai.’ Fakafokifā naʻe haʻu mo e kau ʻāngelo tokolahi pea kamata ke nau fakamālō ki he ʻOtuá. Ko ia naʻe ʻalu leva ʻa e kau tauhi-sipí ke kumi kia Sīsū, pea naʻa nau ʻilo ia.

ʻOkú ke ʻilo pe ko e hā naʻe fuʻu makehe ai ʻa Sīsuú? ʻOkú ke ʻilo pe ko hai moʻoni ia? Manatuʻi, ʻi he ʻuluaki talanoa ʻo e tohi ko ʻení naʻe tala ai kiate kitautolu ʻo kau ki he ʻuluaki ʻAlo ʻo e ʻOtuá. Naʻe ngāue ʻa e ʻAlo ko ʻení mo Sihova ʻi hono ngaohi ʻa e langí mo e māmaní mo e ngaahi meʻa kehe kotoa pē. ʻIo, ko Sīsū ʻa e tokotaha ko iá!

ʻIo, naʻe toʻo ʻe Sihova ʻa e moʻui ʻa hono ʻAló mei hēvani ʻo tuku ia ki he manava ʻo Melé. Naʻe kamata leva ke tupu ha pēpē ʻi loto ʻiate ia ʻo hangē pē ko e tupu ʻa e ngaahi pēpē kehe ʻi loto ʻi heʻenau ngaahi faʻeé. Ka ko e pēpē ko ʻení ko e ʻAlo ia ʻo e ʻOtuá. Faifai atu pē pea naʻe fāʻeleʻi ʻa Sīsū ʻi he fale ki he fanga manu ʻi Pētelihema. ʻOku mahino leva kiate koe ʻa e ʻuhinga naʻe fiefia lahi ai ʻa e kau ʻāngeló ke nau tala ki he kakaí kuo fāʻeleʻi ʻa Sīsuú?