Vahe 32
Ko e Hā ʻa e Meʻa ʻOku Ngofua ʻi he Sāpaté?
KO E toe Sāpate ʻe taha naʻe ʻaʻahi ai ʻa Sīsū ki ha sinakoke ofi ki he Tahi Kālelí. Naʻe ʻi ai ha tangata kuo mate hono nima toʻomataʻú. Naʻe lamasi ʻe he kau sikalaipé mo e kau Fālesí ke nau sio pe ʻe fakamoʻui ia ʻe Sīsū. Naʻe faifai atu pea nau ʻeke: “ʻOku ngofua ʻapē ke faitoʻo ʻi he Sāpaté?”
Naʻe tui ʻa e kau taki lotu Siú ʻoku ngofua pē ʻa e fakamoʻui mahaki ʻi he Sāpaté ʻo kapau ʻoku ʻi he tuʻunga fakatuʻutāmaki ʻa e moʻuí. Hangē ko ʻení, naʻa nau akoʻi naʻe tapu ke faitoʻo fasi pe haʻi ha kafo. Ko ia naʻe ʻeke ʻe he kau sikalaipé mo e kau Fālesí ʻa e ngaahi fehuʻi kia Sīsū ko ʻenau feinga ke talatalaakiʻi ʻaki ia.
Kae kehe, naʻe ʻilo ʻe Sīsū ʻa e anga ʻo ʻenau fakakaukaú. ʻI he taimi tatau pē, naʻá ne fakatokangaʻi naʻa nau maʻu ʻa e anga ʻo e fakakaukau fuʻu tōtuʻa mo taʻefakatohitapu ʻo kau ki he meʻa ʻokú ne maumauʻi ʻa e fiemaʻu ke ʻoua ʻe fai ha ngāue ʻi he Sāpaté. Ko ia ai, naʻe ʻai ʻe Sīsū ke hoko ha fakafepaki fakaʻohovale ʻaki ʻene pehē ki he tangata naʻe mate hono nimá: “Tuʻu, ʻo hopo mai ki loto.”
Pea ʻi he hanga atu leva ʻa Sīsū ki he kau sikalaipé mo e kau Fālesí, naʻá ne pehē: “Ko e tangata fē ʻiate kimoutolu, ʻa ia ʻokú ne maʻu ha sipi ʻe toko taha, pea tō ia ki ha luo ʻi he Sāpaté, ʻe ʻikai te ne puke ia ʻo ʻohake?” Koeʻuhi ko e sipí ko e meʻa ʻoku ʻi ai hono mahuʻinga fakapaʻanga, naʻe ʻikai te nau tuku ia ʻi he luó ki he ʻaho hono hokó, naʻa puke ia pea hoko ko ha mole kiate kinautolu. Kaeʻumaʻā, ʻoku pehē ʻe he Tohitapú: “ʻOku tokangaʻi ʻe he tangata māʻoniʻoní ʻa e moʻui ʻa ʻene manú.”
ʻI hono fakahā ha meʻa ʻoku huʻufataha mo e meʻá ni, naʻe hoko atu ʻe Sīsū: “Hono ʻikai mahuʻinga ha tangata ʻi ha sipi? Ko ia ʻoku ngofua pē ʻi he Sāpaté ke ngāue ʻaonga.” Naʻe ʻikai malava ke fakataʻeʻaongaʻi ʻe he kau taki lotú ʻa e faʻahinga fakakaukau ʻuhinga lelei mo manavaʻofa peheé, pea naʻa nau fakalongo pē.
Naʻe sio takai ʻa Sīsū ʻi heʻene tuputāmakí pea mo e loto-mamahi ʻi heʻenau vale fusifusilotó. Pea naʻá ne pehē ki he tangatá: “Mafao atu ho nimá.” Peá ne mafao atu ia pea naʻe sai hono nimá.
Naʻe ʻikai ke fiefia ʻa e kau Fālesí ʻi he sai ʻa e nima ʻo e tangatá, ka naʻa nau hū ki tuʻa pea nau faʻufaʻufono leva mo e faʻahi ʻa Hēlotá ke tāmateʻi ʻa Sīsū. ʻOku hā mahino naʻe kau ʻi he faʻahi fakapolitikale ko ʻení ʻa e ngaahi mēmipa ʻo e kau Sātusi anga-fakalotú. ʻI he tuʻunga lahi, naʻe fepaki fakahāhā ʻa e faʻahi fakapolitikale ko ʻení mo e kau Fālesí, ka naʻa nau fāʻūtaha ʻi heʻenau fakafepaki kia Sīsuú. Mātiu 12:9-14; Maake 3:1-6; Luke 6:6-11; Palovepi 12:10; Ekisoto 20:8-10.
▪ Ko e hā ʻa e meʻa naʻe hoko naʻe iku atu ai ki ha fakafepaki fakaʻohovale ʻi he vahaʻa ʻo Sīsū pea mo e kau taki lotu Siú?
▪ Ko e hā ʻa e tui ʻa e kau taki lotu Siu ko iá ʻo fekauʻaki mo e fakamoʻui mahaki he Sāpaté?
▪ Ko e hā ʻa e talanoa fakatātā naʻe ngāueʻaki ʻe Sīsū ke ne fakataʻeʻaongaʻiʻaki ʻenau ngaahi fakakaukau halá?