Founga ʻe Lava Ke Ke Ako Ai ʻo Fekauʻaki mo e ʻOtuá

ʻOku lava ke ke ako ʻo fekauʻaki mo Sihova ʻaki hono lau ʻa e Tohitapú. ʻI he kuonga muʻá, naʻe fili ai ʻe he ʻOtuá ʻa e faʻahinga pau ʻo e tangatá ke nau hiki ʻa ʻene ngaahi fakakaukaú. Ko e ngaahi tohi ko iá ʻoku ui ia ko e Tohitapú. ʻI he ʻahó ni ʻoku tau ako ai ʻo fekauʻaki mo e ʻOtuá ʻaki hono lau ʻa e Tohitapú. Koeʻuhi ʻoku ʻi he Tohitapú ʻa e folofola, pe ko e pōpoaki ʻa Sihová, ʻoku toe ui ia ko e Folofola ʻa e ʻOtuá. ʻOku lava ke tau tui ki he meʻa ʻoku leaʻaki ʻe he Tohitapú koeʻuhi he ʻoku ʻikai ʻaupito ke loi ʻa Sihova. ʻOku “ʻikai ʻaupito lava ke loi ai ʻa e ʻOtua.” (Hepelu 6:18) ʻOku ʻi he Folofola ʻa e ʻOtuá ʻa e moʻoní.​—Sione 17:17.

Ko e Tohitapú ko e taha ia ʻo e meʻaʻofa mahuʻinga taha ʻa e ʻOtuá kiate kitautolú. ʻOku hangē ia ha tohi mei ha tamai ʻofa ki heʻene fānaú. ʻOkú ne tala mai kiate kitautolu ʻo fekauʻaki mo e talaʻofa ʻa e ʻOtuá ke liliu ʻa e foʻi māmaní ko ha feituʻu fakaofo ke moʻui ai​—ko ha palataisi. ʻOkú ne tala mai ai kiate kitautolu ʻa e meʻa kuó ne fai ʻi he kuohilí, ko e meʻa ʻokú ne fai he taimi ní, pea mo e meʻa te ne fai ʻi he kahaʻú ki heʻene fānau anga-tonú. ʻOkú ne toe tokoniʻi kitautolu ke solova ʻetau ngaahi palopalemá pea ke maʻu ʻa e fiefiá.​—2 Timote 3:16, 17.

Ko e Kau Fakamoʻoni ʻa Sihová ko e ngaahi kaumeʻa kinautolu ʻo e ʻOtuá; te nau tokoniʻi koe ke ke mahinoʻi ʻa e meʻa ʻoku akoʻi ʻe he Tohitapú. Tala ange pē kiate kinautolu ʻokú ke loto ke ke ako ʻa e Tohitapú. ʻOku ʻikai te nau ʻeke ha paʻanga ki he meʻá ni. (Mātiu 10:8) Tānaki atu ki ai, ʻoku lava ke ke maʻu ʻa e ngaahi fakataha faka-Kalisitiané. ʻOku fai eni ʻi he ngaahi feituʻu faiʻangalotu ʻoku ui ko e ngaahi Fale Fakatahaʻanga. Kapau te ke maʻu ʻa e ngaahi fakataha faka-Kalisitiané, te ke tupulekina vave ai ʻi hoʻo ʻiloʻi ʻa e ʻOtuá.

ʻOku lava ke ke ako ʻo fekauʻaki mo e ʻOtuá mei he ngaahi meʻa kuó ne ngaohí. Ko e fakatātaá, ʻoku pehē ʻe he Tohitapú: “Naʻe fakatupu ʻe he ʻOtua ʻa e ngaahi langi mo mamani.” (Senesi 1:1) ʻI he taimi naʻe fakatupu ai ʻe Sihova “ʻa e ngaahi langi,” naʻá ne ngaohi ai ʻa e laʻaá. Sai, ko e hā ʻoku tala mai kiate kitautolu ʻe he meʻa ko iá ʻo fekauʻaki mo e ʻOtuá? ʻOkú ne tala mai ʻoku maʻu ʻe Sihova ʻa e mālohi lahi. Ko ia pē tokotaha ʻoku lava ke ne ngaohi ʻa e meʻa ʻoku mālohi ʻo hangē ko e laʻaá. ʻOkú ne toe tala mai kiate kitautolu ʻoku poto ʻa Sihova, koeʻuhi he ʻoku fiemaʻu ʻa e potó ke faʻuʻaki ʻa e laʻaá, ʻa ia ʻokú ne ʻomai ʻa e māfana mo e maama pea ʻoku ʻikai ʻaupito ngata ʻa ʻene uló.

ʻOku fakahaaʻi ʻe he fakatupu ʻa Sihová ʻokú ne ʻofa ʻiate kitautolu. Fakakaukau atu ki he kotoa ʻo e faʻahinga fuaʻiʻakau kehekehe ʻoku ʻi ai ʻi he foʻi māmaní. Ne mei lava pē ke tokonaki mai ʻe Sihova ʻa e faʻahinga fuaʻiʻakau pē ʻe taha maʻatautolu​—pe ʻikai ha meʻa ʻe taha. ʻI hono kehé, naʻe ʻomai ʻe Sihova maʻatautolu ʻa e faʻahinga lahi kehekehe ʻo e fuaʻi­ʻakaú fakataha mo e ngaahi fuo, lahi, ngaahi lanu, mo e ifo kehekehe. ʻOku fakahā ʻe he meʻá ni ko Sihová ko ha ʻOtua ia ʻoku ʻikai ngata pē ʻi heʻene ʻofá ka ʻokú ne toe nima-homo, faʻa fakakaukau mo anga-ʻofa ʻaupito.​—Sāme 104:24.