Ke Tauhi ha Kaumeʻa, Kuo Pau Ke Ke Hoko ko ha Kaumeʻa

Ko e kaumeʻá ʻoku makatuʻunga ia ʻi he ʻofá. Ko e lahi ange ʻa hoʻo ako ʻo fekauʻaki mo Sihová, ko e lahi ange ia ʻa hoʻo ʻofa kiate iá. ʻI he tupulaki ʻa hoʻo ʻofa ki he ʻOtuá, ʻe toe tupulaki foki ai mo hoʻo holi ke tauhi kiate iá. ʻE ueʻi koe ʻe he meʻá ni ke ke hoko ai ko ha ākonga ʻa Sīsū Kalaisi. (Mātiu 28:19) ʻI he kau ki he fāmili fiefia ʻo e Kau Fakamoʻoni ʻa Sihová, ʻe lava ke ke hokosia ai ʻa e kaumeʻa mo e ʻOtuá ʻo taʻengata. Ko e hā kuo pau ke ke faí?

Kuo pau ke ke fakahāhā ʻa hoʻo ʻofa ki he ʻOtuá ʻaki ʻa e talangofua ki heʻene ngaahi laó. “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.”​—1 Sione 5:3, 4a.

Ngāueʻaki ʻa e meʻa ʻokú ke akó. Naʻe fai ʻe Sīsū ha talanoa ʻa ia ʻokú ne fakatātaaʻi ʻa e meʻá ni. Naʻe langa ʻe ha tangata poto hano fale ʻi he maká. Naʻe langa ʻe ha tangata vale hano fale ʻi he ʻoneʻoné. ʻI he taimi ne hoko mai ai ha fuʻu afā lahi, naʻe ʻikai ke holo ʻa e fale naʻe langa ʻi he maká, ka ko e fale naʻe langa ʻi he ʻoneʻoné naʻe holo ia pea ko ha fuʻu holo lahi. Naʻe pehē ʻe Sīsū ko e faʻahinga ko ia ʻoku fanongo ki heʻene ngaahi akonakí pea fai ki aí ʻoku nau hangē ko e tangata poto ʻa ia naʻe langa ʻi he maká. Ka ko e faʻahinga ko ia ʻoku fanongo ki heʻene ngaahi akonakí pea ʻikai ke fai ki aí ʻoku nau hangē ko e tangata vale ko ia naʻe langa ʻi he ʻoneʻoné. Ko fē ʻa e tangata ʻokú ke loto ke hangē ko iá?​—Mātiu 7:24-27.

Fakatapui. ʻOku ʻuhinga ení ko hoʻo hū kia Sihova ʻi he lotu ʻo tala ange kiate ia ʻokú ke loto ke fai ʻa hono finangaló ʻo taʻengata. Ko hono fai ʻa e finangalo ʻo e ʻOtuá ʻoku fakahaaʻi ai ko ha ākonga koe ʻa Sīsū Kalaisi.​—Mātiu 11:29.

Papitaiso. “Ke papitaiso koe, ʻo fufulu koe mei hoʻo ngaahi angahala, ʻo takua hono huafa.”​—Ngāue 22:16.

Hoko ʻo kau kakato ʻi hono tauhi ʻa e ʻOtuá. “ʻIlonga ha meʻa te mou fai, ngaue fie ngaue ki ai, he ko e ngaue [“kia Sihova,” NW], ʻo ʻikai ki he kakai.”​—Kolose 3:23.