LĒSONI 19
Ko Hai ʻa e Tamaioʻeiki Anga-Tonu mo Potó?
ʻOku mau maʻu ʻaonga kotoa mei heʻemau meʻakai fakalaumālié
Taimi nounou ki muʻa heʻene pekiá, naʻe talanoa fakaekinautolu ai ʻa Sīsū mo e toko fā ʻo ʻene kau ākongá—ko Pita, Sēmisi, Sione mo ʻAnitelū. ʻI hono tomuʻa tala ʻe Sīsū ʻa e fakaʻilonga ʻo ʻene ʻi heni ʻi he ngaahi ʻaho fakaʻosí, naʻá ne ʻohake ai ha fehuʻi mātuʻaki mahuʻinga: “Ko hai moʻoni koā ʻa e tamaioʻeiki anga-tonu mo potó ʻa ia kuo fakanofo ʻe heʻene ʻeikí ke ne tokangaʻi ʻa e kau sevāniti ʻi hono falé, ke ʻoange kiate kinautolu ʻa ʻenau meʻakaí ʻi he taimi totonu?” (Mātiu 24:3, 45; Maʻake 13:3, 4) Naʻe fakapapauʻi ange ʻe Sīsū ki heʻene kau ākongá ʻo pehē ʻi hono tuʻunga ko honau “ʻeikí,” te ne fakanofo ʻa e faʻahinga ko ia te nau tokonaki ha meʻakai fakalaumālie hokohoko maʻa hono kau muimuí lolotonga ʻa e taimi ʻo e ngataʻangá. Ko hai ʻe faʻuʻaki ʻa e tamaioʻeiki ko ení?
Ko ha kiʻi kulupu tokosiʻi ʻo e kau muimui pani ʻo Sīsū. Ko e “tamaioʻeiki” ʻoku fakafekauʻaki vāofi ia mo e Kulupu Pule ʻo e Kau Fakamoʻoni ʻa Sihová. ʻOkú ne tufaki ʻa e meʻakai fakalaumālie taimi totonu ki he kaungālotu kia Sihová. ʻOku mau falala ki he tamaioʻeiki anga-tonu ko ení ke nau hanganaki ʻomai ʻemau “tokonaki meʻakai feʻunga ʻi he taimi totonu.”—Luke 12:42.
ʻOkú ne tokangaʻi ʻa e fale ʻo e ʻOtuá. (1 Tīmote 3:15) Naʻe ʻoange ʻe Sīsū ki he tamaioʻeikí ʻa e fatongia mafatukituki ko hono tokangaʻi ʻa e ngāue ʻa e konga fakaemāmani ʻo e kautaha ʻa Sihová—ʻo tokangaʻi ʻa ʻene ngaahi koloa fakamatelié, tataki ʻa e ngāue fakamalangá, pea akoʻi kimautolu fakafou ʻi heʻemau ngaahi fakatahaʻangá. Ko ia ai, ke tokonaki mai ʻa e meʻa ʻoku mau fiemaʻú ʻi he taimi ʻoku mau fiemaʻu aí, ko e “tamaioʻeiki anga-tonu mo potó” ʻokú ne tufaki ʻa e meʻakai fakalaumālié fakafou ʻi he ʻū tohi ʻoku mau ngāueʻaki ʻi heʻemau ngāue fakafaifekaú, pehē foki ki he ngaahi polokalama ʻoku ʻomai ʻi heʻemau ngaahi fakatahá mo e ngaahi ʻasemipilií.
Ko e tamaioʻeikí ʻokú ne anga-tonu ki he ngaahi moʻoni Fakatohitapú pea ki he ngāue kuo tuku mai ki ai ko hono malangaʻi ʻa e ongoongo leleí, pea ʻokú ne poto ʻi he fekauʻaki mo e founga ʻokú ne tokangaʻi fakapotopoto ai ʻa e ngaahi meʻa ʻa Kalaisi ʻi he māmaní. (Ngāue 10:42) ʻOku tāpuakiʻi ʻe Sihova ʻa ʻene ngāué ʻaki ʻa e tupu pea mo e ngaahi tokonaki fakalaumālie hulu fau.—ʻAisea 60:22; 65:13.
Ko hai kuo fakanofo ʻe Sīsū ke ne fafangaʻi fakalaumālie ʻene kau ākongá?
ʻI he ngaahi founga fē ʻoku anga-tonu mo poto ai ʻa e tamaioʻeikí?