LĒSONI 2
Ko Hai ʻa e ʻOtuá?
1. Ko e hā ʻoku totonu ai ke tau lotu ki he ʻOtuá?
Ko e ʻOtua moʻoní ko e Tokotaha-Fakatupu ia ʻo e ngaahi meʻa kotoa pē. Naʻe ʻikai hano kamataʻanga pea ʻe ʻikai ʻaupito hano ngataʻanga. (Saame 90:2) Ko e Matavai ia ʻo e ongoongo lelei ʻoku maʻu ʻi he Tohi Tapú. (1 Tīmote 1:11) Koeʻuhi naʻe foaki mai ʻe he ʻOtuá kiate kitautolu ʻa e moʻuí, ʻoku totonu ke tau lotu kiate ia pē.—Lau ʻa e Fakahā 4:11.
2. ʻOku fēfē ʻa e ʻOtuá?
ʻOku ʻikai ha tangata kuo faifai ange peá ne mātā ʻa e ʻOtuá koeʻuhi ko ha Laumālie ia, ʻa ia ʻoku ʻuhingá ko iá ko ha faʻahinga tuʻunga ia ʻo e moʻuí ʻoku māʻolunga ange ʻi he ngaahi meʻamoʻui fakaesino ʻoku nau nofo ʻi he foʻi māmaní. (Sione 1:18; 4:24) Ka neongo ia, ʻoku lava ke tau lāuʻilo ki he ʻulungaanga ʻo e ʻOtuá mei he ngaahi meʻa kuó ne ngaohí. Hangē ko ení, ko e kehekehe ʻo e ngaahi fuaʻiʻakaú mo e ngaahi matalaʻiʻakaú ʻoku nau tala mai kiate kitautolu ʻa ʻene ʻofá mo hono potó. Ko e lahi ʻo e ʻunivēsí ʻokú ne tala mai kiate kitautolu ʻa hono mālohí.—Lau ʻa e Loma 1:20.
ʻOku lava ke tau ako ʻo toe lahi ange fekauʻaki mo e ʻulungaanga ʻo e ʻOtuá ʻi hono lau ʻa e Tohi Tapú. Ko e fakatātaá, ʻoku tala mai ai kiate kitautolu ʻa e meʻa ʻoku saiʻia ai ʻa e ʻOtuá mo e meʻa ʻoku ʻikai te ne saiʻia aí, anga ʻene tōʻongafai ki he kakaí, pea mo e anga ʻo ʻene fakafeangai ʻi he ngaahi tuʻunga kehekehe.—Lau ʻa e Saame 103:7-10.
3. ʻOku ʻi ai ha huafa ʻo e ʻOtuá?
Naʻe pehē ʻe Sīsū: “Ko ʻemau Tamai ʻoku ʻi hēvani, ke fakamāʻoniʻoniʻi ho huafá.” (Mātiu 6:9) Neongo ʻoku maʻu ʻe he ʻOtuá ha ngaahi hingoa fakalakanga lahi, ʻokú ne maʻu ʻa e huafa pē ʻe taha. ʻI he lea taki taha, ʻoku puʻaki kehekehe ai ia. ʻI he lea faka-Tongá, ʻoku māʻunga puʻaki ai ia ko e “Sihova.” Ka ʻoku puʻaki ia ʻe he kakai ʻe niʻihi ko e “Iāuē.”—Lau ʻa e Saame 83:18.
Kuo toʻo ʻa e huafa ia ʻo e ʻOtuá mei he ngaahi Tohi Tapu lahi pea fetongi ʻaki ia ʻa e ongo hingoa fakalakanga ko e ʻEiki pe ʻOtua. Ka ʻi he taimi naʻe hiki ai ʻa e Tohi Tapú, naʻe ʻi ai ʻa e huafa ʻo e ʻOtuá ʻo tuʻo 7,000 nai. Naʻe ʻai ʻe Sīsū ʻa e huafa ʻo e ʻOtuá ke ʻiloa ʻi he taimi naʻá ne akoʻi ai ʻa e kakaí ʻo fekauʻaki mo e ʻOtuá.—Lau ʻa e Sione 17:26.
Sio ʻi he vitiō ʻOku ʻi Ai ha Huafa ʻo e ʻOtuá?
4. ʻOku tokanga mai ʻa e ʻOtuá kiate kitautolu?
Hangē ko e tamai ʻofa ko ení, ʻoku ngāue ʻa e ʻOtuá ki ha lelei lele-lōloa maʻatautolu
Ko e mafolalahia ko ia ʻa e faingataʻá ʻoku ʻuhinga iá ko Sihová ko ha ʻOtua ʻoku ʻikai te ne tokanga mai kiate kitautolu? ʻOku taukaveʻi ʻe he kakai ʻe niʻihi ʻokú ne ʻai kitautolu ke tau faingataʻaʻiá ke ʻahiʻahiʻi kitautolu, ka ʻoku ʻikai ke moʻoni eni.—Lau ʻa e Sēmisi 1:13.
Kuo ʻoange ʻe he ʻOtuá ki he tangatá ʻa e ngeia ʻo e tauʻatāina ke fili. ʻIkai ʻoku tau houngaʻia ʻi heʻetau tauʻatāina ke fili ke tauhi ki he ʻOtuá? (Siosiua 24:15) Ka ʻoku fili ʻa e tokolahi ia ke fai ʻa e ngaahi meʻa ʻoku kovi ki he niʻihi kehé, ko ia ʻoku lahi fau ai ʻa e faingataʻá. ʻOku fakamamahi kia Sihova ʻene vakai mai ki he fakamaau taʻetotonu peheé.—Lau ʻa e Sēnesi 6:5, 6.
Ko Sihová ko ha ʻOtua ʻoku tokanga mai kiate kitautolu. ʻOkú ne fiemaʻu ke tau fiefia ʻi he moʻuí. ʻOku vavé ni ke ne toʻo ʻosi atu ʻa e faingataʻá mo e faʻahinga ʻoku nau fakatupunga iá. Lolotonga iá, ʻokú ne maʻu ʻa e ʻuhinga lelei ki hono fakaʻatā ʻa e faingataʻá ki ha taimi fakangatangata. ʻI he Lēsoni 8, te tau ako ai ki he ʻuhinga ko iá.—Lau ʻa e 2 Pita 2:9; 3:7, 13.
5. ʻE lava fēfē ke tau ʻunuʻunu ofi ange ki he ʻOtuá?
ʻOku fakaafeʻi mai kitautolu ʻe Sihova ke tau ʻunuʻunu ofi kiate ia ʻaki ʻetau lea kiate ia ʻi he lotu. ʻOkú ne mahuʻingaʻia ʻiate kitautolu tāutaha. (Saame 65:2; 145:18) ʻOkú ne loto-lelei ke fakamolemole. ʻOkú ne ʻafioʻi ʻa ʻetau ngaahi feinga ke fakahōifuaʻi iá, naʻa mo e ngaahi taimi ʻoku tau taʻelavameʻa aí. Ko ia neongo ʻetau taʻehaohaoá, ʻoku malava moʻoni ke tau maʻu ha vahaʻangatae vāofi mo e ʻOtuá.—Lau ʻa e Saame 103:12-14; Sēmisi 4:8.
Koeʻuhi kuo foaki mai ʻe Sihova kiate kitautolu ʻa e moʻuí, ʻoku totonu ke tau ʻofa ʻiate ia ʻo lahi ange ia ʻi heʻetau ʻofa ʻi ha toe taha kehe. (Maʻake 12:30) ʻI hoʻo fakahāhaaʻi ʻa hoʻo ʻofa ki he ʻOtuá ʻaki ʻa e ako lahi ange ʻo fekauʻaki mo ia pea fai ʻa e meʻa ko ia ʻokú ne fiemaʻu maí, te ke ʻunuʻunu ai pē ʻo toe ofi ange kiate ia.—Lau ʻa e 1 Tīmote 2:4; 1 Sione 5:3.