Ko e Hā ʻa e Puleʻanga ʻo e ʻOtuá?

1. Ko e hā ʻa e Puleʻanga ʻo e ʻOtuá?

Ko e Puleʻanga ʻo e ʻOtuá ko ha founga-pule fakahēvani ia. Te ne fetongi ʻa e ngaahi founga-pule kehe kotoa pē pea te ne ʻai ke fakahoko ʻa e finangalo ʻo e ʻOtuá ʻi hēvani pea ʻi he māmaní. Ko e ongoongo fekauʻaki mo e Puleʻanga ʻo e ʻOtuá ʻoku lelei. Kuo vavé ni ke hanga ʻe he Puleʻanga ʻo e ʻOtuá ʻo fakalato ʻa e fiemaʻu ʻa e tangatá ha founga-pule leleí. Te ne fakafāʻūtahaʻi ʻa e tokotaha kotoa ʻe nofo ʻi he māmaní.​—Lau ʻa e Taniela 2:44; Mātiu 6:9, 10; 24:14.

Ko ha puleʻanga kuo pau ke ʻi ai hano tuʻi. Kuo fakanofo ʻe Sihova ʻa hono ʻAló, ʻa Sīsū Kalaisi, ke hoko ko e Tuʻi ʻo Hono Puleʻangá.​—Lau ʻa e Fakahā 11:15.

Sio ʻi he vitiō Ko e Hā ʻa e Puleʻanga ʻo e ʻOtuá?

2. Ko e hā ko e Tuʻi lelei tahá ai ʻa Sīsuú?

Ko e ʻAlo ʻo e ʻOtuá ʻa e Tuʻi lelei tahá koeʻuhí ʻokú ne anga-ʻofa, pea ʻokú ne tuʻumaʻu ki he meʻa ʻoku totonú. (Mātiu 11:28-30) Pehē foki, ʻokú ne mālohi feʻunga ke tokoniʻi ʻa e kakaí koeʻuhí te ne pule mai mei hēvani ki he māmaní. ʻI he hili ʻene toetuʻú, naʻá ne ʻalu hake ki hēvani peá ne nofo hifo ʻo tatali ʻi he nima toʻomataʻu ʻo Sihová. (Hepelū 10:12, 13) Faai atu pē, naʻe ʻoange ʻe he ʻOtuá kiate ia ʻa e mafai ke ne kamata pule.​—Lau ʻa e Taniela 7:13, 14.

3. Ko hai ʻe pule fakataha mo Sīsuú?

Ko ha kulupu ʻoku ui ko e “kakai tapu” te nau pule fakataha mo Sīsū ʻi hēvani. (Taniela 7:27) Ko e ʻuluaki kakai tapu naʻe filí ko e kau ʻapositolo faitōnunga ʻa Sīsuú. Kuo hokohoko ʻo aʻu mai ki he taimí ni ʻa hono fili ʻe Sihova ʻa e kau tangata mo e kau fefine faitōnunga ke hoko ko ha kakai tapu. ʻI he hangē ko Sīsuú, ʻoku fokotuʻu hake kinautolu ʻi ha sino fakalaumālie.​—Lau ʻa e Sione 14:1-3; 1 Kolinitō 15:42-44.

Ko e toko fiha ʻa e kakai ʻoku ō ki hēvaní? Naʻe ui kinautolu ʻe Sīsū ko ha “fanga sipi tokosiʻi.” (Luke 12:32) ʻE faifai pē ʻo aʻu honau tokolahí ki he toko 144,000. Te nau pule fakataha mai mo Sīsū ki he māmaní.​—Lau ʻa e Fakahā 14:1.

4. Ko e hā naʻe hoko ʻi he kamata pule ʻa Sīsuú?

Naʻe kamata pule ʻa e Puleʻanga ʻo e ʻOtuá ʻi he 1914.a Ko e ʻuluaki ngāue ʻa Sīsū ʻi he tuʻunga ko e Tuʻí ko hono lī hifo ʻo Sētane mo ʻene fanga tēmenioó ki he māmaní. Naʻe hoko ʻa Sētane ʻo ʻita lahi pea kamata ke ne fakatupunga ʻa e faingataʻa ki he kotoa ʻo e māmaní. (Fakahā 12:7-10, 12) Talu mei ai mo e mātuʻaki fakalalahi ʻa e ʻoiauē ʻa e faʻahinga ʻo e tangatá. Ko e ngaahi taú, hongé, mahaki ʻoku tō maí, mo e ngaahi mofuiké ko e konga kotoa kinautolu ʻo ha “fakaʻilonga” ko e Puleʻangá kuo vavé ni ke ne puleʻi fakaʻaufuli ʻa e ngaahi meʻa ʻi he māmaní.​—Lau ʻa e Luke 21:7, 10, 11, 31.

5. Ko e hā ʻoku fakahoko ʻe he Puleʻanga ʻo e ʻOtuá?

Fakafou ʻi ha ngāue fakamalanga ʻi he foʻi kolopé, kuo ʻosi fakafāʻūtahaʻi ai ʻe he Puleʻanga ʻo e ʻOtuá ha fuʻu kakai tokolahi mei he ngaahi puleʻanga kotoa. ʻOku laui miliona ʻa e kakai anga-vaivai ʻoku pule mai kiate kinautolu ʻa Sīsū. ʻE maluʻi kinautolu ʻe he Puleʻanga ʻo e ʻOtuá ʻi he taimi te ne fakaʻauha ai ʻa e fokotuʻutuʻu fulikivanu lolotonga ʻo e ngaahi meʻa ʻi he māmaní. Ko ia ko e faʻahinga kotoa pē ʻoku nau loto ke nau maʻu ʻaonga mei he Puleʻanga ʻo e ʻOtuá ʻoku totonu ke nau ako ke nau hoko ko e faʻahinga talangofua ʻe pule mai ki ai ʻa Sīsū.​—Lau ʻa e Fakahā 7:9, 14, 16, 17.

ʻI he lolotonga ʻo ha vahaʻa taimi ko e taʻu ʻe 1,000, ʻe fakahoko ai ʻe he Puleʻangá ʻa e muʻaki taumuʻa ʻa e ʻOtuá ki he faʻahinga ʻo e tangatá. ʻE hoko ʻa e māmaní ko ha palataisi fakakātoa. Fakaʻosí, ʻe tuku atu ʻe Sīsū ʻa e Puleʻangá ki heʻene Tamaí. (1 Kolinitō 15:24-26) ʻOkú ke ʻilo ha taha ʻa ia te ke saiʻia ke talanoa ki ai ʻo fekauʻaki mo e Puleʻanga ʻo e ʻOtuá?​—Lau ʻa e Saame 37:10, 11, 29.