Ko e Hā ʻOku Fakaʻatā Ai ʻe he ʻOtuá ʻa e Koví mo e Faingataʻá?

1. Naʻe anga-fēfē ʻa e kamata ʻa e koví?

Naʻe kamata ʻa e koví ʻi he māmaní ʻi he taimi naʻe fai ai ʻe Sētane ʻa e fuofua loí. Naʻe ʻuluaki hoko ʻa Sētane ko ha ʻāngelo haohaoa, ka “naʻe ʻikai te ne tuʻu maʻu ʻi he moʻoní.” (Sione 8:44) Naʻá ne fakatupu ha holi ke fai ange ʻa e lotu ʻa ē ʻoku totonu ke fai ki he ʻOtuá toko taha peé. Naʻe loi ʻa Sētane ki he ʻuluaki fefiné, kia ʻIvi, pea fakalotoʻi ia ke talangofua ange kiate ia kae ʻikai ki he ʻOtuá. Naʻe kau fakataha ʻa ʻĀtama mo ʻIvi ʻi he talangataʻa ki he ʻOtuá. Naʻe iku ʻa e fili ʻa ʻĀtamá ki he faingataʻaʻia mo e mate.​—Lau ʻa e Sēnesi 3:1-6, 19.

ʻI he taimi naʻe fokotuʻu ange ai ʻe Sētane kia ʻIvi ke talangataʻa ki he ʻOtuá, naʻá ne kamata ai ha angatuʻu ki he tuʻunga-hau ʻo e ʻOtuá, pe ki he tuʻunga ko e Fungani Māʻolungá. Ko e konga lahi ʻo e faʻahinga ʻo e tangatá kuo nau kau mo Sētane ʻi hono siʻaki ʻa e ʻOtuá ko honau Pulé. Ko ia, kuo hoko ai ʻa Sētane ko e “pule ʻo e māmaní.”​—Lau ʻa e Sione 14:30; 1 Sione 5:19.

2. Naʻe mele ʻa e fakatupu ʻa e ʻOtuá?

ʻOku haohaoa ʻa e ngaahi ngāue kotoa ʻa e ʻOtuá. Ko e faʻahinga ʻo e tangatá mo e kau ʻāngeló ʻa ia naʻe fakatupu ʻe he ʻOtuá naʻe malava ke nau talangofua haohaoa ki he ʻOtuá. (Teutalōnome 32:4, 5) Naʻe fakatupu ʻe he ʻOtuá kitautolu fakataha mo e tauʻatāina ke fili ʻi hono fai ʻa e meʻa ʻoku leleí mo hono fai ʻa e meʻa ʻoku koví. ʻOku ʻomi ʻe he tauʻatāina ko iá kiate kitautolu ha faingamālie ke fakahāhaaʻi ai ʻetau ʻofa ki he ʻOtuá.​—Lau ʻa e Sēmisi 1:13-15; 1 Sione 5:3.

3. Ko e hā kuo fakaʻatā ai ʻe he ʻOtuá ʻa e faingataʻá ʻo aʻu mai ki he taimi ní?

Kuo fakaʻatā ʻe Sihova ʻa e angatuʻu ki hono tuʻunga-haú ki ha foʻi taimi fakangatangata. Ko e hā hono ʻuhingá? Ke fakahaaʻi heʻikai ʻaonga ki he kakaí ha feinga ke pule taʻekau ai ia. (Tangata Malanga 7:29; 8:9) ʻI he hili ʻa e taʻu ʻe 6,000 ʻo e hisitōlia ʻo e tangatá, ʻoku hā mahino ʻa e fakamoʻoní. Kuo ʻikai malava ʻe he kau pule fakaetangatá ke toʻo atu ʻa e taú, faihiá, fakamaau taʻetotonú, pe mahamahakí.​—Lau ʻa e Selemaia 10:23; Loma 9:17.

ʻI he kehe mei he tuʻunga-pule fakaetangatá, ʻoku ʻaonga ʻa e pule ia ʻa e ʻOtuá ki he faʻahinga ko ia ʻoku nau tali iá. (ʻAisea 48:17, 18) Kuo vavé ni, ke ʻomi ʻe Sihova ha ngataʻanga ki he founga-pule fakaetangata kotoa pē. Ko e kakai pē ko ia ʻoku nau fili ke pule mai ki ai ʻa e ʻOtuá te nau nofoʻi ʻa e māmaní.—ʻAisea 11:9.​—Lau ʻa e Taniela 2:44.

Sio ʻi he vitiō Ko e Hā ʻOku Fakaʻatā Ai ʻe he ʻOtuá ʻa e Faingataʻá?

4. Ko e hā ʻoku hanga ʻe he kātaki ʻa e ʻOtuá ʻo fakaʻatā kitautolu ke tau faí?

Naʻe taukaveʻi ʻe Sētane heʻikai ha taha te ne tauhi kia Sihova ʻaki ha ʻofa taʻesiokita. Te ke saiʻia ke ke fakahalaki ʻa e loi ko iá? Te ke lava! ʻOku hanga ʻe he kātaki ʻa e ʻOtuá ʻo fakaʻatā kitautolu kotoa ke tau fakahaaʻi pe ʻoku tau saiʻia ʻi he pule ʻa e ʻOtuá pe ko e pule ʻa e tangatá. ʻOku tau fakahaaʻi ʻetau filí ʻi he founga ʻoku tau moʻui aí.​—Lau ʻa e Siope 1:8-12; Palōveepi 27:11.

5. ʻE lava fēfē ke tau fili ʻa e ʻOtuá ko hotau Pule?

ʻE lava ke tau fili ʻa e ʻOtuá ko hotau Pule ʻaki ʻetau kumi pea tōʻongaʻaki ʻa e lotu moʻoní ʻo makatuʻunga ʻi he Folofola ʻa e ʻOtuá, ko e Tohi Tapú. (Sione 4:23) ʻE lava ke tau siʻaki ʻa Sētane ʻi he tuʻunga ko hotau pulé ʻaki ʻetau fakamamaʻo mei he ngaahi meʻa fakapolitikalé mo e taú, ʻo hangē ko ia naʻe fai ʻe Sīsuú.​—Lau ʻa e Sione 17:14.

ʻOku ngāueʻaki ʻe Sētane hono mālohí ke pouaki ʻa e ngaahi tōʻonga taʻetāú mo fakatupu maumaú. ʻI he taimi ʻoku tau talitekeʻi ai ʻa e ngaahi tōʻonga peheé, ʻe lumaʻi nai pe fakafepakiʻi kitautolu ʻe he ngaahi kaumeʻa mo e ngaahi kāinga ʻe niʻihi. (1 Pita 4:3, 4) Ko ia ʻoku tau fehangahangai mo ha fili ke fai. Te tau feohi mo e kakai ʻoku nau ʻofa ʻi he ʻOtuá? Te tau talangofua ki heʻene ngaahi lao fakapotopoto mo anga-ʻofá? Kapau te tau fai pehē, ʻoku tau fakamoʻoniʻi ai naʻe loi ʻa Sētane ʻi heʻene taukaveʻi ko ia ʻo pehē ʻi he tofanga ʻi he faingataʻá heʻikai ha taha ia te ne fai ki he meʻa ʻoku folofola mai ʻaki ʻe he ʻOtuá.​—Lau ʻa e 1 Kolinitō 6:9, 10; 15:33.

ʻOku fakapapauʻi mai ʻe he ʻofa ʻa e ʻOtuá ki he faʻahinga ʻo e tangatá ʻe ngata ʻa e koví mo e faingataʻá. Ko e faʻahinga ko ia ʻoku nau fakahāhaaʻi ʻoku nau tui ki he meʻá ni te nau fiefia ʻi he moʻui ʻi he māmaní ʻo taʻengata.​—Lau ʻa e Sione 3:16.