Founga ke Fakaleleiʻi Ai ʻa e Palopalemá

ʻI he kamata ke ke nofo fakataha mo ho hoá, ʻe malanga hake ha ngaahi palopalema kehekehe. ʻOku hoko nai eni koeʻuhí ko e kehekehe ʻa e anga hoʻomo ngaahi fakakaukaú, ongoʻí, mo e ngaahi hokosia ʻi he moʻuí. Pe ko e palopalemá ʻoku haʻu nai mei ha feituʻu kehe pe hoko taʻeʻamanekina.

ʻOku lava ke hoko ko e ʻahiʻahi ke fakaʻehiʻehi mei he moʻoni ʻo e meʻa ko iá, ka ʻoku akonaki mai ʻa e Tohi Tapú kiate kitautolu ke tau fehangahangai mo ʻetau ngaahi palopalemá. (Mātiu 5:23, 24) Te ke ʻilo ai ko hono ngāueʻaki ʻo e ngaahi tefitoʻi moʻoni ʻi he Tohi Tapú ʻa e fakaleleiʻanga lelei taha ki hoʻo ngaahi palopalemá.

1 TALANOAʻI ʻA E PALOPALEMÁ

MEʻA ʻOKU LEAʻAKI ʻE HE TOHI TAPÚ: “ʻOku ai hano . . . ʻaho ke lea” (Koheleti 3:1, 7) Fakapapauʻi ʻokú ke vaheʻi ha taimi ke talanoa ai ki he palopalemá. Fakahaaʻi faitotonu ke ʻilo ʻe ho hoá ʻa e anga hoʻo ongoʻi mo e fakakaukau ki he meʻa ʻoku fai ki ai ʻa e talanoá. “Lea moʻoni” maʻu pē ki ho hoá. (ʻEfesō 4:25) Naʻa mo e taimi te ke ongoʻi tōlili aí, fakaʻehiʻehi mei he fakatupu kē. Ko e tali maluú ʻoku lava ke ne tauhi maʻu ha fetalanoaʻaki lelei mei haʻane fakalalahi ʻo aʻu ki ha feʻohofaki.—Palōveepi 15:4; 26:20.

Neongo kapau ʻoku ʻikai te ke loto-tatau mo ia, anga-ʻofa ai pē ʻo ʻoua ʻaupito ʻe ngalo ke ke fakahāhā ʻa e ʻofa mo e fakaʻapaʻapa ki ho hoá. (Kolose 4:6) Feinga ke fakaleleiʻi ʻa e palopalemá ʻi he faingamālie vave tahá, pea ʻoua ʻe taʻofi ʻa e fetuʻutakí.—ʻEfesō 4:26.

MEʻA ʻE LAVA KE KE FAÍ:

• Vaheʻi ha taimi feʻungamālie ke talanoaʻi ai ʻa e palopalemá

• ʻI he aʻu ki he taimi ke ke fanongo aí, fakaʻehiʻehi mei he holi ke fakaheleleuʻi iá. ʻE toki ʻi ai pē ho taimi ke ke lea ai

2 FANONGO MO MAHINOʻI

MEʻA ʻOKU LEAʻAKI ʻE HE TOHI TAPÚ: “Mou maʻu ʻa e femanavaʻofaʻaki loloto. ʻI he fakahāhā ʻo e fefakaʻapaʻapaʻakí, mou takimuʻa ai.” (Loma 12:10) Ko e anga ʻo hoʻo fanongó ʻoku mahuʻinga ʻaupito. Feinga ke mahinoʻi ʻa e anga ʻo e fakakaukau ho hoá fakataha mo e “fakahāhā ʻa e kaungāongoʻi . . . mo e anga-fakatōkilalo.” (1 Pita 3:8; Sēmisi 1:19) ʻOua ʻe fakangalingali pē ʻokú ke fanongó. Kapau ʻoku malava, kiʻi taʻofi ʻa e ngāue ʻokú ke faí pea tuku taha hoʻo tokangá ki ho hoá, pe kole kiate ia pe ʻe lava ke mo toki talanoa ki ai ʻamui ange. Kapau ʻokú ke fakakaukau ki ho hoa malí ko ho kaungāngāue kae ʻikai ko ho tokotaha fakafepakí ia, heʻikai leva “ʻoho ho loto ke ʻita.”—Koheleti 7:9.

MEʻA ʻE LAVA KE KE FAÍ:

• Hanganaki fanongo fakataha mo e fakakaukau lelei, neongo kapau ʻoku ʻikai te ke saiʻia he meʻa ʻokú ke fanongo ki aí

• Fanongo ki he ʻuhinga ʻo e meʻa ʻoku leaʻaki ʻe ho hoá. Fakatokangaʻi ʻa e ngaue ʻo hono sinó mo e anga ʻo e tō hono leʻó

3 FAKAHOKO IA

MEʻA ʻOKU LEAʻAKI ʻE HE TOHI TAPÚ: “ʻI he fakaongosia kotoa ʻoku ai hano fua: Ka ko e lau ʻa e ngutu, ʻoku iku pe ki he fakamasiva.” (Palōveepi 14:23) Ko e felotoi ki ha fakaleleiʻanga ʻoku ʻikai feʻunga pē ia. ʻOku fiemaʻu ke mo fakahoko ʻa e meʻa kuó mo fili ki aí. ʻOku kau ki ai heni ʻa e ngāue mālohi mo e feinga lahi, ka ʻoku tuha pē ia. (Palōveepi 10:4) Kapau te mo ngāue fakataha ko e ongo kaungāngāue, te mo maʻu ai ha “totongi lelei” ki hoʻomo ngāue mālohí.—Koheleti 4:9.

MEʻA ʻE LAVA KE KE FAÍ:

• Fili ha ngaahi founga ʻaonga ʻe lava ke mo fakatou fai ke fakaleleiʻi ai hoʻomo palopalemá

• Sivisiviʻi angé hoʻomo fakalakalaká mei he taimi ki he taimi