Founga Hono Tokangaʻi ʻo e Paʻangá

ʻOku tau fiemaʻu kotoa ʻa e paʻangá ke fakatau mai ʻa e ngaahi meʻa ʻoku fiemaʻu ʻe hotau ngaahi fāmilí. (Palōveepi 30:8) Ko e moʻoni, “ko e paʻanga ko e maluʻanga.” (Koheleti 7:12) ʻI he tuʻunga ko e ongo meʻa mali, ʻe faingataʻa nai ke talanoa fekauʻaki mo e paʻangá, kae ʻoua ʻe ʻai ʻa e paʻangá ke ne fakatupunga ha ngaahi palopalema ʻi hoʻomo nofo malí. (ʻEfesō 4:32) ʻOku totonu ki ha ongo meʻa mali ke na fefalalaʻaki mo ngāue fakataha ʻi he taimi ʻokú na fili ai ki he founga ke fakamole ki ai ʻena paʻangá.

1 PALANI FAKALELEI

MEʻA ʻOKU LEAʻAKI ʻE HE TOHI TAPÚ: “Ko hai ia ʻiate kimoutolu ʻokú ne loto ke langa ha taua te ne taʻetomuʻa tangutu hifo ʻo fikaʻi ʻa e fakamolé ke sio pe ʻokú ne maʻu ha meʻa feʻunga ke fakakakatoʻaki ia?” (Luke 14:28) ʻOku mātuʻaki mahuʻinga ke mo palani fakataha ki he founga te mo ngāueʻaki ki ai hoʻomo paʻangá. (ʻĒmosi 3:3) Fakapapauʻi ʻa e meʻa ʻokú mo fiemaʻu ke fakatau maí pehē ki he lahi ʻo e paʻanga te mo lava ʻo fakamole ki aí. (Palōveepi 31:16) Neongo ʻokú mo maʻu ʻa e paʻanga ke fakatau mai ha ngaahi meʻa, ʻoku ʻikai ʻuhinga ia ʻoku totonu ke mo fakatau mai ʻa e ngaahi meʻa ko iá. Feinga ke fakaʻehiʻehi mei he fakamoʻuá. Ngāueʻaki pē ʻa e paʻanga ʻokú mo maʻú.—Palōveepi 21:5; 22:7.

MEʻA ʻE LAVA KE KE FAÍ:

• Kapau ʻoku kei toe pē hoʻomo paʻangá ʻi he aʻu ki he fakaʻosinga ʻo e māhiná, mo talanoa fakataha ki he founga te mo ngāueʻaki ki aí

• Kapau ʻoku ʻi ai ha nounou fakapaʻanga, fai ha ngaahi palani papau ke fakasiʻisiʻi ai hoʻomo ngaahi fakamolé. Ko e fakatātaá, ʻe lava pē ke mo ngaohi hoʻomo meʻakaí kae ʻikai ko e ʻalu ki he falekaí

2 FAITOTONU MO FAKAKAUKAU FAKAPOTOPOTO

MEʻA ʻOKU LEAʻAKI ʻE HE TOHI TAPÚ: “Tokangaʻi ʻa e meʻa kotoa pē ʻi he faitotonu, ʻo ʻikai ngata pē ʻi he vakai mai ʻa Sihová, kae pehē foki ʻi he vakai mai ʻa e tangatá.” (2 Kolinitō 8:21) Hoko ʻo faitotonu ki ho hoá fekauʻaki mo e lahi ʻo e paʻanga ʻokú ke maʻú mo e lahi hoʻo fakamolé.

Talanoa maʻu pē mo ho hoá ʻi he taimi ʻokú ke fai ai ha ngaahi fili mahuʻinga fekauʻaki mo haʻo ngaahi meʻa fakapaʻanga. (Palōveepi 13:10) Ko e fetalanoaʻaki ʻo fekauʻaki mo e paʻangá ʻe tokoni ia ke tauhi maʻu ʻa e melinó ʻi hoʻomo nofo malí. ʻOua te ke vakai ki hoʻo paʻanga hū maí ko hoʻo paʻanga, ka ko e paʻanga ʻa e fāmilí.—1 Tīmote 5:8.

MEʻA ʻE LAVA KE KE FAÍ:

• Mo felotoi ki he lahi ʻo e paʻanga ʻe lava ke mo taki taha fakamole ki ai pea ʻe ʻikai leva fuʻu fiemaʻu ke ke toe ʻeke ʻa e fakamole ho hoá

• ʻOua ʻe tatali ke toki hoko ha palopalema pea toki talanoa ai fekauʻaki mo e paʻangá