Ngaahi Fokotuʻutuʻu ki he Ngaahi Feituʻu Faiʻanga Lotú

ʻOKU fekauʻi ʻa e kau lotu moʻoni ʻa Sihová ke nau fakatahataha fakataha ke maʻu ʻa e fakahinohino mo e fefakalototoʻaʻaki. (Hep. 10:23-25) Ko e ʻuluaki feituʻu faiʻanga lotu ki he kakai fili ʻa e ʻOtuá, ʻa e kau ʻIsilelí, ko e “tāpanekalé, ʻa e tēniti feʻiloakiʻangá.” (ʻEki. 39:32, 40) Ki mui ai, naʻe langa ʻe he foha ʻo Tēvita ko Solomoné ha fale, pe temipale, maʻá e lāngilangi ʻo e ʻOtuá. (1 Tuʻi 9:3) Hili hono fakaʻauha ʻo e temipale ko iá ʻi he 607 K.M., naʻe fokotuʻutuʻu ʻe he kau Siú ke nau fakataha ʻi he ngaahi fale naʻe ui ko e ngaahi sinakoke ke nau lotu ai ki he ʻOtuá. Naʻe faifai pē ʻo toe langa ʻa e temipalé, pea naʻe toe hoko ia ko ha senitā ʻo e lotu moʻoní. Naʻe faiako ʻa Sīsū fakatouʻosi ʻi he ngaahi sinakoké pea ʻi he temipalé. (Luke 4:16; Sione 18:20) Naʻe aʻu ʻo fai ʻe Sīsū ʻa e fakataha ʻi ha moʻunga.—Māt. 5:1–7:29.

² Hili ʻa e pekia ʻa Sīsuú, naʻe fakatahataha ʻa e kau Kalisitiané ʻi he ngaahi feituʻu fakapuleʻangá pea ʻi he ngaahi ʻapi tāutahá ke ako ʻa e Folofolá pea fiefia ʻi he feohi mo e kaungātuí. (Ngā. 19:8, 9; Loma 16:3, 5; Kol. 4:15; Flm. 2) ʻI he taimi ʻe niʻihi naʻe fiemaʻu ai ki he muʻaki kau Kalisitiané ke nau fakataha ʻi he ngaahi feituʻu tuʻu mavahe, ke hao ai mei hono ʻiloʻi ʻe he kau fakatangá. Ko e moʻoni, ko e kau sevāniti faitōnunga ʻa e ʻOtuá ʻi he kuohilí naʻa nau maʻu ha holi loto-moʻoni ke fakatahataha ʻi he ngaahi feituʻu faiʻanga lotú koeʻuhi ke nau hoko ai ʻo “akoʻi ʻe Sihova.”—ʻAi. 54:13.

³ ʻI he ʻahó ni foki, ʻoku ngāueʻaki ʻa e ngaahi ʻapi tāutahá mo e ngaahi feituʻu fakapuleʻangá ki he ngaahi fakataha faka-Kalisitiané. ʻOku faʻa ngāueʻaki ʻa e ngaahi ʻapi tāutahá ke fakataha ai ki he ngāue fakamalangá. Ko e faʻahinga ʻoku nau fakafaingamālieʻi honau ʻapí ki he ngaahi fakatahataha peheé, ʻoku nau vakai ki he meʻá ni ko ha monū. ʻOku ongoʻi ʻe he tokolahi kuo nau maʻu ʻaonga fakalaumālie ʻi hono fakaʻatā honau ʻapí ʻi he founga ko ení.

FALE FAKATAHAʻANGA

⁴ Ko e feituʻu faiʻanga fakataha tefito ʻo e Kau Fakamoʻoni ʻa Sihová ko e Fale Fakatahaʻangá. ʻI he anga-mahení, ʻoku fakatau mai ha konga kelekele ʻo langa ai ha Fale Fakatahaʻanga foʻou pe fakaleleiʻi pē ha fale kuo ʻosi tuʻu ai. Koeʻuhí ke fakasiʻisiʻi ʻa e fakamolé pea ngāueʻaongaʻaki hotau ngaahi falé, ʻoku malava nai ʻa e ngaahi fakatahaʻanga kehekehe ke nau ngāueʻaki ha Fale Fakatahaʻanga ʻe taha ʻo ka malava. ʻI he ngaahi feituʻu ʻe niʻihi, ʻoku fiemaʻu ke totongi ha holo. Ko e ngaahi Fale Fakatahaʻanga foʻou mo e ngaahi Fale Fakatahaʻanga ko ia kuo lahi ʻa hono fakaleleiʻí, ʻoku feʻungamālie ke fai ha polokalama fakatapui. Kae kehe, kapau ʻoku siʻisiʻi pē ʻa e ngaahi fakaleleiʻi ʻoku fai ki ha Fale Fakatahaʻanga, ʻoku ʻikai fiemaʻu ke fai ha polokalama fakatapui.

⁵ Ko e Fale Fakatahaʻangá ʻoku ʻikai totonu ko ha fale ʻoku teuʻi tōtuʻa ke maongo ki he niʻihi kehé. Neongo ʻe kehekehe nai ʻa e tisainí ʻi he feituʻu ki he feituʻu, ʻoku fakataumuʻa maʻu pē ki he meʻa ʻe fai aí. (Ngā. 17:24) Fakatatau ki he ngaahi tuʻunga fakalotofonuá, ʻoku totonu ke hoko ia ko ha feituʻu fakafiemālie mo feʻungamālie ke fakahoko ai ʻa e ngaahi fakataha faka-Kalisitiané.

⁶ Ko e ngaahi fakatahaʻanga kotoa ʻa e Kau Fakamoʻoni ʻa Sihová ʻoku nau tokoni fakapaʻanga ki hono ngāueʻaki, tauhi mo monomono ʻa e Fale Fakatahaʻanga ko ia ʻoku vaheʻi ke nau ngāueʻakí. ʻOku ʻikai ke fai ai ha tānaki paʻanga mo ha kole paʻanga. ʻOku ʻosi ʻi ai ha puha līʻanga meʻaʻofa koeʻuhí ko e faʻahinga ʻoku nau maʻu ʻa e ngaahi fakatahá te nau tokoni nai ki he ngaahi fakamole ʻoku fiemaʻú ʻi he fekauʻaki mo hono ngāueʻaki ʻa e holó. ʻOku nau fai loto-lelei ia pea mei honau lotó.—2 Kol. 9:7.

⁷ Ko e tokotaha kotoa ʻi he fakatahaʻangá ʻoku nau fakakaukau atu ko ha monū ia ke tokoniʻi fakapaʻanga ʻa e Fale Fakatahaʻangá pea ke pole ki he ngaahi ngāue ʻi hono tauhi ia ke maʻa mo ʻi ha tuʻunga lelei. ʻOku faʻa vaheʻi ha mātuʻa pe ko ha sevāniti fakafaifekau ke fakataimitēpileʻi ʻa e ngāue ko ení. ʻI he fakalūkufuá, ko e fakamaʻá ʻoku tokangaʻi ia ʻe he ngaahi kulupu ngāue fakamalangá, ʻo takimuʻa ai ʻa e ʻovasia kulupú pe ko hono tokoní. Fakatouʻosi ʻa loto mo tuʻa ʻo e Fale Fakatahaʻangá, ʻoku totonu ke ne fakafofongaʻi lelei atu ai ʻa Sihova mo ʻene kautahá.

⁸ Kapau ʻoku fakataha ha fakatahaʻanga laka hake he tahá ʻi ha fale tatau, ko e kau mātuʻa ʻo e ngaahi fakatahaʻanga ʻoku kau ki aí te nau fokotuʻu ha Kōmiti Tokangaʻi Fale Fakatahaʻanga, ʻa ia te nau tokangaʻi ʻa e ngaahi meʻa fekauʻaki mo e falé mo e konga ʻapí. ʻOku fili ʻe he kulupu ʻo e kau mātuʻá ha tokoua ke sea. ʻI he ngāue he malumalu ʻo e tataki ʻa e ngaahi kulupu ʻo e kau mātuʻá, ʻoku vakaiʻi maʻu pē ʻe he kōmiti tokangaʻí ʻa hono fakamaʻa ʻo e falé, ʻo fakapapauʻi ʻoku tauhi ʻa e falé ʻi he tuʻunga lelei pea ʻoku ala maʻu ai ʻa e ngaahi tokonaki feʻunga ʻo e meʻa ʻoku fiemaʻu ki aí. ʻOku fiemaʻu heni ke fengāueʻaki vāofi ʻa e ngaahi fakatahaʻanga ʻoku kau ki aí.

⁹ ʻI he taimi ʻoku ngāueʻaki ai ʻe ha ngaahi fakatahaʻanga ʻa e Fale Fakatahaʻanga tatau, ko e taimi-tēpile ʻo e ngaahi taimi fakatahá ʻe fetongitongi nai. ʻE fokotuʻutuʻu ʻe he kau mātuʻá ʻa e taimi-tēpile ko ení ʻi ha laumālie ʻo e fetokangaʻaki mo e ʻofa fakatokoua. (Fil. 2:2-4; 1 Pita 3:8) ʻE ʻikai fai ʻe ha fakatahaʻanga ha ngaahi fili ʻiate ia pē maʻá e ngaahi fakatahaʻanga kehé. ʻI he taimi ʻoku ʻaʻahi ai ʻa e ʻovasia sēketí ki he taha ʻo e ngaahi fakatahaʻanga ʻoku nau ngāueʻaki ʻa e Fale Fakatahaʻangá, ko e ngaahi fakatahaʻanga kehé te nau feʻunuʻaki ʻenau ngaahi taimi fakatahá ʻo fakatatau ki he fiemaʻu ʻo e uike ko iá.

¹⁰ Ko e Fale Fakatahaʻangá ʻe lava ke ngāueʻaki ia ki ha malangaʻi ʻo ha mali pe putu ʻi hano fakangofua ʻe he Kōmiti Ngāue ʻa e Fakatahaʻangá. ʻOku vakaiʻi fakalelei ʻa e kole taki taha ʻe he kau mātuʻa ko ení pea fakatuʻunga ʻenau filí ʻi he tataki ʻoku ʻomai ʻe he ʻōfisi vaʻá.

¹¹ Ko e faʻahinga ʻoku fakaʻatā ke nau ngāueʻaki ʻa e Fale Fakatahaʻangá ki he ngaahi taumuʻa ko iá ʻoku ʻamanekina ke nau fai ha tōʻonga ʻoku tuha mo e kau Kalisitiane moʻoní. Heʻikai fai ha meʻa ʻi he Fale Fakatahaʻangá ʻe fakatupu loto-mamahi ki he fakatahaʻangá pe ʻomai ai ha luma kia Sihova mo e ongoongo lelei ʻo e fakatahaʻangá. (Fil. 2:14, 15) ʻI he malumalu ʻo e tataki ʻa e ʻōfisi vaʻá, ʻe ngāueʻaki nai ʻa e Fale Fakatahaʻangá ki ha ngaahi ngāue fakalaumālie kehe, hangē ko e Ako Fakafaifekau ʻo e Puleʻangá mo e Ako Ngāue Tāimuʻá.

¹² Ko e fakatahaʻangá te nau fakaʻapaʻapaʻi maʻu pē honau feituʻu faiʻanga fakatahá. Ko e valá, teuteú mo e ʻulungāngá ʻoku totonu ke tapua atu ai ʻa e tuʻunga ngeia ʻoku ō fakataha mo e lotu kia Sihová. (Tml. 5:1; 1 Tīm. 2:9, 10) Ko hono ngāueʻaki ʻa e akonaki ko ení, ʻoku tau fakahaaʻi ai ʻa e houngaʻia ki heʻetau ngaahi fakataha faka-Kalisitiané.

¹³ Ko hono tauhi maʻu ʻa e maau ʻi he lolotonga ʻa e ngaahi fakatahá ʻoku mahuʻinga. ʻOku fokotuʻu atu ke tangutu fakataha ʻa e ngaahi mātuʻá mo ʻenau fānaú. ʻOku fakalototoʻaʻi atu ʻa e ngaahi mātuʻa ʻoku ʻi ai ʻenau fānau īkí ke nau tangutu ʻi ha feituʻu ʻe siʻi ange ai ʻenau fakahohaʻá kapau ʻe fiemaʻu ke ʻave ʻa e fānaú ki tuʻa ʻo akonekina kinautolu pe ko ha toe fiemaʻu kehe.

¹⁴ ʻOku vaheʻi ʻa e fanga tokoua tāú ke nau ngāue ko e kau fakanofonofo ʻi he ngaahi fakataha ʻi he Fale Fakatahaʻangá. ʻOku totonu ke nau tokanga mo anga-fakakaumeʻa pea ngāueʻaki ʻa e fakafuofua lelei. Ko honau ngaahi fatongiá ʻoku kau ai ʻa e fakafeʻiloaki ki he kau haʻu foʻoú mo hono ʻai ke nau ongoʻi ʻoku talitali lelei kinautolu, tokoniʻi ʻa e kau tōmuí ke maʻu hanau nofoʻanga, hiki ʻa e tokolahi ʻo e kau maʻu fakatahá, pea fiemaʻu ke nau tokanga ki he mokomoko mo e vilo lelei ʻa e ʻeá ʻi he Fale Fakatahaʻangá. ʻO ka fiemaʻu, ʻe fakamanatu ʻe he kau fakanofonofó ki he ngaahi mātuʻá ke tokangaʻi lelei ʻenau fānaú ke ʻoua te nau lele takai holo ki muʻa mo e hili ʻa e ngaahi fakatahá pe vaʻinga ʻi he peletifōmú. ʻI ha founga anga-ʻofa mo fakapotopoto, ʻe kole nai ʻe ha taha fakanofonofo ki he mātuʻa ʻo ha kiʻi tama pauʻu ke ʻave ia ki tuʻa, koeʻuhi ke ʻoua ʻe fuʻu fakahohaʻasi ʻa e kau fanongó. Ko e ngāue ʻa e kau fakanofonofó ʻoku tokoni lahi ki he fiefia ʻa e tokotaha kotoa ʻi he ngaahi fakatahá. ʻOku lelei ange ke ngāueʻaki ʻa e kau mātuʻa mo e kau sevāniti fakafaifekaú ki he fakanofonofó.

LANGA FALE FAKATAHAʻANGA

¹⁵ ʻI he ʻuluaki senitulí, naʻe ʻi ai ʻa e kau Kalisitiane ʻe niʻihi naʻa nau tuʻumālie ange ʻi he niʻihi, ko ia naʻe tohi ai ʻe he ʻapositolo ko Paulá: “Fakafou ʻi ha vahevahe tatau, ʻoku hoko ai hoʻomou ngaahi meʻa ʻoku hulu atu ʻi he taimi ní ʻo fakalatoʻaki ʻenau fiemaʻú, koeʻuhi ke haʻu foki ʻenau ngaahi meʻa ʻoku hulu atú ʻo fakalatoʻaki ʻa hoʻomou fusimoʻomó, ke hoko ai ha vahevahe tatau.” (2 Kol. 8:14) ʻI he ʻahó ni, ʻoku fakahoko ai ha “vahevahe tatau.” Ko e ngaahi tokoni fakapaʻanga ʻoku foaki ʻe he ngaahi fakatahaʻanga ʻi māmani lahí ʻoku vahevahe ia ke tokoni fakapaʻanga ki hono langa mo fakaleleiʻi ʻa e ngaahi Fale Fakatahaʻangá. Ko e poupou nima-homo ʻa e fetokouaʻaki ʻi māmani lahí ʻoku fakahoungaʻi lahi ia ʻe he kautahá mo e ngaahi fakatahaʻanga ʻoku nau maʻu ʻaonga mei he ngaahi tokoni ko ení.

¹⁶ Fakatuʻunga ʻi ha palani fakafeituʻu, ʻoku vaheʻi ʻe he ʻōfisi vaʻá ʻa e ngaahi fakatahaʻanga ki ha ngaahi Fale Fakatahaʻanga pau. ʻOku toe fakapapauʻi ʻe he ʻōfisi vaʻá ʻa e taimi mo e feituʻu ke langa mo fakaleleiʻi ha ngaahi Fale Fakatahaʻanga ʻi he feituʻu ʻo e vaʻá. ʻI he taimi ʻoku hoko ai ʻa e ngaahi fakatamakí, ʻoku fai ʻa e ngaahi fokotuʻutuʻu ki he ngaahi fiemaʻu ke monomono ʻa e ngaahi Fale Fakatahaʻanga ʻoku maumaú, pea ʻi he ngaahi taimi ʻe niʻihi, ki he ngaahi ʻapi ʻo e fanga tokouá.

¹⁷ ʻOku fokotuʻutuʻu ʻe he ʻōfisi vaʻá ke ngāueʻaki ʻa e kau ngāue pole ke tokoni ki hono fakatau mai ʻa e konga kelekelé, palani ʻo e Fale Fakatahaʻangá, ngofua ki he langá, langá, mo hono tauhí. Koeʻuhi ko e fiemaʻu lahi ki ha ngaahi Fale Fakatahaʻanga ʻi he lahi taha ʻo e ngaahi fonuá, ʻoku fiemaʻu ʻa e kau ngāue pole tokolahi. Ko e kau malanga ʻosi papitaiso kotoa ʻoku taau mo holi ke tokoní ʻoku fakalototoʻaʻi ke nau fakafonu ha tohi kole pea ʻave ia ki he Kōmiti Ngāue ʻa e Fakatahaʻanga fakalotofonuá. Naʻa mo e kau malanga teʻeki papitaisó te nau tokoni nai ki hono langa pe fakaleleiʻi honau Fale Fakatahaʻangá tonu.

NGAAHI HOLO ʻASEMIPILĪ

¹⁸ Ko e muʻaki kau Kalisitiané naʻa nau faʻa fakataha ʻi ha ngaahi kulupu iiki. Kae kehe, naʻe faʻa fakatahataha “ha fuʻu tokolahi” ʻi he taimi ʻe niʻihi. (Ngā. 11:26) ʻOku tatau pē mo e kakai ʻa Sihova he ʻaho ní ʻoku nau fakataha ʻi ha ngaahi fakatahataha lalahi ki he ngaahi ʻasemipilī fakasēketí mo e ngaahi fakataha-lahi fakavahé. ʻOku faʻa totongi ha ngaahi fale ʻi he feituʻú ki he taumuʻa ko ení, ka ʻi he feituʻu ʻoku ʻikai feʻunga pe ala maʻu ai iá, ʻe fiemaʻu nai ai ha feituʻu faiʻanga lotu ʻoku ui ko e Holo ʻAsemipilī.

¹⁹ ʻI he taimi ʻe niʻihi, ʻoku fakatau mai ha fale, ʻo fakaleleiʻi pea ngāueʻaki ko ha Holo ʻAsemipilī. Neongo ia ʻoku faʻa lahi ange hono maʻu ha konga kelekele, pea ʻoku langa ai ha holo foʻou. ʻOku kehekehe ʻa e lalahi ʻo e ngaahi Holo ʻAsemipilií, ʻo fakatuʻunga ʻi he ngaahi fiemaʻu fakalotofonuá. ʻOku fai ʻe he ʻōfisi vaʻá ʻa e fili ke fakatau mai pe langa ha fale pehē ʻo toki fai pē ia hili hono vakaiʻi fakalelei ʻa e fakamolé pea fakapapauʻi ʻa e lahi hono ngāueʻaki iá.

²⁰ ʻOku fakanofo ʻe he ʻōfisi vaʻá ʻa e fanga tokoua ke nau tokangaʻi hono ngāueʻaki mo tauhi ʻo e Holo ʻAsemipilií. ʻOku fai ʻa e ngaahi fokotuʻutuʻu ki he ngaahi sēketí ke fai tuʻumaʻu ʻa e fakamaʻá, fakamaʻa tuʻo ua he taʻu, pea pehē ki hono tauhi ke ʻoua ʻe hoko ha maumau. ʻOku lelei ke pole ʻa e fanga tokouá ke fai ʻa e ngāue ko ení. Ko ia ai, ʻoku fakalototoʻaʻi ʻa e ngaahi fakatahaʻangá ke nau poupouʻi ʻaufuatō ʻa e ngaahi fokotuʻutuʻu ko ení.—Saame 110:3; Mal. 1:10.

²¹ ʻI he taimi ʻe niʻihi, ʻoku toe ngāueʻaki nai ʻa e Holo ʻAsemipilií ki he ngaahi ngāue fakateokalati kehe, hangē ko e ngaahi ako Fakatohitapú mo e ngaahi fakataha makehe ki he kau ʻovasia sēketí. ʻI he hangē ko e Fale Fakatahaʻangá, ko ha Holo ʻAsemipilī ko ha feituʻu faiʻanga lotu ia kuo ʻosi fakatapui. ʻI he taimi ʻoku tau fakataha ai ʻi ha Holo ʻAsemipilī, ko hotau ʻulungāngá, valá mo e teuteú ʻoku totonu ke fakangeingeia, ʻo hangē pē ko e taimi ʻoku tau fakataha ai ke lotu ʻi he Fale Fakatahaʻangá.

²² ʻOku fakavave ʻa e faʻahinga foʻou tokolahi ke hoko ko e konga ʻo e kautaha ʻa e ʻOtuá lolotonga ʻa e konga fakaʻosi ʻo e ngaahi ʻaho fakaʻosi ko ení. ʻOku fakamoʻoniʻi heni ʻa e tāpuaki ʻa Sihová. (ʻAi. 60:8, 10, 11, 22) Ko ia ai, ʻoku tau loto ke poupou ki he ngaahi fokotuʻutuʻú ke tauhi mo fakamaʻa maʻu pē pea ʻai ke fakafiemālie ʻa e ngaahi feituʻu faiʻanga lotú. ʻI he fai peheé, ʻoku tau fakahāhā ai ʻetau houngaʻia ki he ngafa ʻoku fakahoko ʻe he ngaahi fale ko iá ʻi hono tokoniʻi kitautolu ke tau toe fefakalototoʻaʻaki lahi ange ʻi heʻetau sio ki he ofi mai ʻa e ʻaho ʻo Sihová.