Tau Tauhi Hotau Feituʻu Faiʻanga Lotú ke ʻi ha Tuʻunga Lelei
1. Ko e hā ʻa e taumuʻa ʻoku fakahoko ʻe he Fale Fakatahaʻangá?
1 ʻI māmani lahi ʻoku ʻi ai ʻa e ngaahi fakatahaʻanga ʻa e Kau Fakamoʻoni ʻa Sihová ʻoku laka hake he 94,000. Ko e lahi taha ʻo e ngaahi fakatahaʻangá ʻoku nau fakatahataha ki he ako Tohitapú pea mo e feohi faka-Kalisitiané ʻi ha Fale Fakatahaʻanga, ʻa ia ʻoku hoko ia ko ha senitā fakalotofonua ʻo e lotu maʻá.
2. Ko e hā ʻoku mahuʻinga ai ke tauhi ʻa e Fale Fakatahaʻangá ke maʻa mo taau ki he mamatá?
2 Fakataimitēpileʻi Tuʻumaʻu ʻa e Fakamaʻá: Ko e ngāue ʻoku fai ʻi hono tauhi ʻo e Fale Fakatahaʻangá ko ha konga mātuʻaki mahuʻinga ia ʻo ʻetau ngāue toputapú. Ko e tohi Our Ministry ʻoku fakamatalaʻi ai ʻi he peesi 61-2: “Ko e fanga tokouá ʻoku totonu ke nau vakai ko ha monū ia ke ʻikai ngata pē ʻi hono tokoniʻi fakapaʻanga ʻa e Fale Fakatahaʻangá kae pehē foki ke nau pole ʻaki ʻenau ngaahi ngāué ki hono tauhi ia ke maʻá, taau ki he mamatá pea ʻi ha tuʻunga lelei. Fakatouʻosi ʻi loto mo tuʻa, ʻoku totonu ke hoko ʻa e Fale Fakatahaʻangá ko ha fakahāhā totonu ia ʻo e kautaha ʻa Sihová.” ʻI hono ngāueʻaki ʻa e Fale Fakatahaʻangá ʻi ha ngaahi taimi ʻi he uike taki taha, ʻoku ʻi ai ha fiemaʻu ki hono fakamaʻa mo tauhi tuʻumaʻu. ʻOku faʻa hoko ko e kau ngāue pole mei he (ngaahi) fakatahaʻanga ʻoku fakataha ʻi he Fale Fakatahaʻangá ʻoku nau tokangaʻi ʻa e ngaahi meʻá ni. Hangē ko ia ʻi he taimi ʻo e Tohitapú, ko e kau sevāniti ʻa Sihova he ʻaho ní ʻoku totonu ke nau tōtōivi ʻi hono ‘monomono mo ngaohi’ hotau feituʻu faiʻanga lotú.—2 Kal. 34:10.
3. ʻOku anga-fēfē hono fokotuʻutuʻu ʻa e fakamaʻa ʻo e Fale Fakatahaʻangá, pea ko hai nai ʻe kau ki he monū ko ení?
3 Ko ha taimi-tēpile ki he fakamaʻa fakauike ʻo e Fale Fakatahaʻangá ʻoku totonu ke fokotuʻu ia ʻi he papa fakahinohinó. Ko e ngaahi kulupu ako tohi kotoa pē ʻoku totonu ke nau taufetongi ʻi hono fakamaʻa ʻa e holó ʻi he uike taki taha, ʻaki e muimui ʻi ha lisi ʻo e ngaahi meʻa ke faí. Ko e faʻahinga kotoa ʻoku nau malavá ʻoku fiemaʻu ke nau kau ʻi he monū fakauike ʻo hono tauhi ʻa e Fale Fakatahaʻangá ke maʻa mo taau ki he mamatá. ʻI he fakahinohino fakaemātuʻá, ʻe lava ke fakakau ki ai ʻa e fānaú, ʻo akoʻi ai kinautolu ke nau fakahāhā ʻa e houngaʻia ki he monū ko ení. Tautefito ʻi he taimi ʻoku ngāueʻaki ai ʻe ha fakatahaʻanga laka hake he tahá ha Fale Fakatahaʻanga, ʻoku fiemaʻu ʻa e fāitaha lelei koeʻuhi ke ʻoua naʻa tō ʻa hono tokangaʻi ʻo e tafaʻaki mahuʻinga ko eni ʻo ʻetau lotú ki ha kiʻi tokosiʻi pē.
4. Ko e hā ʻoku totonu ke fai koeʻuhi ke ʻiloʻi ai ʻe he fakatahaʻangá ʻa e meʻa ke faí ʻi he taimi ʻo hono fakamaʻa ʻo e Fale Fakatahaʻangá?
4 Ko ha lisi ʻo e ngaahi meʻa ke faí ʻe fokotuʻu nai ia, ʻi he feituʻu ʻoku tauhi ai ʻa e ngaahi meʻangāue fakamaʻá. Ko e lisi ko ení ʻoku totonu ke fakamatalaʻi ai ʻa e ngaahi fatongia ke fakahoko fakauiké, ʻo kau ai ʻa e vekiumé, fufulu matapā sioʻatá, holo efu ʻa e ngaahi funga laupapá, fakamaha ʻo e ngaahi kapa vevé, mopi ʻa e falikí, mo hono fakamaʻa ʻo e ngaahi sioʻatá. ʻE fiemaʻu nai ʻa e ngaahi ngāue ʻe niʻihi ke fai ʻo ʻikai loko tuʻumaʻu, hangē ko hono fakangingila ha naunau papa pē pea mo hono fakamaʻa fakaʻāuliliki ʻa e ngaahi seá, ngaahi puipuí mo e ngaahi tuʻuʻanga māmá. Ko e ngaahi kemikale kotoa ʻoku ngāueʻaki ki he fakamaʻá ʻoku totonu ke tauhi ia ke ʻikai aʻu ki ai ʻa e fānaú pea ʻoku totonu ke ʻai ki ai ha hingoa mahino. ʻOku totonu ke ʻomai ha fakamatala nounou ʻo e founga ʻoku ngāueʻaki ai ʻa e kemikale taki taha.
5. ʻOku mahuʻinga fēfē ʻa e tuʻunga malú, pea ko e hā ʻa e ngaahi meʻa ʻoku fiemaʻu ke vakaiʻi fakataimí? (Sio ki he puha he peesi 3.)
5 Ko e tuʻunga malu ʻi he Fale Fakatahaʻangá ʻoku mahuʻinga ʻaupito ia. (Teu. 22:8) ʻI he fekauʻaki mo e meʻá ni, ko e puha he peesi 3 ʻoku fakahokohoko ai ʻa e ngaahi meʻa ʻoku fiemaʻu ke vakaiʻi fakataimi koeʻuhi ke lava ʻo taʻofi ai ʻa e ngaahi fakatuʻutāmakí.
6. ʻOku anga-fēfē hono fokotuʻutuʻu ʻa e ngāue ʻo hono tauhi ʻo e Fale Fakatahaʻangá?
6 Tauhi ʻo e Fale Fakatahaʻangá: Ko e kulupu ʻo e kau mātuʻá ʻoku nau maʻu ʻa e fatongia ke tokangaʻi ʻa hono tauhi ʻo e Fale Fakatahaʻangá. ʻI he tuʻunga fakalūkufuá, ko ha tokotaha mātuʻa pe ko ha sevāniti fakafaifekau ʻoku fakanofo ia ke ne fokotuʻutuʻu ʻa e ngāué. ʻOkú ne fokotuʻutuʻu ʻa hono fakalele ʻi he ʻaho ki he ʻaho ʻa e Fale Fakatahaʻangá, ʻo fakapapauʻi ʻoku tauhi ia ke maʻa pea ʻi he tuʻunga lelei pea ʻoku ʻi ai ʻo ala maʻu ʻa e ngaahi tokonaki feʻunga. ʻOku mahuʻinga ke ʻikai ʻi ai ha ngaahi tuʻunga fakatuʻutāmaki ʻi he holó pe ʻi he ʻēliá. ʻI he taimi ʻoku ngāueʻaki ai ʻe ha fakatahaʻanga ʻe ua pe lahi ange ʻa e holo tatau, ʻoku fakanofo ʻe he kulupu ʻo e kau mātuʻá ha kōmiti fakahoko ngāue ke ne fokotuʻutuʻu maau ʻa e ngaahi fokotuʻutuʻu ki hono tokangaʻi ʻo e falé mo e konga ʻapí. ʻOku ngāue ʻa e kōmiti ko ení ʻi he malumalu ʻo e tataki ʻa e ngaahi kulupu ʻo e kau mātuʻá.
7. (a) Ko e hā ʻoku fai ʻi he taʻu taki taha ke fakapapauʻi ai ʻoku tauhi ʻa e Fale Fakatahaʻangá ʻi ha tuʻunga leleí? (e) Ko e hā ʻa e ngaahi meʻa ʻoku fiemaʻu ki ai ʻa e tokangá ʻi he taimi ki he taimi? (Sio ki he puha ʻi he peesi ko ení.)
7 Ko ha vakaiʻi fakaikiiki ʻo e Fale Fakatahaʻangá ʻoku fai fakataʻu ia. ʻOku muimui ai ʻa e kau mātuʻá ʻaki hono fokotuʻu ʻa e ngaahi fokotuʻutuʻu ke tokangaʻi fakaʻāuliliki ai ha ngaahi meʻa pē ʻoku fiemaʻu ki ai ʻa e tokangá. ʻE fakaafeʻi nai ʻa e kau malangá ke nau tokoni ʻi he ngaahi monomono mo e tokangaʻi ʻoku fiemaʻú. ʻOku totonu ke tokanga kotoa ki he fakatonutonu ʻo e fanga kiʻi meʻa īkí pea ʻoku totonu ke vave ki hono tokangaʻi ʻa e ngaahi meʻa ʻoku fiemaʻu ki ai ʻa e tokangá.
8. Ko fē nai ʻa e taimi ʻe fetuʻutaki ai ʻa e kau mātuʻá ki he Kōmiti Langa Fakafeituʻú ʻi he ngaahi meʻa fakaetauhí?
8 Kapau ʻoku ongoʻi ʻe he kau mātuʻá ha fiemaʻu faleʻi pe tokoni ʻi hono tokangaʻi ʻa hono tauhi ʻo e Fale Fakatahaʻangá, te nau fetuʻutaki nai ki he Kōmiti Langa Fakafeituʻú. ʻE kau nai heni ʻa e ngaahi meʻa hangē ko hono tokangaʻi ʻo e kāpetí, ko hono vakaiʻi ʻo e ngaahi ʻiuniti hitá mo e mīsini fakamokomoko-ʻeá, pea mo hono fakaleleiʻi ʻa e ngaahi palopalema ʻi ha tutulu ʻi he falé.
9. Ko e hā ʻa e founga ʻoku totonu ke muimui ki ai kapau ʻoku ʻi ai ha fiemaʻu ke haea ha tokotaha ngāue konituleki?
9 Ngāueʻaki Fakapotopoto ʻa e Paʻanga ʻa e Fakatahaʻangá: Ko e lahi taha ʻo e ngāue ʻi he Fale Fakatahaʻangá mo e ʻēliá ʻoku fakahoko ia ʻe ha kau ngāue pole. Ko ʻenau ngaahi ngāue feilaulauʻi-kitá ko ha fakahāhā lelei ia ʻo e ʻofa pea ʻoku tokoni lahi ia ki hono fakasiʻisiʻi ʻo e fakamolé. Kapau ʻoku hoko ʻo fiemaʻu ke haea mai ha tokotaha ngāue konituleki ke ne tokangaʻi ha ngāue, hangē ko hono tāmateʻi ʻo e fanga kiʻi ʻinisēkite maumaú, ʻoku kumi ʻa e kau mātuʻá ki ha ngaahi tohi tala ngāue feʻauʻauhi ki he ngāue peheé. ʻOku nau fai eni ʻaki hono ʻuluaki teuteuʻi ha fakamatala hiki fakaikiiki ʻo e ngāue ke faí pea mo ha ngaahi naunau pē ke ʻomai. ʻOku ʻave ha tatau ʻo e lisi ko ení ki ha kau ngāue kehekehe koeʻuhi ke tohi tala ngāue ʻa e tokotaha kotoa fakataha mo hono mahinoʻi tatau ʻo e ngaahi fiemaʻú. Hili hono maʻu ʻa e ngaahi tohi tala ngāue mei he faʻahinga ʻoku nau fie fai iá, ʻe lava leva ke toki fili ʻe he kau mātuʻá ʻa e tuʻuaki lelei tahá. Ko e foungá ni ʻoku totonu ke muimui ki ai ʻo aʻu ai pē kapau ko ha tokoua kuó ne tuʻuaki mai ke fai ʻa e ngāué pe ʻomai ʻa e ngaahi naunau ʻoku fiemaʻú ʻi ha totongi makehe.
10. Ko e hā ʻoku fai ke fakapapauʻi ʻoku ngāueʻaki totonu ʻa e paʻanga ʻa e fakatahaʻangá?
10 ʻOku toe fou ʻa e kau mātuʻá ʻi ha ngaahi sitepu feʻungamālie ke maʻu ai ha tuʻunga holo hifo pe ko ha ngaahi fakaʻatā kehe, ʻi heʻene faingamālie ení. ʻI he taimi ʻoku ngāueʻaki ai ʻe ha fakatahaʻanga laka hake he tahá ʻa e Fale Fakatahaʻangá, ʻoku tauhi maʻu ʻe he kōmiti fakahoko ngāué ha ʻakauni sieke mavahe pea ʻave ʻa e ngaahi līpooti fakapaʻanga kuo hiki fakamāhiná ki he kulupu taki taha ʻo e kau mātuʻá, ʻo hanganaki fakahā ai ke ʻiloʻi ʻe he kau mātuʻá ʻa e anga hono ngāueʻaki ʻo e paʻangá. ʻOku fakafatongiaʻaki ʻa e kau mātuʻá ki hono ngāueʻaki totonu ʻo e paʻanga ʻa e fakatahaʻangá.
11. Ko e hā ʻoku totonu ke fai kapau ʻoku fiemaʻu ha monomono pe fakaleleiʻi fakalahi?
11 Monomono mo e Fakaleleiʻi Fakalahi: ʻI he taimi ʻoku ʻiloʻi ai ʻe he kōmiti fakahoko ngāué ʻoku fiemaʻu ha meʻa lahi ʻi he fekauʻaki mo e fakalele pe monomono ʻo e Fale Fakatahaʻangá, ʻoku ʻave ai ʻe he kōmití ʻa e meʻá ki he kulupu ʻo e kau mātuʻá ki ha fakahinohino. Kapau ʻoku fakapapauʻi ʻe fiemaʻu ha monomono pe fakaleleiʻi fakalahi pe ʻe fiemaʻu ha tokoni mei tuʻa ʻi he (ngaahi) fakatahaʻanga ʻoku nau fakataha ʻi he Fale Fakatahaʻangá, ʻoku fetuʻutaki ʻa e kau mātuʻá ki he Kōmiti Langa Fakafeituʻú. Ko e fanga tokoua taau mo taukei ko ení, ʻoku nau ʻomai ʻa e ngaahi fokotuʻu ʻaonga mo tokangaʻi ʻa hono tataki ʻo e ngāué. Kapau ʻoku kau ki ai ha fakamole lahi, ʻe fiemaʻu ke maʻu mai ha fakafuofua totonu ʻo e fakamolé pea teuteu ha fakapapau ki he loto ki ai ʻa e fakatahaʻangá.—Sio ki he Puha Fehuʻi ʻo ʻEtau Ngāue Fakafaifekau ʻo e Puleʻanga ʻo Fepueli 1994.
12. ʻE lava fēfē ke tau fakahāhā ʻetau houngaʻia ki he monū ʻo hono maʻu ʻa e ngaahi fakataha ʻi he Fale Fakatahaʻangá?
12 He fakamahuʻingaʻi lahi ē ʻe kitautolu hotau monū ʻo e fakatahataha fakataha ʻi he Fale Fakatahaʻangá! ʻOku ʻikai ʻaupito te tau loto ke liʻaki ʻetau ngaahi fakatahá pe fakamaʻamaʻaʻi. ʻE lava ke tokoni kotoa ki he lavameʻa ʻo e tokonaki ko eni ki hotau fakalototoʻaʻí ʻaki ʻa e kau kakato ʻi hono tokangaʻi ʻa hotau Fale Fakatahaʻangá. ʻOku fakavīkivikiʻi ʻe he meʻá ni ʻa e lotu maʻá pea ʻoatu ai ʻa e lāngilangi ki he huafa ʻo Sihová. Tau fakapapauʻi ke tauhi hotau feituʻu faiʻanga lotú ke ʻi ha tuʻunga lelei.
[Puha ʻi he peesi 3]
Lisi ki he Tuʻunga Malú
◻ Ko e ngaahi meʻa tāmate afí ʻoku totonu ke ala maʻungofua pea vakaiʻi fakataʻu.
◻ Ko ha ngaahi sisitemi maluʻi mei he afí ʻoku totonu ke vakaiʻi ia ʻo fakatatau ki he lao fakalotofonuá.
◻ Ko e ngaahi hūʻanga ki tuʻá mo e ngaahi sitepú ʻoku totonu ke fakaʻilongaʻi mahino, maama lelei, pea ala hūngofua ai, pea ko e pikiʻangá ʻoku totonu ke malu.
◻ Ko e ngaahi loki tukuʻanga meʻá, falemālōloó, mo e loki tukuʻanga valá ʻoku totonu ke maʻa, maau, pea ʻatā mei he ngaahi naunau ʻoku mātuʻaki velangofuá, ngaahi meʻa fakafoʻituituí mo e vevé.
◻ Ko e ʻató mo e ngaahi fakatalí kuo pau ke vakaiʻi pea toutou fakamaʻa.
◻ Ko e ngaahi ʻaluʻangá mo e feituʻu tauʻanga meʻalelé kuo pau ke maama pea tauhi ke ʻatā mei he ngaahi tuʻunga te ne fakatupunga nai ha hekea pe ko ha tō.
◻ Ko e ngaahi sisitemi fakaʻuhilá, hitá mo e maʻuʻanga ʻeá ʻoku totonu ke vakaiʻi pea tauhi fakalelei.
◻ ʻOku totonu ke monomono vave ha ngaahi tutulu pē ke taʻofiʻaki ʻa e ngaahi palopalema lahi ʻi he hauhaú.
◻ Ko e falé ʻoku totonu ke lokaʻi ʻi he taimi ʻoku ʻikai ai ha taha ʻi he konga ʻapí.
[Puha ʻi he peesi 4]
Tokangaʻi ʻo e Falé mo e Konga ʻApí
◻ Tuʻa: ʻOku ʻi ha tuʻunga lelei ʻa e ʻató, holisí, valí, ngaahi matapā sioʻatá, mo e fakaʻilonga ʻo e Fale Fakatahaʻangá?
◻ ʻĒlia: ʻOku tauhi lelei ʻa e ʻēliá? ʻOku ʻi ha tuʻunga lelei ʻa e ngaahi ʻaluʻangá, ngaahi ʻaá, mo e feituʻu tauʻanga meʻalelé?
◻ Loto: ʻOku feʻunga ki he mamata ki aí ʻa e ngaahi kāpetí, ngaahi puipuí, ngaahi seá, ngaahi tuʻuʻanga māmá, valí, ngaahi kapineti tohí, mo e loki tukuʻanga valá?
◻ Meʻangāue: ʻOku ngāue lelei ʻa e māmá, meʻa fakaongoleʻolahí, hitá, maʻuʻanga ʻeá, mo e mīsini fakamokomoko-ʻeá?
◻ Ngaahi falemālōloó: ʻOku maʻa eni mo ngāue lelei?
◻ Ngaahi pepa ʻa e fakatahaʻangá: ʻOku ʻalu mo e taimí mo totonu ʻa e kautahá pe ko e ngaahi pepa ʻo e ngāue fakatalāsití? ʻI hono fiemaʻú, ʻoku faile fakataʻu ʻa e ngaahi foomu fakaʻatā koloa mei he tukuhaú?