ʻOku Lava Fēfē Ke Mau Tokoni ki Hono Tokangaʻi Homau Fale Fakatahaʻangá?

Ko e Fale Fakatahaʻanga kotoa pē ʻo e Kau Fakamoʻoni ʻa Sihová ʻoku fakafofongaʻi ai ʻa e huafa māʻoniʻoni ʻo e ʻOtuá. Ko ia ai, ʻoku mau tui ko e kau ʻi hono tauhi ʻa e falé ke maʻa, matamatalelei, pea ʻi he tuʻunga leleí ko ha monū ia pea ko ha tafaʻaki mahuʻinga ia ʻo ʻemau lotu toputapú. ʻE lava ke kau ki ai ʻa e tokotaha kotoa.

Pole hili ha fakataha ke fai ha fakamaʻa. Hili ʻa e fakataha taki taha, ʻoku loto-lelei ʻa e fanga tokouá mo e fanga tuofāfiné ke nau fai ha kiʻi fakamaʻa ke ʻai ke maau ʻa e Fale Fakatahaʻangá. Tuʻo taha he māhina, ʻoku fai ai ʻa e fakamaʻa fakaʻāuliliki ange. ʻOku fokotuʻutuʻu ʻe ha mātuʻa pe ko ha sevāniti fakafaifekau ʻa e ngāué, ʻo faʻa muimui ʻi ha lisi ʻo e ngaahi meʻa ke faí. Fakatuʻunga ʻi he fiemaʻú, ʻoku pole ʻa e faʻahinga tāutaha ke nau tafi, mopi, pe vekiume ʻa e falikí, olo efu, fakatonutonu ʻa e ngaahi seá, fakamaʻa mo fufulu ʻa e ngaahi fale mālōloó ʻo ngāueʻaki ha huhuʻa tāmate siemu, fufulu ʻa e ngaahi matapā sioʻatá mo e ngaahi sioʻata-teuteú, huaʻi ʻa e vevé, pe ko hono fakamaʻa ʻa tuʻa mo tokangaʻi ʻa e loto-ʻapí. Tuʻo taha pe lahi ange ʻi he taʻú, ʻoku vaheʻi ai ʻa e ʻaho ʻe taha ke fai ai ha fakamaʻa lahi. ʻI hono fakakau ʻemau fānaú ʻi he ngaahi ngāué, ʻoku mau akoʻi ai kinautolu ke nau fakaʻapaʻapaʻi homau feituʻu faiʻanga lotú.​—Tangata Malanga 5:1.

Tokoni ʻi hono fai ha ngaahi monomono pē ʻe fiemaʻu. ʻI he taʻu kotoa pē, ʻoku fai ai hano sivi fakaikiiki ʻo e Fale Fakatahaʻangá, ʻi loto mo tuʻa. Makatuʻunga ʻi he sivi ko ení, ʻoku fai ai ʻa e ngāue tuʻumaʻu ʻi hono tokangaʻi ʻa e holó ke ʻi ha tuʻunga lelei, ʻo tokoni ia ke hao ai mei ha ngaahi fakamole ʻoku ʻikai fiemaʻu. (2 Kalonikali 24:13; 34:10) Ko ha Fale Fakatahaʻanga ʻoku maʻa mo tokangaʻi lelei ko ha feituʻu taau ia ke lotu ai ki homau ʻOtuá. ʻI he kau ki he ngāue ko ení, ʻoku mau fakahaaʻi ai ʻoku mau ʻofa kia Sihova pea fakamahuʻingaʻi ʻa homau feituʻu faiʻanga lotú. (Saame 122:1) ʻOku toe fakatupunga ʻe he meʻá ni ke maongo lelei ia ki he koló.​—2 Kolinitō 6:3.

• Ko e hā ʻoku totonu ai ke ʻoua te mau taʻetokangaʻi homau feituʻu faiʻanga lotú?

• Ko e hā ʻa e ngaahi fokotuʻutuʻu ʻoku fai ke tauhi ai ke maʻa ʻa e Fale Fakatahaʻangá?