Puha Fehuʻi

◼ Ko hai ʻoku fakafatongiaʻaki ki hono fakamaʻa ʻa e Fale Fakatahaʻangá?

Ko ha Fale Fakatahaʻanga ʻoku maʻa pea fakaholomamata ʻokú ne tohoakiʻi ʻa e fakamānako ki he pōpoaki ʻoku tau malangaʻí. (Fakafehoanaki mo 1 Pita 2:12.) Ko hono tauhi ʻa e holó ke maʻa mo māú ʻoku mātuʻaki fiemaʻu, pea ʻe lava ke kau ʻa e tokotaha kotoa pē ʻi hono tauhí. ʻOku ʻikai totonu ke tau ʻamanekina ha kakai tokosiʻi pē ke nau fua ʻa e kavengá fakalūkufua. ʻOku faʻa fokotuʻutuʻu ʻa e fakamaʻá ʻo fakatatau ki he ngaahi kulupu Ako Tohi ʻa e Fakatahaʻangá, fakataha mo e tataki ʻe he tokotaha faiako ʻo e ako tohí pe ko hono tokoní. ʻI he ngaahi holo ko ia ʻoku fakataha ai ʻa e fakatahaʻanga ʻe taha pe lahi angé, ʻe fokotuʻutuʻu ʻe he kau mātuʻá ʻa e ngaahi meʻá koeʻuhí ke kau ʻa e ngaahi fakatahaʻangá kotoa ʻi hono tauhí.

ʻOku lava fēfē ke tau tokanga lelei ange ki he fatongia ko ʻení? ʻOku totonu ke fakamaʻa ʻa e Fale Fakatahaʻangá ʻo fakatatau ki ha taimi-tēpile tuʻumaʻu. ʻOku totonu ke ala maʻu ʻa e ngaahi naunau mo e ngaahi meʻa ke ngāueʻaki ki hono fakamaʻá. Ko ha fakahokohoko ʻo e ngaahi meʻa ʻoku fiemaʻu ke faí ʻoku totonu ke fakapipiki ʻi ha feituʻu ʻe lava ke sio ki ai ʻa e kau ngāué ki ha fakahinohino. ʻE ʻi ai nai ha lisi kehekehe ʻe ua, ko e taha ki ha fakamaʻa maʻamaʻa fakalūkufua hili ʻa e fakataha taki taha pea ko e taha ki ha fakamaʻa fakaʻāuliliki fakauike. ʻOku totonu ki he tokotaha faiako ʻo e ako tohí ke ne fakataimitēpileʻi ʻa e fakamaʻa fakaʻāulilikí ki ha ʻaho mo e taimi ʻoku feʻungamālie ki he kotoa ʻoku vaheʻi ki aí. ʻOku toe totonu foki ke fai ha tokanga tuʻumaʻu ki he musié, ngaahi matalaʻiʻakaú, pea mo e ngoue ʻakau īkí. Ko e ngaahi hala ʻaluʻangá pea mo e ngaahi tauʻanga meʻalelé ʻoku totonu ke ʻoua ʻe ʻi ai ha veve. ʻI he taʻu taki taha ʻoku totonu ke fai ai ʻa e fakamaʻa fakakātoá, mahalo pē ki muʻa ʻi he fai ʻo e Fakamanatú. ʻOku fakakau nai heni ʻa hono fufulu ʻo e ngaahi matapā sioʻatá mo e holisí, fakamaʻa ʻo e kāpetí, pea mo e fō ʻo e ngaahi puipuí.

Ko e moʻoni, ko e kotoa ʻo kitautolú ʻe lava ke tau fakamaʻamaʻa ʻa e kavengá ʻaki ʻa e ʻikai ke laku holo ʻa e ngaahi pulu-lolé pe vevé ʻi loto pe ʻi tuʻa ʻi he holó. ʻE lava ke tau fakamaʻa ʻa e falemālōloó hili ʻa e ngāueʻaki taki taha, ʻo ʻai ke maʻa ia ki he tokotaha ʻoku hoko atú. Tokanga ke fakaʻehiʻehi mei hono maumauʻi ʻo e meʻangāué pe maumauʻi ʻo e ngaahi naunaú. Fakatokangaʻi ʻa e ngaahi meʻa ʻoku tau ʻi he kāpetí, ngaahi sea maumaú, ngaahi palopalema fakapalamá, ngaahi foʻi ʻuhila ʻoku paá, pea mo e hā fua, pea līpooti vave ʻa e ngaahi meʻa ko ʻení ki he tokoua ʻokú ne tokangaʻi ʻa e monomono ʻo e Fale Fakatahaʻangá.

ʻAi ke loto-lelei ʻa e tokotaha kotoa pē ʻo kitautolu ke fai ʻetau tafaʻakí. ʻOku ʻai ai heni ke ʻi ai ha fale faiʻanga lotu fiefia pea fakamavaheʻi ai kitautolu ʻi he tuʻunga ko ha kakai maʻa ʻoku fakalāngilangiʻi ʻa Sihova ko e ʻOtuá.​—1 Pita 1:16.