Ko e Hā ʻOku Ou Hohaʻa Ai ki Hoku Fōtunga Hā Maí?

KO E HĀ TE KE FAÍ?

Sioloto atu ki he talanoa ko ení: ʻI he sio ʻa Sūlia ki he sioʻatá, ko e meʻa pē ʻokú ne sio ki aí ko e fuʻu sinó. “ʻOku ou fiemaʻu ke u fakaholo,” ko ʻene fakakaukaú ia—neongo hono tala ange ʻe heʻene ongo mātuʻá mo e ngaahi kaumeʻá ʻokú ne “pakau.”

Ki mui ai, naʻe fakakaukau ʻa Sūlia te ne feinga mālohi ke toe kiʻi holo ʻaki ha “kilo nai ʻe ua.” Ko e meʻa naʻe pau ke ne faí ko ʻene ʻaukai ʻi ha ngaahi ʻaho siʻi pē . . .

Kapau naʻá ke maʻu ʻa e ongoʻi tatau ʻo hangē ko Sūliá, ko e hā te ke faí?

TUʻU PEA FAKAKAUKAU!

ʻOku ʻikai ke hala ia ke ke hohaʻa fekauʻaki mo e anga ho fōtunga hā maí. Ko e moʻoni, ʻoku fakaongoongoleleiʻi ʻe he Tohi Tapú ʻa e fōtunga hā mai ʻo e kau fefine mo e kau tangata ʻe niʻihi, ʻo kau ai ʻa Sela, Lesieli, ʻApikale, Siosifa mo Tēvita. ʻOku pehē ʻi he Tohi Tapú naʻe ʻi ai ha fefine ko hono hingoá ko ʻApisaki naʻe “hoihoifua ʻaupito.”—1 Tuʻi 1:4.

Kae kehe, ʻoku tokolahi ʻa e toʻutupu ia ʻoku nau tokanga tōtuʻa ki he anga honau fōtungá. ʻOku lava ke iku atu ai ki he ngaahi palopalema lahi. Fakakaukau angé:

• ʻI he savea ʻe taha, naʻe pehē ai ko e pēseti ʻe 58 ʻo e fānau fefiné naʻa nau taukaveʻi ʻoku nau fuʻu sino, ka ko hono moʻoní, naʻe pēseti pē ʻe 17.

• ʻI he toe savea ʻe taha, ko e pēseti ʻe 45 ʻo e kakai fefine naʻe fuʻu pakaú naʻa nau fakakaukau kinautolu naʻa nau fuʻu mamafa!

• ʻI heʻenau feinga mālohi ke fakaholó, kuo iku ʻo maʻu ai ʻe he toʻutupu ʻe niʻihi ʻa e mahaki ko e ʻanolekisiá—ko ha founga kai ia ʻoku ʻikai lelei, he ʻoku fakatuʻutāmaki ki he moʻuí ʻo iku ke mole ai ʻa e uʻa fie kaí.

Kapau kuó ke maʻu ha ngaahi fakaʻilonga ʻo e ʻanolekisiá pe ʻoku mole ho uʻa fie kaí, kumi tokoni. Feinga ke talanoa ki he ongo mātuʻá pe ko ha tokotaha lahi alafalalaʻanga. ʻOku pehē ʻe he Tohi Tapú: “Ko e kaumeʻa ʻoku ne ʻofa ʻi he taimi kotoa pe; pea ko hoto moʻoni naʻe fanauʻi maʻa ha faingataʻa.”—Palōveepi 17:17.

KO E FAKALELEIʻI MAHUʻINGA TAHA ʻE LAVA KE KE FAÍ!

Ko e moʻoni, ko e tangata ʻi lotó ʻokú ne ʻai ha taha ke fakaʻofoʻofa pe ʻikai ke fakaʻofoʻofa. Fakakaukau ki he foha ʻo Tuʻi Tēvita ko ʻApisalomé. ʻOku pehē ʻe he Tohi Tapú:

‘Pea naʻe ʻikai ha tangata ʻe tatau mo hono fuʻu matamatalelei: Naʻe ʻikai hano ʻila.’​—2 Sāmiuela 14:25.

Neongo ia, ko e kiʻi talavou ko ení naʻe fuʻu pōlepole, hīkisia mo kākā! Kae kehe, ʻoku ʻikai ke ʻomai ʻi he Tohi Tapú ia ha fakatātā lelei ʻo ʻApisalome; ʻoku fakamatalaʻi ia ko ha tangata naʻe taʻemateaki taʻemīngao mo tāufehiʻa ʻi he loto-fakapō.

ʻOku ʻuhinga lelei leva hono ʻomai ʻe he Tohi Tapú ʻa e faleʻi ko ení:

“Kofuʻaki kimoutolu ʻa e angaʻitangata foʻoú.”—Kolose 3:10.

“ʻOua ʻe tuku ke hoko hoʻomou teuteú ʻo fai ia ʻi tuʻa pē . . . , kae tuku ke mou teuʻi ʻa e tangata fufū ʻo e lotó.”—1 Pita 3:3, 4.

Neongo ʻoku ʻikai ke hala hoʻo loto ke ke hā matamata leleí, ʻoku ʻi ai ha meʻa ʻoku toe mahuʻinga mamaʻo ange ia ʻi ho fōtunga hā maí, ʻa ia ko ho angaʻitangatá. ʻI he lele lōloá, ko e ngaahi ʻulungaanga ʻoku taau ke fakahīkihikiʻí te ne ʻai ai koe ke ke fakaʻofoʻofa ange ki he niʻihi kehé ʻi ha sino ʻoku pāpela pe foʻi sino lelei! ʻOku pehē ʻe ha taʻahine ko Felisita, “ʻOku lava ʻe he fakaʻofoʻofá ke ne tohoaki vave mai ʻa e tokangá, ka ko ho tangata ʻi lotó mo ho ngaahi ʻulungaanga leleí ʻa e meʻa ʻe manatuʻi lelei taha ai koe ʻe he kakaí.”

VAKAI KI HO FŌTUNGÁ

ʻOkú ke faʻa loto-mamahi ʻi he anga ho fōtungá?

Naʻe ʻi ai nai ha taimi naʻá ke fakakaukau ai ke ke tafa fakasanisani pe fakaholo lahi ke fakaleleiʻi ha mele fakaesino?

Ko e hā te ke liliu ʻi ho fōtunga hā maí kapau te ke malava? (Fili ʻa e meʻa te ke faí.)

• MĀʻOLUNGA

• MAMAFA

• LOUʻULU

• FUO ʻO E SINO

• MATA

• LANU ʻO E KILI

Kapau ʻokú ke tali ʻio ki he ʻuluaki ongo fehuʻí pea fili ʻa e tafaʻaki ʻe tolu pe lahi ange ʻi he fehuʻi hono tolú, fakakaukau ki heni: Ngalingali ko e vakai atu ʻa e niʻihi kehé kiate koé ʻoku ʻikai tatau ia mo e anga hoʻo fakakaukau hala kiate koé. ʻOku faingofua ke ke fuʻu hohaʻa tōtuʻa fekauʻaki mo ho fōtunga hā maí.—1 Sāmiuela 16:7.