FEHUʻI 10
ʻE Lava Fēfē ke Tokoniʻi Au ʻe he Tohi Tapú?
KO E HĀ TE KE FAÍ?
Sioloto atu ki he talanoa ko ení: ʻOku fakaʻuli atu ʻa Tēvita ʻo ne fakatokangaʻi ʻoku halaʻatā ke ne ʻilo ha meʻa ʻi he feituʻu ko iá. Ko e ngaahi fakaʻilonga halá mo e ngaahi fale ʻiloa he koló ʻoku fakahaaʻi mai ai ʻoku ʻikai ko e feituʻu eni ʻoku totonu ke ne aʻu ki ai he taimi ko iá. ʻOku fakatokangaʻi ʻe Tēvita ʻokú ne hē. ʻOku pau pē naʻá ne afe ʻi ha hala kehe lolotonga ʻene fonongá.
Kapau ko Tēvita koe, ko e hā te ke faí?
TUʻU PEA FAKAKAUKAU!
Ko e ngaahi meʻa eni ke ke fili mei aí:
A. Kole ki ha fakahinohino.
E. Ngāueʻaki ha mape pe ko ha GPS.
F. Hokohoko atu hoʻo fakaʻulí mo e ʻamanaki te ke ʻilo pē ʻa e halá.
ʻOku hā mahino, ko e fili F heʻikai ke ola lelei.
Ko e fili E ʻoku lelei ange ia ʻi he fili ʻuluakí. Ko hono moʻoní, ko ha mape pe ko ha GPS ʻe tokoni lahi ia lolotonga ʻa e fonongá, ʻo tokoniʻi ai koe ke ne tataki ho halá.
ʻOku lava ʻe he Tohi Tapú ke ne tokoniʻi koe ʻi ha founga meimei tatau!
ʻOku lava ʻe he tohi fakataua lahi taha ko ení ʻo
tataki koe ʻi he ngaahi palopalema ʻo e moʻuí
tokoniʻi koe ke ke ako fekauʻaki mo koe pea ke ke hoko ko ha tokotaha lelei ange
fakahaaʻi atu ʻa e anga hono maʻu ʻa e founga moʻui lelei tahá
TALI ʻA E NGAAHI FEHUʻI MAHUʻINGA ʻI HE MOʻUÍ
Mei he mōmeniti pē ʻoku lava ke tau lea aí, ʻoku tau ʻeke ʻa e ngaahi fehuʻi.
Ko e hā ʻoku pulū ai ʻa e langí?
ʻOku faʻuʻaki ʻa e ngaahi fetuʻú ʻa e hā?
Ki mui ai, ʻoku kamata ke tau ʻeke ʻa e ngaahi fehuʻi fekauʻaki mo e māmani takatakai ʻiate kitautolú.
Ko e hā ʻoku hoko ai ʻa e faingataʻá?
Ko e hā ʻoku mate ai ʻa e kakaí?
Fēfē kapau ko e tali ki he ngaahi fehuʻi ko ení kuo fuoloa ʻene hā ʻi he Tohi Tapú?
ʻOku pehē ʻe he kakai tokolahi ko e Tohi Tapú ʻoku fonu ʻi he ngaahi talatupuʻa mo e ngaahi fananga kuo ʻolokuonga, pe ʻoku fuʻu faingataʻa ia ke mahinoʻi. Ka ko e moʻoni ko e palopalemá ʻa e Tohi Tapú pe ko e meʻa kuo fanongo ai ʻa e kakaí fekauʻaki mo e Tohi Tapú ʻa e palopalema moʻoní? Naʻe takihalaʻi kinautolu?
Ko e fakatātaá, ʻoku fakakaukau ʻa e kakaí ʻoku pehē ʻe he Tohi Tapú ʻoku puleʻi ʻe he ʻOtuá ʻa e māmaní. Ka ʻoku lava fēfē ke hoko ia? ʻOku kovi ʻaupito ʻa e māmani ko ení! ʻOku fonu ʻi he faingataʻá, mamahí, puké mo e maté, masivá mo e ngaahi fakatamakí. ʻE lava fēfē ke tukuakiʻi kotoa eni ki ha ʻOtua ʻofa?
Te ke saiʻia ke ke ʻiloʻi ʻa e talí? Te ke ʻohovale nai ʻi he meʻa ʻoku leaʻaki ʻe he Tohi Tapú ʻo fekauʻaki mo e tokotaha ʻokú ne puleʻi ʻa e māmaní!
Te ke fakatokangaʻi nai ko e ngaahi faleʻi ʻoku maʻu ʻi he polosiua ko ení ʻoku makatuʻunga ʻi he Tohi Tapú. ʻOku tuipau ʻa e Kau Fakamoʻoni ʻa Sihová ko e Tohi Tapú ko e matavai ia ʻo e tataki alafalalaʻanga. Koeʻuhí kuo “fakamānavaʻi ia ʻe he ʻOtuá pea ʻoku ʻaonga ki he akonaki, ki he valoki, ki he fakatonutonu.” (2 Tīmote 3:16, 17) ʻOku totonu ke ke sivisiviʻi ʻa e tohi motuʻa ko ení—ka ʻoku kei ʻaonga pē!