ʻOku Fēfē Hoʻo Vakai ki he Tohi Tapú?

KO E LAU ʻA E TOHI TAPÚ

“Ko e potu Folofola kotoa pē kuo fakamānavaʻi ia ʻe he ʻOtuá.”​—2 Tīmote 3:16, Liliu Tohi Tapu Māmani Foʻoú.

ʻAONGA TE KE MAʻU MEI AÍ

Tali fakafiemālie ki he ngaahi fehuʻi mahuʻinga ʻi he moʻuí.​—Palōveepi 2:1-5.

Tataki falalaʻanga ki he moʻui fakaʻahó.​—Saame 119:105.

ʻAmanaki moʻoni ki he kahaʻú.​—Loma 15:4.

TE TAU TUI MOʻONI KOĀ KI HE LAU ʻA E TOHI TAPÚ?

ʻIo, ʻi he ʻuhinga ʻe tolu:

• Fakaofo ʻene feongoongoí. Naʻe hiki ʻa e Tohi Tapú ʻi ha vahaʻa taimi ko e taʻu ʻe 1,600 ʻe he faʻahinga kehekehe ʻe toko 40 nai. Ko e tokolahi taha ʻo kinautolú naʻe ʻikai ʻaupito haʻanau feʻilongaki. Neongo ia, ʻoku feongoongoi ʻa e tohí ni kotoa ʻi ha foʻi kaveinga tefito pē ʻe taha!

• Kau hiki-tohi faitotonu. Ko e kau hiki-tohi ʻo e māmaní ʻoku hā ngali ʻoku nau fakavave ke fūfuuʻi ʻa e ngaahi ʻulungia ʻa honau kakaí. ʻI hono kehé, naʻe hiki faitotonu ʻe he kau hiki Tohi Tapú fakatouʻosi ʻa ʻenau ngaahi fehālaaki ʻanautolú pea mo honau puleʻangá.—2 Kalonikali 36:15, 16; Saame 51:1-4.

• Falalaʻanga ʻa hono ngaahi kikité. Naʻe tomuʻa tala ʻe he Tohi Tapú ʻi ha taʻu ia ʻe 200 nai ki muʻa ʻa hono fakaʻauha ʻo Pāpilone ko ha kolo ʻi he kuonga muʻá. (ʻAisea 13:17-22) Naʻe ʻikai ngata pē ʻi hono fakahaaʻi ai ʻa e founga ʻe tō ai ʻa Pāpiloné ka naʻa mo e hingoa ʻo e tokotaha te ne ikunaʻi iá!—ʻAisea 45:1-3.

Naʻe lahi mo e ngaahi kikite kehe ʻi he Tohi Tapú naʻe toe fakahoko ia ʻo aʻu ki he fakaikiiki siʻi tahá. Kae ʻikai ko e meʻa ia te tau ʻamanekina mei he Folofola ʻa e ʻOtuá?—2 Pita 1:21.