ʻE Toe Moʻui Mai Koā ʻa e Kau Maté?

KO E LAU ʻA E TOHI TAPÚ

“ʻE ʻi ai ʻa e toetuʻu.”​—Ngāue 24:15, Liliu Tohi Tapu Māmani Foʻoú.

ʻAONGA TE KE MAʻU MEI AÍ

Fiemālie ʻi he taimi ʻoku mate ai ʻa e faʻahinga ʻokú ke ʻofa aí.​—2 Kolinitō 1:3, 4.

Tauʻatāina mei he manavahē naʻá te mate.​—Hepelū 2:15.

Ko ha ʻamanaki moʻoni ke talitali lelei ʻa e faʻahinga naʻá ke ʻofa ai kuo maté.​—Sione 5:28, 29.

TE TAU TUI MOʻONI KOĀ KI HE LAU ʻA E TOHI TAPÚ?

ʻIo, ʻi he ʻuhinga ʻe tolu:

• Ko e ʻOtuá ko e Tokotaha-Fakatupu ʻo e moʻuí. ʻOku pehē ʻe he Tohi Tapú ko Sihova ko e ʻOtuá “ʻa e matavai ʻo e moʻuí.” (Saame 36:9; Ngāue 17:24, 25) Ko e Tokotaha naʻá ne foaki ʻa e moʻuí ki he ngaahi meʻamoʻui kotoa pē ʻoku malava moʻoni ke ne fakafoki ʻa e moʻuí ki ha taha naʻe mate.

• Naʻe fokotuʻu ʻe he ʻOtuá ʻa e tangatá ʻi he kuohilí. ʻOku fakamatala ʻa e Tohi Tapú ki he ngaahi tuʻunga ʻe valu ʻa ia ko e faʻahinga ʻo e tangatá—kei siʻi, taʻumotuʻa, tangata, mo e fefine—naʻe toe fokotuʻu mai kinautolu ke nau moʻui ʻi he māmaní. Naʻe mate ʻa e niʻihi ʻi ha vahaʻa taimi nounou, ka naʻe ʻi ha fonualoto ʻa e toko taha ʻi he ʻaho ʻe fā!—Sione 11:39-44.

• ʻOku vēkeveke ʻa e ʻOtuá ke ne toe fakahoko ia. ʻOku fehiʻa ʻa Sihova ʻi he maté; ʻokú ne vakai ki ai ko ha fili. (1 Kolinitō 15:26) ʻOkú ne “holi” ke ikunaʻi ʻa e fili ko iá, ke toʻo ʻa e maté ʻo fakafou ʻi he toetuʻú. ʻOkú ne fakaʻamu ke fokotuʻu ʻa e faʻahinga ʻoku ʻi heʻene manatú pea ke sio kia kinautolu ʻoku nau toe moʻui ʻi he māmaní.—Siope 14:14, 15.