Ko e hā ʻa e Puleʻanga ʻo e ʻOtuá?

KO E LAU ʻA E TOHI TAPÚ

“ʻE fokotuʻu ʻe he ʻOtua ʻo langí ha puleʻanga ʻa ia ʻe ʻikai ʻaupito ke fakaʻauha.”​—Taniela 2:44, Liliu Tohi Tapu Māmani Foʻoú.

“Kuo foaki mai kiate kitautolu ha foha: pea ʻe ʻi hono umá ʻa e founga-pule.”​—ʻAisea 9:6; fakamatala ʻi lalo.

ʻAONGA TE KE MAʻU MEI AÍ

• Ko ha puleʻanga māʻoniʻoni ʻe lava ke ke maʻu ʻaonga fakafoʻituitui mei ai.​—ʻAisea 48:17, 18.

• Ko ha māmani foʻou ka hoko mai, ko e moʻuí ʻe haohaoa mo fiefia.​—Fakahā 21:3, 4.

TE TAU TUI MOʻONI KOĀ KI HE LAU ʻA E TOHI TAPÚ?

ʻIo, ʻi he ʻuhinga ʻe ua:

• Naʻe fakahaaʻi ʻe Sīsū ʻa e meʻa ʻe fakahoko ʻe he Puleʻanga ʻo e ʻOtuá. Naʻe akoʻi ʻe Sīsū hono kau muimuí ke lotu ke hoko mai ʻa e Puleʻanga ʻo e ʻOtuá pea ke fai ʻa e finangalo ʻo e ʻOtuá ʻi māmani. (Mātiu 6:9, 10) Naʻe fakahaaʻi ʻe Sīsū ʻa e founga ʻe tali ai ʻa e lotu ko iá.

  Lolotonga ʻa e ʻi māmani ʻa Sīsuú, naʻá ne fafangaʻi ʻa e fiekaiá, fakamoʻui ʻa e puké pea fokotuʻu hake ʻa e kau maté! (Mātiu 15:29-38; Sione 11:38-44) ʻI he tuʻunga ko e Tokotaha-Pule ʻi he kahaʻú ʻo e Puleʻanga ʻo e ʻOtuá, naʻe tokonaki mai ʻe Sīsū ha tomuʻa fakaʻali fakaʻofoʻofa ʻo e meʻa ʻe fakahoko ʻe he Puleʻangá ki hono kakaí.​—Fakahā 11:15.

• ʻOku fakapapauʻi ʻe he ngaahi tuʻunga ʻo e māmaní ʻe vavé ni ke hoko mai ʻa e Puleʻanga ʻo e ʻOtuá. Naʻe tomuʻa tala ʻe Sīsū ko e ki muʻa pē ke ʻomai ʻe he Puleʻangá ʻa e melino ki he māmaní, ko hotau māmaní ʻe fonu ʻi he ngaahi tau, ngaahi honge, mo e ngaahi mofuike.​—Mātiu 24:3, 7.

  ʻOku tau sio ki he ngaahi tuʻunga tofu pē ko iá ʻi he ʻahó ni. Ko ia ʻoku lava ke tau falala-pau ko e Puleʻanga ʻo e ʻOtuá ʻe vavé ni ke ne fakangata kotoa ʻa e ngaahi palopalema peheé.