Maluʻi ʻe he ʻĀngelo ʻa Sihová ʻa Hesekaia

Naʻe ikunaʻi ʻe he Puleʻanga ʻAsīliá ʻa e puleʻanga matakali ʻe hongofulu ʻo ʻIsilelí. ʻI he taimi ko ení naʻe fiemaʻu ai ʻe Senakalipe, ko e tuʻi ʻo ʻAsīliá ke ne ikunaʻi ʻa e puleʻanga matakali ʻe ua ʻo Siutá. Naʻe kamata ke ne ikunaʻi taha taha ʻa e ngaahi kolo ʻo Siutá. Ka ko e kolo naʻá ne fiemaʻu lahi tahá ko Selusalema. Ko e meʻa naʻe ʻikai ke ʻilo ʻe Senakalipé naʻe maluʻi ʻe Sihova ia ʻa Selusalema.

Ko Hesekaia ʻa e tuʻi ʻo Siutá, naʻá ne totongi kia Senakalipe ha paʻanga lahi ke ne tukunoaʻi ʻa Selusalema. Neongo naʻe ʻave ʻe Senakalipe ʻa e paʻangá, naʻá ne kei fekauʻi atu pē ha fuʻu kau tau mālohi ke nau ʻohofi ʻa Selusalema. Naʻe ilifia ʻa e kakai ʻi he koló he ʻalu ke toe ofi mai ʻa e kau ʻAsīliá. Naʻe tala ange leva ʻe Hesekaia kiate kinautolu: ‘ʻOua ʻe ilifia. ʻOku mālohi ʻa e kau ʻAsīliá, ka ʻe ʻai ʻe Sihova ke tau toe mālohi ange ʻiate kinautolu.’

Naʻe fekauʻi atu ʻe Senakalipe ʻene talafekau, ko e Lapisake, ki Selusalema ke ne fakakataʻaki ʻa e kakaí. Naʻe tuʻu ʻa e Lapisaké ʻi he tuʻa koló ʻo kaila: ‘Heʻikai lava ke tokoniʻi kimoutolu ʻe Sihova. ʻOua ʻe tuku ke kākaaʻi kimoutolu ʻe Hesekaia. ʻOku ʻikai ha ʻotua ʻe lava ke ne maluʻi kimoutolu meiate kimautolu.’

Naʻe ʻeke ʻe Hesekaia kia Sihova pe ko e hā ʻa e meʻa te ne faí. Naʻe tali mai ʻe Sihova: ‘ʻOua ʻe ilifia ʻi he meʻa ʻoku leaʻaki ʻe he Lapisaké. ʻE ʻikai ke ikunaʻi ʻe Senakalipe ʻa Selusalema.’ Ko hono hokó, naʻe maʻu ʻe Hesekaia ha ngaahi tohi meia Senakalipe. Naʻe pehē ʻi he tohí: ‘Mou tukulolo. Heʻikai lava ke fakahaofi kimoutolu ʻe Sihova.’ Naʻe lotu ʻa Hesekaia: ‘ʻE Sihova, fakahaofi muʻa kimautolu, koeʻuhí ke ʻilo ʻe he tokotaha kotoa ko koe pē ʻa e ʻOtua moʻoní.’ Naʻe tala ange ʻe Sihova kiate ia: ‘Heʻikai haʻu ʻa e tuʻi ʻo ʻAsīliá ki Selusalema. Te u maluʻi ʻa hoku koló.’

Naʻe fakapapauʻi ʻe Senakalipe kuo vavé ni ke ne maʻu ʻa Selusalema. Ka ʻi he pō ʻe taha, naʻe fekauʻi mai ʻe Sihova ha ʻāngelo ki he feituʻu naʻe nofo ai ʻa e kau sōtiá ʻi he tuʻa koló. Naʻe tāmateʻi ʻe he ʻāngeló ʻa e kau sōtia ʻe toko 185,000! Naʻe mate ʻa e fuʻu kau sōtia mālohi ʻa Tuʻi Senakalipé. Naʻe ʻikai haʻane fili ke fai ka ko e foki pē ki ʻapi kuó ne foʻi. Naʻe maluʻi ʻe Sihova ʻa Hesekaia mo Selusalema, ʻo hangē pē ko ʻene palōmesí. Kapau naʻá ke ʻi Selusalema, naʻá ke mei falala kia Sihova?