Naʻe Tokoni ʻa e ʻOtuá kia Tuʻi Hesekaia

ʻOKÚ KE ʻilo pe ko e hā ʻoku lotu ai ʻa e tangata ko ʻení kia Sihová? Ko e hā hono ʻuhinga ʻokú ne tuku ai ʻa e ngaahi tohi ko ʻení ʻi muʻa ʻi he ʻōlita ʻo Sihová? Ko e tangatá ko Hesekaia. Ko e tuʻi ia ʻo e matakali ʻe ua ʻo ʻIsileli ʻi he tongá. Pea ʻokú ne faingataʻaʻia lahi. Ko e hā hono ʻuhingá?

Koeʻuhi naʻe ʻosi fakaʻauha ʻe he kau tau ʻAsīliá ʻa e matakali ʻe 10 ʻi he tokelaú. Naʻe tuku ʻeni ʻe Sihova ke hoko koeʻuhi he naʻe fuʻu kovi ʻaupito ʻa e kakai ko iá. Pea naʻe toki haʻu ʻa e kau tau ʻAsīliá ke tauʻi ʻa e puleʻanga matakali ʻe uá.

Naʻe toki ʻomai mei he tuʻi ʻo ʻAsīliá ha ngaahi tohi kia Tuʻi Hesekaia. Ko e ngaahi tohí ʻena naʻe tuku ʻe Hesekaia ʻi he ʻao ʻo e ʻOtuá. Naʻe fakakataʻaki ʻa Sihova ʻi he ngaahi tohí, mo fakahā kia Hesekaia ke ne tukulolo. Ko e ʻuhinga ia naʻe lotu ai ʻa Hesekaiá: ‘ʻE Sihova, fakahaofi kimautolu mei he tuʻi ʻo ʻAsīlia. Pea ʻe toki ʻilo ʻe he ngaahi fonua kotoa pē ko e ʻOtuá pē koe.’ ʻE fakaongo nai ʻa Sihova kia Hesekaia?

Ko e tuʻi lelei ʻa Hesekaia. Naʻe ʻikai ke hangē ia ko e ngaahi tuʻi kovi ʻo e matakali ʻe 10 ʻo ʻIsilelí, pe ke hangē ko ʻene tamai kovi ko Tuʻi ʻĀhasí. Naʻe mātuʻaki tokanga ʻa Hesekaia ke talangofua ki he ngaahi lao ʻa Sihová. Ko ia, ʻi he ʻosi ʻa e lotu ʻa Hesekaiá, naʻe ʻomai ʻe he palōfita ko ʻAiseá ʻa e pōpoaki ko ʻení meia Sihova: ‘Heʻikai ke hū mai ʻa e tuʻi ʻAsīliá ki Selusalema. ʻE ʻikai ke ʻi ai ha taha ʻo ʻene kau sōtiá ʻe ofi mai ki ai. ʻE ʻikai te nau fanaʻi ha foʻi ngahau ʻe taha ki he koló.’

Sio ki he fakatātā ʻi he peesi ko ʻení. ʻOkú ke ʻilo pe ko hai ʻa e kau sōtia mate kotoa ko ʻení? Ko e kau ʻAsīliá ia. Naʻe fekau mai ʻe Sihova haʻane ʻāngelo, pea ʻi he pō pē ʻe taha naʻe tāmateʻi ʻe he ʻāngeló ha kau sōtia ʻAsīlia ʻe toko 185,000. Ko ia naʻe foʻi leva ʻa e tuʻi ʻAsīliá peá ne foki ki hono fonuá.

Naʻe hao ʻa e puleʻanga matakali ʻe uá pea nofo melino ʻa e kakaí ʻi ha kiʻi taimi. Ka ʻi he hili ʻo e mate ʻa Hesekaiá naʻe hoko hono foha ko Manasé ko e tuʻi. Ko Manase mo hono foha naʻe hoko atu ai ko ʻĀmoni ko e ongo tuʻi fakatou kovi ʻaupito. Ko ia naʻe toe fonu ʻa e fonuá ʻi he faihiá mo e fakamālohí. ʻI hono fakapoongi ʻo Tuʻi ʻĀmoni ʻe heʻene kau sevāniti pē ʻaʻaná, naʻe hoko hono foha ko Siosaiá ko e tuʻi ki he puleʻanga matakali ʻe uá.