AKO 6

Fakamāʻalaʻala ʻa e Kaunga ʻo e Konga Tohi Tapú

Sione 10:33-36

MEʻA KE FAÍ: ʻOua ʻe lau pē ha konga Tohi Tapu pea hiki leva ki he poini hono hokó. Fakapapauʻi ʻoku maʻu ʻe hoʻo kau fanongó ha vakai māʻalaʻala ki he fekauʻaki ʻa e konga Tohi Tapu ʻokú ke laú mo e poini ʻokú ke ʻoatú.

FOUNGA KE FAI AI IÁ:

Fakamavaheʻi ʻa e ngaahi foʻi lea tefitó. Hili hono lau ha konga Tohi Tapu, fakamamafaʻi ʻa e ngaahi foʻi lea ʻoku fekauʻaki hangatonu mo hoʻo poini tefitó. Te ke fai nai eni ʻaki hoʻo toutou leaʻaki ʻa e ngaahi foʻi leá pe ʻeke ha fehuʻi te ne ʻai ʻa hoʻo kau fanongó ke nau ʻiloʻi ʻa e ngaahi foʻi lea tefitó.

Kapau te ke ngāueʻaki ha ngaahi foʻi lea kehe ke toe fakahaaʻi ʻa e fakakaukau ʻo e konga Tohi Tapú, fakapapauʻi ʻoku kei lava pē ke maʻu ʻe hoʻo kau fanongó ʻa e vakai māʻalaʻala ki he felāveʻi ʻa e ngaahi foʻi lea ʻi he Tohi Tapú mo hoʻo poini tefitó.
Fakamamafaʻi ʻa e poiní. Kapau ʻokú ke fakahaaʻi ha ʻuhinga māʻalaʻala ki hono lau ʻa e konga Tohi Tapú, fakamatalaʻi ʻa e felāveʻi ʻa e ngaahi foʻi lea tefito ʻo e konga Tohi Tapú mo e ʻuhinga ko iá.

ʻI hoʻo lāulea ki he konga Tohi Tapú, tuku fakaava hoʻo Tohi Tapú. ʻOku tokoni eni ki hoʻo kau fanongó ke nau fakafekauʻaki hoʻo leá mo e veesi naʻá ke toki laú.
ʻAi ke faingofua ʻa e founga ke ngāueʻaki ai ʻa e vēsí. Fakaʻehiʻehi mei he lave ki he ngaahi fakaikiiki ʻikai fiemaʻu ʻa ia ʻoku ʻikai poupou ki he poini tefitó. Makatuʻunga ʻi he meʻa kuo ʻosi ʻiloʻi ʻe hoʻo kau fanongó fekauʻaki mo e kaveingá, fakapapauʻi ʻa e lahi ʻo e ngaahi moʻoniʻi meʻa ʻoku fiemaʻu ke ʻai ai ʻa e poini ʻokú ke loto ke nau ngāueʻakí ke māʻalaʻala mo mahinongofua.