AKO 18

Fakatupu-ʻIlo ki Hoʻo Kau Fanongó

1 Kolinitō 9:19-23

MEʻA KE FAÍ: Ueʻi ʻa e fakakaukau ʻa hoʻo kau fanongó pea ʻai ke nau ongoʻi kuo nau ako ha meʻa ʻoku ʻaonga.

Fakakaukau ki he meʻa kuo ʻosi ʻiloʻi ʻe hoʻo kau fanongó. ʻI he ʻikai toe leaʻaki ʻa e meʻa kuo nau ʻosi fanongo ai ki muʻá, tokoniʻi kinautolu ke vakai ki he kaveingá mei ha tafaʻaki foʻou.

Fakamatalaʻi vave pē ʻa e ngaahi poini anga-mahení, kae māmālie ʻi hono fakamatalaʻi ʻa e ngaahi fakakaukau foʻoú.
Fekumi mo fakalaulauloto. ʻI he taimi ʻe malava aí, fakakau ʻa e ngaahi moʻoni ʻikai anga-mahení pe ngaahi meʻa ʻoku lolotonga hokó ke fakatātaaʻiʻaki ʻa e ngaahi fakakaukau tefitó. Fakakaukau fakamātoato fekauʻaki mo hoʻo fakamatalá pea mo e fekauʻaki ʻa e fakamatalá mo e ngaahi moʻoni ʻokú ke fakataumuʻa ke fakahāʻí.

ʻI hoʻo sivisiviʻi ʻa e fakamatalá, ueʻi hoʻo fakakaukaú tonu ʻaki hono ʻeke hifo ʻa e ngaahi fehuʻi hangē ko e, ‘ko e hā, ko e hā hono ʻuhingá, ʻanefē, ko fē, ko hai, mo e anga-fēfē.’ ʻAi ke longomoʻui ʻa hoʻo faiakó ʻaki hono ʻeke mo tali ʻa e niʻihi ʻo e ngaahi fehuʻi ko iá ʻi hoʻo malangá.
Fakahaaʻi ʻa e ʻaonga ʻa hoʻo pōpoakí. Fakamatalaʻi ʻa e founga ʻe tokoni ai ʻa e ngaahi poini Fakatohitapú ki he moʻui fakaʻaho ʻa hoʻo kau fanongó. Lāulea ki ha ngaahi tuʻunga pau, tōʻonga, mo e ngāue ʻa ia ʻoku mahuʻinga ki hoʻo kau fanongó.