NGAOHI ĀKONGA
LĒSONI 10
Līʻoa
Tefitoʻi Moʻoní: “Naʻa mau fakapapauʻi ai ke ʻoatu kiate kimoutolu, ʻo ʻikai ngata pē ʻi he ongoongo lelei ʻa e ʻOtuá kae toe pehē foki mo kimautolu tonu, koeʻuhí naʻa mou hoko ko e faʻahinga mātuʻaki ʻofeina kiate kimautolu.”—1 Tes. 2:8.
Meʻa Naʻe Fai ʻe Sīsuú
1. Sio ʻi he VITIOÓ, pe lau ʻa e Sione 3:1, 2. Fakakaukau leva ki he ongo fehuʻi ko ení:
a. Ko e hā nai naʻe fili ai ʻa Nikotīmasi ke ʻaʻahi kia Sīsū ʻi he taimi poʻulí?—Sio ki he Sione 12:42, 43.
e. Naʻe anga-fēfē hono fakahaaʻi ʻe Sīsū ʻa e līʻoa ki he ngaohi ākongá ʻi heʻene fetaulaki mo Nikotīmasi ʻi he poʻulí?
Ko e Hā ʻOku Tau Ako meia Sīsuú?
2. ʻOku tau fakahaaʻi ʻoku tau ʻofa ki he kakaí ʻaki ʻetau līʻoa ʻi hono tokoniʻi kinautolu ke nau hoko ko e kau ākonga.
Faʻifaʻitaki kia Sīsū
3. Ako ʻi he taimi mo e feituʻu ʻoku feʻungamālie ki hoʻo tokotaha ako Tohi Tapú. Te ne fili nai ha ʻaho pau ʻo e uiké pe ko ha taimi pau lolotonga ʻa e ʻahó. Te ne ongoʻi fiemālie ange ke ako ʻi heʻene ngāueʻangá, ʻi hono ʻapí pe ʻi ha feituʻu kakai? ʻI he tuʻunga lahi taha ʻe ala lavá, feʻunuʻaki hoʻo taimi-tēpilé ʻo fakatatau ki heʻene ngaahi fiemaʻú.
4. Ako tuʻumaʻu. Kapau te ke mavahe, ʻoua ʻe kaniseli ʻa e akó. ʻI hono kehé, fakakaukau angé:
a. ʻE lava ke ke fai ʻa e akó ʻi ha taimi kehe lolotonga ʻa e uike ko iá?
e. ʻE lava ke ke fai hoʻo akó fakafou ʻi he telefoní pe tā vitiō?
f. ʻE lava ke ke kole ki ha tokotaha malanga ʻe taha ke ne fai ʻa e akó?
5. Lotu ke maʻu ʻa e vakai totonú. Kole kia Sihova ki ha tokoni ke ʻoua te ke foʻi ʻi hoʻo tokotaha akó, neongo kapau ʻokú ne fāinga ke ako tuʻumaʻu pe ke ngāueʻaki ʻa e akonaki mei he Tohi Tapú. (Fil. 2:13) ʻOku ngalingali ʻoku maʻu ʻe hoʻo tokotaha akó ʻa e ngaahi ʻulungaanga lelei; lotu ki ha tokoni ke ke tokangataha ki ai.