Fai Fakamoʻoni ʻi he Pisinisi Founga Faka-Siapani
KO E fekau ʻa Sīsū Kalaisi ke fai ʻa e ngāue fakaefakamoʻoní ke “aʻu ki he ngataʻanga ʻo māmani” ʻoku kau ki ai mo e ngaahi feituʻu pisinisí. (Ngāue 1:8) ʻI Siapani, ko e fai ʻa e fakamoʻoni ʻo e Puleʻangá ki he kakai ʻoku nau nḡaue ʻi he ngaahi potungāue fakafonuá mo e ngaahi ʻōfisi ʻo e ngaahi kautaha lalahí ʻoku hoko ia ko ha pole moʻoni. Naʻe maʻu ha ngofua ʻa ha kau malanga ʻo e Puleʻangá ʻi ha fakatahaʻanga ʻe taha ke fai ha fakamoʻoni mo e makasini ʻi ha ʻōfisi ʻo e koló ʻi he lolotonga ʻo e taimi kai hoʻataá. Naʻe ʻikai ke ngata pē ʻi he lotu ʻa e kau malangá kia Sihova ke ne ʻoange ha lototoʻá ka naʻa nau fuʻu tokanga ʻaupito ki honau valá mo e ʻulungaangá pea aʻu ʻo nau teuteu ʻa e kaati ʻoku hā ai honau hingoá pea fakahaaʻi ai kinautolu ko e Kau Fakamoʻoni ʻa Sihova.
Naʻe fakaofiofi atu nai ha tokotaha malanga ki ha tokotaha ʻo e kau ngāué, ʻo ne pehē: “Kātaki, kuó u maʻu ha ngofua ke talanoa mo e kakai ʻi hení. Te ke loto ke fanongo pē mo ke kai?” Naʻe pau ke fakahā ʻe he Kau Fakamoʻoni ʻa e fakakaukau lelei pea mo ngāueʻaki ha ngaahi lea kuo “fakaifo ʻaki ha masima.” (Kolose 4:6) ʻI heʻenau ʻuluaki ʻaʻahí, naʻa nau tufa ai ha ngaahi makasini ʻe 39, ka naʻe feʻunga mo e ʻaʻahi tuʻo fā pea toki ʻosi ʻa e fale fungavaka-valú ni fakakātoa ʻa ia ʻoku ngāue ai ʻa e kakai ʻe toko 1,500. Naʻa nau tufa ʻa e ngaahi makasini naʻe laka hake ʻi he teau pea naʻa nau malava ke kamata ha ngaahi tufaʻanga makasini pau mo fai ha ngaahi toe foki.
Ko e taha ʻo e kau malangá naʻe fai ʻene toe foki ki he pulé. ʻI heʻene fanongo ki he lau ʻo e ngaahi konga Tohitapú mei he New World Translation, naʻá ne pehē: “Ko e Tohitapu ko ʻeni ʻoku faingofua ke mahino. Ko e Tohitapu naʻá ku lau ki muʻá ko ha Tohitapu fakaeonoʻaho faka-Siapani pea naʻe faingataʻa ʻaupito ke lau.” Naʻe ʻoatu kiate ia ʻi he uike hono hokó ʻa e tatau ʻo e New World Translation.
ʻE lava ke toe lahi ange hoʻo malanga ʻi he kauhala ʻo hoʻo fakatahaʻangá ke malangaʻi ʻa e ongoongo lelei ki “he kakai kotoa pe,” ʻo kau ki ai mo kinautolu ʻi he ngaahi feituʻu fakapisinisí?—Fehoanaki mo 1 Tīmote 2:4.