Founga ke Malanga Ai ʻi he Feituʻu Pisinisí
1. Ko e hā ha ngaahi ʻaonga ʻo e faifakamoʻoni ʻi he feituʻu pisinisí?
1 Te ke saiʻia ke malanga ʻi he feituʻu ʻa ia ʻoku faʻa talitali lelei ai ʻe he kakaí ʻa e kau ʻaʻahí pea ʻoku tātātaha ai ʻa e faʻahinga ʻoku ʻikai-ʻi-ʻapí? Te ke malava nai ke hokosia ia ʻi ho feituʻu fakatahaʻangá tonu. Anga-fēfē? ʻAki ʻa e ʻaʻahi ki he ngaahi pisinisi ʻi aí. Ko e kau malanga ʻoku faifakamoʻoni mei he falekoloa ki he falekoloá ʻoku nau faʻa maʻu ʻa e ngaahi ola lelei.
2. ʻE lava fēfē ke fokotuʻutuʻu maau ʻa e faifakamoʻoni ʻi he feituʻu pisinisí?
2 ʻOku maʻu ʻe he ngaahi fakatahaʻanga ʻe niʻihi ʻa e ngaahi feituʻu pisinisí ko e konga ia ʻo ʻenau feituʻu kuo vaheʻí. Ko e tokoua ʻokú ne tokangaʻi ʻa e feituʻú te ne teuteuʻi nai ʻa e ngaahi kaati mape makehe ʻo e ngaahi feituʻu pisinisi fihituʻu ko ení. Ko ha ngaahi kaati mape nofoʻanga pē he feituʻú ʻoku kau ai ʻa e ngaahi vāhenga pisinisí ʻoku totonu ke fakahaaʻi ai ʻoku ʻikai fiemaʻu ke ngāueʻi ia ko e konga ʻo e feituʻu nofoʻangá. ʻI he ngaahi feituʻu kehé, ʻoku lava ke ngāueʻi ai ʻi he taimi tatau ʻa e ngaahi pisinisí fakataha mo e ngaahi nofoʻangá. Kapau kuo teʻeki ai ʻaupito te ke faifakamoʻoni ʻi he feituʻu pisinisí, ʻahiʻahi kamata ʻi he fanga kiʻi falekoloa iiki angé.
3. Ko e hā te ne tokoniʻi kitautolu ke hoko ai ʻo ola lelei ʻi he faifakamoʻoni mei he falekoloa ki he falekoloá?
3 Ngāueʻaki ha Fakaofiofi Faingofua: ʻI he faifakamoʻoni mei he falekoloa ki he falekoloá, ʻoku mahuʻinga ke ʻai vala ʻo hangē pē ko haʻo ʻalu ki ha fakataha ʻi he Fale Fakatahaʻangá. ʻOku toe lelei ke fili ha taimi ʻoku ʻikai ke femoʻuekina ai ʻa e falekoloá. Kapau ʻe ala lava, hū ki ai ʻi he taimi ʻoku ʻikai ke tatali ai ha kau kasitomā ke tokangaʻi kinautolú. Kole ke ke lea ki he pule ngāué pe ko e tokotaha ʻokú ne tokangaʻí. ʻAi ke nounou mo fakahangatonu ki he poiní. Ko e hā nai te ke leaʻakí?
4-6. Ko e hā ʻe lava ke tau leaʻaki ʻi he faifakamoʻoni ki ha tauhi koloa pe pule ngāué?
4 ʻI he talanoa mo ha tauhi koloa pe pule ngāué, te ke leaʻaki nai ha meʻa hangē ko ení: “Ko e kakai pisinisí ʻoku nau maʻu ha taimi-tēpile femoʻuekina ʻo tātātaha ai ke mau maʻu kinautolu ʻi ʻapi, ko ia ʻoku mau ʻaʻahi mai ai kia kimoutolu ʻi homou feituʻu ngāué. Ko ʻemau ngaahi makasiní ʻoku ʻomai ai ha vakai fakaemāmani lahi ki he ngaahi meʻa ʻoku lolotonga hokó.” Fakaʻaliʻali leva ha poini nounou mei ha makasini ʻe taha.
5 Pe te ke ʻahiʻahi nai ʻa e fakaofiofi faingofua ko ení: “ʻE saiʻia ʻa e kakai tokolahi ke ʻiloʻi ʻa e meʻa lahi ange fekauʻaki mo e Tohi Tapú ka ʻoku siʻi ʻaupito honau taimí. ʻOku fakamatala ʻa e tuleki ko ení ki ha polokalama ako taʻetotongi ʻa ia ʻoku ala maʻu ke tokoniʻi ai koe ke ke maʻu ʻa e ngaahi tali ki hoʻo ngaahi fehuʻi Fakatohitapú.” Fakahaaʻi ange leva ʻa e peesi 4-5 ʻo e tuleki Te Ke Saiʻia ke ʻIlo Lahi Ange ki he Tohitapú?
6 Kapau ʻoku hā ngali moʻua ʻa e tokotaha ʻokú ne tokangaʻí, te ke tuʻuaki ange pē nai ha tuleki pea pehē: “Te u toe ʻaʻahi mai ʻi he taimi ʻoku ʻikai te ke fuʻu femoʻuekina aí. Te u saiʻia ke ʻiloʻi ʻa hoʻo fakakaukau fekauʻaki mo e tulekí ni.”
7. ʻE lava fēfē ke tau fakatupulekina ʻa e mahuʻingaʻia ʻoku tau maʻu ʻi he feituʻu pisinisí?
7 Fakatupulekina ʻa e Mahuʻingaʻia ʻOku Fakahāhaá: ʻE aʻu nai ʻo ke malava ke fai ha ako Tohi Tapu ʻi he feituʻu pisinisí. Naʻe ʻave maʻu pē ʻe ha tāimuʻa makehe ʻa e ngaahi makasiní ki ha tangata pisinisi. ʻI he taimi naʻe fakahaaʻi ai ʻe he tangatá ʻa e mahuʻingaʻia ʻi he meʻa naʻá ne laú, naʻe fakahāhaaʻi ai ʻe he tāimuʻá ʻa e fokotuʻutuʻu ako Tohi Tapú, ʻo ngāueʻaki ʻa e polosiua Fiemaʻu. Naʻe fokotuʻu tonu ai ha ako ʻi he feituʻu ngāue ʻo e tangatá. ʻI he tokanga ki he ngaahi tuʻungá, naʻe fakangatangata ʻe he tāimuʻá ʻa e akó ki he miniti ʻe 10 pe 15 ʻi he taimi taki taha. ʻOfa ke tau fai pehē ʻo hokohoko atu ʻa e kumi ki he faʻahinga tāú ʻaki ʻa e faifakamoʻoni ʻi he feituʻu pisinisí.