ʻOku ʻI Ai Hao Feituʻu Ngāue Fakafoʻituitui?

1. Ko e hā ʻa e feituʻu ngāue fakafoʻituitui?

¹ Ko ha feituʻu ngāue fakafoʻituitui ko ha feituʻu ʻoku vaheʻi atu kiate koe. Ko ha feituʻu nai ia ʻoku ofi atu koeʻuhí ke ke lava ʻo aʻu vave ki ai pea malanga toko taha ai pe ko haʻo ngāue mo ha tokotaha malanga kehe. Neongo ʻoku ʻaonga ke poupouʻi ʻa e ngaahi fokotuʻutuʻu ʻa e fakatahaʻangá fekauʻaki mo e faifakamoʻoni fakakulupú ʻo ka malava, ko hono maʻu ha feituʻu ngāue fakafoʻituitui ke ngāue ai ʻi ha ngaahi taimi kehé ʻe tokoni ia ki hono fai ha fakamoʻoni fakaʻāuliliki, tautefito ki he ngaahi fakatahaʻanga ʻoku lahi ʻenau feituʻu ngāué.—Ng. 10:42.

2. Ko e hā ʻa e ʻaonga ʻe niʻihi ʻo hono maʻu ha feituʻu ngāue fakafoʻituitui?

² Ngaahi ʻAonga: Kuo toe maʻu ʻaonga lahi ange ʻa e niʻihi ʻi he malanga ʻi ha feituʻu ngāue fakafoʻituitui ʻoku ofi ki heʻenau ngāueʻangá he lolotonga ʻa ʻenau taimi mālōlō hoʻataá pe ko e hili pē ʻa e ngāué. ʻOku fiefia ʻa e niʻihi ʻi he ngāue fakataha ko ha fāmili ʻi honau ngaahi kaungāʻapí ʻi ha houa ʻe taha pe ua ki muʻa ʻi he Ako Tohi ʻa e Fakatahaʻangá. Ko e olá, ko e ngaahi toe ʻaʻahi mo e ngaahi ako Tohi Tapu ʻoku maʻú ʻe ʻi ha feituʻu pē ʻoku ofi, ʻa ia ʻe faingofua ai ʻa e feingá, ʻikai mole taimi pea ʻikai ke fuʻu fakamole. Koeʻuhí ʻe malava ai ke lavaʻi ha meʻa lahi ange ʻi ha kiʻi taimi nounou, ko e ʻi ai ʻo ha feituʻu ngāue fakafoʻituituí ʻe tokoni nai ia ki ha niʻihi ke nau tāimuʻa tokoni mei he taimi ki he taimi pe naʻa mo e kau ki he tāimuʻa tuʻumaʻú. Tānaki atu ki ai, ko e ngāue ʻi he feituʻu ngāue fakafoʻituituí pea maheni ange ai mo e kakaí ʻe lava ke tokoniʻi ai kitautolu ki hano maʻu ʻenau falalá pea feʻunuʻaki ai ʻetau tuʻuakí ke fakatatau ki he meʻa ʻoku nau tokanga ki aí ʻo ʻai ai ke toe ola lelei ange ʻetau ngāue fakafaifekaú.

3. Ko e hā ʻa e meʻa naʻe hokosia ʻe he tāimuʻa ʻe taha ʻi haʻane kole ki ha feituʻu ngāue fakafoʻituitui?

³ ʻOku pehē ʻe ha tāimuʻa ʻe taha, ʻa ia naʻe fakalototoʻaʻi ʻe he ʻovasia sēketí ke ne kole ki ha feituʻu ngāue fakafoʻituitui: “Naʻá ku tali ʻa e faleʻi ko ʻení pea vave ai ʻa ʻeku maheni mo e kakai ʻi hoku feituʻu ngāué. Naʻá ku feʻunuʻaki ʻeku ngaahi taimi ʻaʻahí ke feʻungamālie ki honau taimi ʻataá. Ko hono olá, naʻe mahiki hake ai ʻeku toe ʻaʻahí mei he 35 ʻo laka he 80 ʻi he māhina, pea maʻu mo ʻeku ako Tohi Tapu ʻe fitu.”

4. ʻE lava fēfē nai ke ke maʻu mo ngāueʻi ha feituʻu ngāue fakafoʻituitui?

⁴ Founga ke Maʻu Ai Iá: Kapau ʻokú ke loto ke kole ha feituʻu ngāue fakafoʻituitui, talanoa mo e sevāniti ʻokú ne tokangaʻi ʻa e feituʻu ngāué. Ongoʻi tauʻatāina ke fakaafeʻi ha tokotaha malanga kehe ke mo ngāue, pea tauhi ha lēkooti ʻo e ngaahi ʻapi ʻoku ʻikai ʻi ai ha tahá. ʻOku totonu ke ke feinga ke ʻosiki ʻa e feituʻu ngāué ʻi loto ʻi he māhina ʻe fā. Kapau ʻoku faingataʻa ke ke fai pehē, ʻe lava ke ke kole ki hoʻo ʻovasia Ako Tohí pe ki ha niʻihi kehe ke nau tokoni atu. ʻI he ʻosi ʻa e māhina ʻe faá, ʻe lava ke fakafoki ʻa e feituʻu ngāué kotoa pe ko hoʻo kole ke ke toe ngāueʻi ia. Kae kehe, ʻoku ʻikai totonu ke ke tauhi taʻengata ʻa e feituʻu ngāue tatau kae fakafoki ia koeʻuhí ke kole nai ki ai ha niʻihi kehe. Kapau ʻokú ke ʻi ha fakatahaʻanga ʻoku siʻisiʻi ai ʻa e feituʻu ngāué pea ʻoku ʻikai malava ke maʻu ha feituʻu ngāue fakafoʻituitui, mahalo ʻe lava ke ke kole ha kiʻi feituʻu mei hoʻo ʻovasia ako tohí.

5. Ko e hā ʻoku fiemaʻú kae lava ke fakahoko ʻa e fekau ke malangá?

⁵ Ko e fekau ke tau malanga “ki mamani katoa” ko ha ngāue lahi. (Mt. 24:14) ʻOku fiemaʻu ki ai ʻa e ngāue feongoongoi. Ko hono tānaki atu ki he faifakamoʻoni fakakulupú ʻa e malanga ʻi ha feituʻu ngāue fakafoʻituituí ʻe lava ke tokoni ia kia kitautolu ke tau aʻu ai mo e ongoongo leleí ki he kakai tokolahi taha ʻe malavá.