Puha Fehuʻi

◼ ʻOku totonu ke fakaʻaliʻali ʻe he fakatahaʻangá ha mape ʻo ha feituʻu kakato ʻi he Fale Fakatahaʻangá?

ʻIo, ko ha mape kakato ʻo e feituʻú ʻoku totonu ke fokotuʻu ia ʻi hano ʻesia pea fakaʻaliʻali ʻi ha holisi ʻi he Fale Fakatahaʻangá. ʻOku ʻikai totonu ke fokotuʻu ʻa e mapé ʻi he papa fakamatalá. ʻOku totonu ke fakahaaʻi ai ʻa e ngataʻanga fakalūkufua ʻo e feituʻu kuo vaheʻi ki he fakatahaʻangá pea mo e ngaahi ngataʻanga ʻo e feituʻu tāutaha taki taha fakataha mo hono fika kuo vaheʻí. ʻOku totonu ke fakahaaʻi ʻa e ngaahi ngataʻanga ʻo e feituʻu ʻo e ngaahi fakatahaʻanga kotoa ʻoku nau ngāueʻaki ʻa e Fale Fakatahaʻanga tataú. ʻE tokoni ʻeni ki he kau malangá pea mo e faʻahinga mahuʻingaʻia foʻoú fakatouʻosi ke nau fakapapauʻi ʻa e feituʻu fakatahaʻanga ko ia ʻoku nau nofo aí. Ko hono fakahaaʻi ʻo e ngaahi feituʻu faiʻanga Ako tohi ʻa e Fakatahaʻangá ʻi he mapé ʻe toe tokoni ia ki he tokotaha kotoa pē ke nau ʻiloʻi ʻa e ako tohi ʻoku vaheʻi kinautolu ki aí. ʻOku totonu ke tauhi ʻa e mapé ke feʻunga mo e taimí.

Ko hono fakaʻaliʻali ʻo ha mape pehē ʻoku hoko ia ko ha fakamanatu ki he kau malanga kotoa pē, kapau ʻe malava, ʻe lelei ke nau maʻu ha vāhenga feituʻu malanga fakafoʻituitui. ʻOku ʻaonga lahi ʻa e mapé ki he faʻahinga ko ia ʻoku nau saiʻia ke fili ha feituʻu ofi ki honau ʻapí. ʻE hoko nai ia ʻi he taimi ʻe niʻihi ko hano maluʻi ʻo e taimi ki he ngaahi fakataha ki he ngāue fakamalangá, pea malava ai ki he faiakó ke ne fakahinohino ʻa e kulupu ʻo e kau malanga taki taha he vave tahá ki he feituʻu ʻoku vaheʻi ke nau ngāue aí.

ʻOku toe ʻomai ʻe he mapé ha fakamoʻoni ʻoku fokotuʻutuʻu ʻa e fakatahaʻangá ke malangaʻi fakaʻāuliliki ʻa e pōpoaki ʻo e Puleʻangá ʻi hono feituʻu ʻoku vaheʻi ki aí.—Luke 9:6.