Tauhi Maʻu ʻa e Tui ʻi he ʻOtuá mo Kalaisi
Ngaahi Meʻa Mahuʻinga mei he Tohi Kolosé
KO E TUI ki he ʻOtua ko Sihová pea mo Sīsū Kalaisí ko e meʻa mātuʻaki mahuʻinga ia ki he fakamoʻuí. Ka ko e pole ke tauhi maʻu ʻa e tui ko iá. Naʻe hoko ia ʻo pehē ki he kau Kalisitiane ʻi Kolosé, ko e kolo ʻi he tafaʻaki fakahahake ʻo ʻEfesō ʻi ʻĒsia Minú. Ko e hā? Koeʻuhi naʻe fokotuʻu hala ʻe he kau faiako loi ʻi aí ʻo nau pehē ʻoku fakatuʻunga ʻa e fakamoʻuí ʻi he kamu, ʻi he meʻa ʻoku kai ʻe ha taha, pea mo hono tauhi ʻo e ngaahi lao ʻe niʻihi.
ʻOku mahino leva, naʻe tokanga ʻa e ʻapositolo ko Paulá ʻo kau ki he tuʻunga lelei fakalaumālie ʻo e kau Kalisitiane ʻi Kolosé, pea naʻá ne fiemaʻu moʻoni ke tauhi maʻu ʻenau tui ki he ʻOtuá mo Kalaisi. Ko ia ʻi he konga ki mui ʻo hono ʻuluaki tuku pōpulaʻi ʻi Loma ʻo e ʻapositoló (he taʻu 60-61 T.S. nai), naʻá ne fai ki he kau Kolose ha tohi naʻe faʻufaʻu ke fakafepakiʻi ʻa e ngaahi fakakaukau halá pea langa hake ʻenau tuí. Tau vakai ange ki he anga ʻo ʻetau maʻu ha ʻaonga mei he ngaahi lea ʻofa ʻa e ʻapositoló.
Houngaʻia ʻi he Tuʻunga ʻo Kalaisí
ʻI he kamata ʻene tohí, naʻe fakaeʻa ʻe Paula ʻa e houngaʻia ki he tuʻunga ʻo Sīsuú. (1:1–2:12) Naʻá ne fakaongoongoleleiʻi ʻa e kau Kolosé ʻi heʻenau tui ʻo fekauʻaki mo Kalaisí pea mo ʻenau ʻofa ki honau kaungā-tuí. Naʻe lave ʻa Paula ʻo kau ki he tuʻunga māʻolunga ʻo Kalaisí ko e Tokotaha ia naʻe fakafou mai ai ʻa hono fakatupu ʻo e ngaahi meʻa kehe kotoa pē, ko e ʻUlu ʻo e fakatahaʻangá, pea mo e ʻuluaki fakatupu mei he pekiá. Ko e maʻu ha fakalelei mei he ʻOtuá ʻoku fakafou mai ia ʻia Kalaisi, ʻa ia ʻoku fufū ai ʻa e ngaahi koloa kotoa ʻo e potó mo e ʻiló. Koeʻuhi ko e meʻá ni, ʻoku totonu ki he kau Kalisitiané ke nau hoko atu ʻenau laka fāʻūtaha mo Kalaisí pea ʻoua ʻe fakaʻatā ha taha ke ne tākiekina kinautolu ʻi he filōsefa fakaetangatá.
Fakafou ʻia Kalaisi, naʻe toʻo atu ai ʻe he ʻOtuá ʻa e Laó. (2:13-23) Naʻe tuki fakaefakatātā ia ki he ʻakau fakamamahi naʻe pekia ai ʻa Sīsuú. Ko e ngaahi meʻa ko ia naʻe fiemaʻu ʻe he Laó naʻe hoko pē ko e “ʻata pe ʻo ha ngaahi meʻa ka hoko, ka ko e sino ʻo e ngaahi meʻa ko ia ʻoku tefito kia Kalaisi.” Pea ʻi he piki ke maʻu kia Kalaisí, pea ʻe ʻikai ke nau fakaʻatā ai ha tangata ke ne fakamasivaʻi kinautolu mei he pale ko ia ko e moʻui taʻefaʻamate ʻi hēvaní.
Houngaʻia ʻi he ʻOtuá mo Kalaisi
Naʻe toki naʻinaʻi ʻa Paula ki he kakai Kolosé ke nau ʻai ʻa e angaʻitangata foʻoú pea mo anganofo ki he mafai ʻo Sīsū Kalaisí. (3:1-17) Te nau ʻai ke muʻomuʻa ʻi heʻenau moʻuí ʻa e ngaahi meʻa fakalaumālié ʻaki ʻenau tauhi maʻu ʻenau fakakaukaú ʻi he ngaahi meʻa ʻi ʻolungá. Naʻe fiemaʻu heni kiate kinautolu ke nau tuku atu ʻa e ngaahi fakakaukau mo e ngaahi lea halá. Hono ʻikai ko ha tāpuaki ia kiate kinautolu ʻo kapau te nau kofuʻaki ʻa e ngaahi ʻulungaanga ʻo hangē ko e manavaʻofa, anga-fakatōkilalo, mo e ʻofá! ʻE puleʻi ʻe he melino ʻa Kalaisí ʻa honau lotó ʻo kapau te nau fai ʻa e meʻa kotoa pē ʻi he huafa ʻo Kalaisí ʻo fakamālō ki he ʻOtuá ʻo fakafou ʻiate ia.
ʻOku toe totonu foki ke uesia ʻe he houngaʻia ʻi he ʻOtua ko Sihová mo Sīsū Kalaisi ʻa e ngaahi vahaʻangatae ʻo ha Kalisitiane ki he niʻihi kehé. (3:18–4:18) Naʻe totonu ki he ngaahi uaifí, ngaahi husepānití, fānaú, kau pōpulá, mo e kau pulé ke nau fakahoko honau ngaahi fatongiá ʻi he manavahē ki he ʻOtuá pea mo e ʻiloʻi ʻo Kalaisí. Pea ko e meʻa ʻoku ʻikai ke ala tuku ʻa e kītaki ʻi he lotu pea ʻaʻeva ʻi he potó!
ʻOku malava ke tokoniʻi ʻa kitautolu ʻe he tohi ʻa Paula ki he kau Kolosé ke fakaʻehiʻehi mei he ngaahi akonaki hala ʻa ia te nau fakamasivaʻi ʻa kitautolu mei he pale ko e moʻuí. Ko e fakamamafa naʻe fai ʻe he ʻapositoló ki hono ʻiloʻi ʻo e mafai ʻo Sihová pea mo hono ʻAló ʻoku malava ke hoko ia ko e tākiekina lelei ʻi heʻetau feangai mo e niʻihi kehé. Pea ʻoku fakapapauʻi ʻe ʻi ai ʻa e ngaahi tāpuaki lahi ʻo kapau te tau tauhi maʻu ʻetau tui ʻi he ʻOtuá mo Kalaisi.
[Puha/Fakatātā ʻi he peesi 23]
Tohi ki he kau Leotīsiá: “Pea ka ʻosi leva ʻa e lau ʻo e ipiseli ni kiate kimoutolu,” ko e tohi ia naʻe fai ʻe Paula ki he kau Kolosé “pea tuku ke lau ia ʻi he siasi ʻo e kakai Leotisia, pea ke mou lau foki ʻa e ipiseli mei Leotisia.” (Kolose 4:16) Ko Leotīsiá ko ha kolo koloaʻia ʻi he tafaʻaki hihifo ʻo ʻĒsia Minú, ʻa ia naʻe fakafehokotaki ia ʻe he ngaahi hala mei he ngaahi kolo ʻo hangē ko Filatelifia mo ʻEfesō. ʻOku ngalingali naʻe aʻu ʻa e ngāue ʻa Paula ʻi ʻEfesoó ki Leotīsia, neongo naʻe ʻikai ke ne fai ha ngāue fakafaifekau ʻi ai. Naʻá ne ʻave ʻa e tohi ki he kau Kalisitiane ʻi Leotīsiá, neongo ʻoku tui ʻa e kau mataotao ʻe niʻihi ko e tatau ia ʻo e tohi naʻá ne fai ki he kau ʻEfesoó. Ko e tohi ki Leotīsiá ʻoku ʻikai ke maʻu ia ʻi he Tohitapú, mahalo pē koeʻuhi he naʻe ʻikai ke ʻi ai ha ngaahi fakamatala ia ʻe fiemaʻu kiate kitautolu ʻi he ʻaho ní, pe naʻe toe lave nai ai ki he ngaahi poini kuo feʻunga ʻa e lave ki ai ʻi he ngaahi tohi kehe ʻo e Tohitapú.
[Fakatātā]
Ko e ngaahi toetoenga ʻi Leotīsiá