Ngaahi Fehuʻi mei he Kau Lau Tohí

◼ ʻIa Mātiu 10:21, naʻe fakatokanga mai ai ʻe Sīsū kiate kitautolu ko e tokolahi ʻo e ngaahi tokoua ʻi he fakatahaʻangá te nau hanga ʻo fakafepakiʻi ʻa honau ngaahi tokoua fakalaumālié?

ʻIkai, naʻe ʻikai ko e ʻuhinga ia ʻa e fakatokanga ʻa Sīsuú, ʻa ia ʻoku pehē ni hono laú: “Pea ʻe fakaʻilo ʻe he taʻokete hono tehina, koeʻuhi ke tamateʻi, pea ko e tamai ʻene fanau: pea ʻe tuʻu ʻa e fanau ki heʻenau matuʻa ʻo tamateʻi kinautolu.”​—Mātiu 10:21.

ʻOku fakahā ʻe he potutohí ko e lea ko ʻeni ʻa Sīsū naʻe fai ki he kau ʻapositolo ʻe toko 12 ʻi heʻene fekau atu kinautolu ki ha fononga ngāue fakamalanga ʻi ʻIsileli. Ko e lahi ʻo e meʻa naʻá ne leaʻakí naʻe ʻuhinga tefito pē ia ki he kau ʻapositoló. Ko e fakatātaá, naʻá ne pehē kuo fakamafaiʻi kinautolu ke nau fai ʻa e ngaahi fakamoʻui fakaemana, tuli tēvolo, naʻa mo hono fokotuʻu mai ʻo e maté. (Mātiu 10:1, 8; 11:1) ʻOku fakamoʻoniʻi ʻe he hisitōliá naʻe ʻikai ko e kau Kalisitiane kotoa pē naʻa nau maʻu mafai fakaemana, ko ia ʻokú ne fakapapauʻi ai naʻe fakahanga tāfataha ʻe Sīsū ʻene leá ki he kulupu pē ʻe taha​—ko ʻene kau ʻapositoló.

Ka, ko e niʻihi ʻo e ngaahi meʻa naʻe leaʻaki ʻe Sīsuú naʻe toe fakalahi atu ia mei he fononga ngāue fakamalanga ʻa e kau ʻapositoló. Naʻá ne tala ange kiate kinautolu: “Ka mou lamalama telia ʻa e kakai; . . . ʻe ʻave kimoutolu ki he ngāhi kovana, mo e ngāhi tuʻi, koeʻuhi ko au, ke ai ha fakamatala kiate kinautolu Siu pea mo e kau Senitaile.” (Mātiu 10:17, 18) ʻI he fononga ko iá, ʻoku ngalingali naʻe fehangahangai ʻa e toko 12 mo ha fakafepaki, ka ʻoku ʻikai ke ʻi ai ha fakamoʻoni naʻe ʻave kinautolu ki he “ngāhi kovana, mo e ngāhi tuʻi” ke nau fai fakamoʻoni ki he “kau Senitaile.”a ʻI he ngaahi taʻu mai ki mui ní, naʻe hā ʻa e kau ʻapositolo ʻi he ʻao ʻo e kau pulé, ʻo hangē ko Tuʻi Hēlota ʻAkilipa I mo e II, Sesio Paula, Kalio, mo e ʻEmipola ko Nelo. (Ngāue 12:1, 2; 13:6, 7; 18:12; 25:8-12, 21; 26:1-3) Ko ia naʻe fakahoko ʻi ha tuʻunga siʻisiʻi ʻa e ngaahi lea ʻa Sīsuú ki mui mai.

Naʻe hokohoko ʻa e akonaki ʻa Sīsū mo e fakatokangá ʻo pehē: “Pea ʻe fakaʻilo ʻe he taʻokete hono tehina, koeʻuhi ke tamateʻi.” Naʻe ʻikai ko haʻane lave ʻeni ki he ngaahi tokoua fakalaumālié ʻo tatau pē naʻe ʻikai haʻane lave ki he ngaahi tamai pe fānau fakalaumālié ʻi heʻene ngaahi lea ko ia ʻoku hoko atu ʻi he Māt 10 veesi 21: “Ko e tamai [te ne fakaʻilo] ʻene fanau: pea ʻe tuʻu ʻa e fanau ki heʻenau matuʻa ʻo tamateʻi kinautolu.” Naʻe ʻuhinga ʻa Sīsuú ke ʻamanekina ʻe he kau ʻapositolo ʻa e fakafili pe fakafepaki naʻa mo e ngaahi kāingá ʻe hoko pē mei ai.​—Mātiu 10:35, 36.

Naʻe fiemaʻu leva ki he kau ʻapositolo ke nau faʻa kātaki ʻi he fononga ngāue fakamalanga ko iá. Naʻe hoko atu ʻe Sīsū ʻo pehē: “Pea te mou hoko ko e fehiʻanekina ʻe he kakai kotoa pe koeʻuhi ko hoku hingoa: ka ko ia te ne kitaki ʻo aʻu ki he ikuʻanga, ko e toko taha ko ia ʻe moʻui.”​—Mātiu 10:22.

Ko e niʻihi ʻo e ngaahi meʻa naʻe leaʻaki ʻe Sīsū ʻi he taimi ko iá ʻoku ʻuhinga kiate kitautolu ko e Kau Fakamoʻoni ʻa Sihova he ʻahó ni. Ko e meʻa ʻoku fakamamafaʻi ʻi heʻetau ngāue fakamalangá ko e Puleʻangá. ʻOku tau fai taʻe totongi ʻetau ngāue fakamalangá pea ʻoku tau kumi ki he kakai ʻoku nau mahuʻingaʻia ʻi he pōpoakí pe ʻoku nau taau ki ai. ʻOku taau ke tokanga. ʻOku lahi ʻa e kau fakafepakí. ʻI he taimi ʻe niʻihi ko e ngaahi kāingá, ngaahi kaungāʻapí, pe ko e kaungāngāué te nau fakatupunga ha ngaahi palopalema mamafa, tautautefito kiate kinautolu loto-totonu ʻa ia ʻoku nau kamata ke fou ʻi he ʻalunga ʻo e Kalisitiane moʻoní. Naʻe toe leaʻaki ʻe Sīsū ʻa e fakatokanga ʻo kau ki he fakafepaki peheé ʻi heʻene fakamatalaʻi ʻa e “fakaʻilonga” ʻo ʻene ʻi ai. (Mātiu 24:3, 9, 10; Luke 21:16, 17) Naʻá ne toe leaʻaki ʻa e fiemaʻu ke tau ‘kātaki ʻo aʻu ki he ngataʻanga koeʻuhi kae maʻu ʻa e fakahaofí.’ ʻIo, ʻoku fiemaʻu ke tau kātaki ʻo aʻu ki he ngataʻanga ʻo ʻetau moʻui lolotonga ní pe ki he ngataʻanga ʻo e ngaahi meʻa ʻoku tuʻú ni pea ke tau lava ke hū atu ki he māmani foʻoú.​—Mātiu 24:13.

[Fakamatala ʻi lalo]