Fanongonongo
Ko e Tokoni ki he Ngaahi Kōmiti ʻa e Kulupu Pulé
ʻOku hokohoko atu ʻe he kau mēmipa ʻe toko 12 ʻi he taimí ni ʻo e Kulupu Pule ʻo e Kau Fakamoʻoni ʻa Sihová ʻenau angatonu ʻi he ngaahi ngāue kuo vaheʻi kiate kinautolú. ʻOku nau houngaʻia maʻu ai pē ki he kau mēmipa mateaki ʻo e “fuʻu kakai lahi” ʻoku fakautuutú ʻi heʻenau poupou tōtōiví. (Fakahā 7:9, 15) Koeʻuhi ko e fakautuutu kāfakafa ʻi he māmani lahí, ʻoku ngalingali feʻungamālie ʻi he taimi ko ʻení ke tokonaki atu ki he Kulupu Pulé ha tokoni lahi ange ki ai. Ko ia ai, kuo fai ha fili ke fakaafeʻi ha kau tokoni ʻe niʻihi, tautefito pē mei he fuʻu kakai lahí, ke nau kau ki he ngaahi fakataha ʻi he Ngaahi Kōmiti taki taha ʻa e Kulupu Pulé, ʻa ia ko e Kōmiti ʻo e Kau Ngāue, Pulusi, Ngāue, Faiako, mo e Kōmiti Faitohi. Ko ia, ko e tokolahi ʻe kau ki he ngaahi fakataha ʻa e ngaahi kōmiti taki taha ko ʻení ʻe fakalahi ki he toko fitu pe valu. ʻI he tataki ʻa e kau mēmipa ʻo e kōmiti ʻo e Kulupu Pulé, ʻe kau ʻa e kau tokoni ko ʻení ʻi he ngaahi fetalanoaʻaki pea te nau fakahoko ha ngaahi ngāue kehekehe ʻe vaheʻi kiate kinautolu ʻe he kōmití. Ko e fokotuʻutuʻu foʻou ko ʻení naʻe kamata ke ngāueʻaki ia ʻi Mē 1, 1992.
ʻI he ngaahi taʻu lahi, kuo holo ai pē ʻa e tokolahi ʻo e toenga ʻo e Kau Fakamoʻoni kuo paní, lolotonga iá ko e tokolahi ʻo e fuʻu kakai lahí kuo fakautuutu ia ʻo laka mamaʻo ʻi he tuʻunga lahi taha naʻa tau ʻamanekiná. (ʻAisea 60:22) Ko ha fakamālō lahi ē ke tau fai kia Sihova ki he tupu fakaofo ko ʻení! ʻI hono tali loto-hounga ʻi he 1931 ʻa e hingoa foʻou, ko e Kau Fakamoʻoni ʻa Sihová, ko e tumutumu ʻo e tokolahi ʻo e kau malanga ʻo e Puleʻangá naʻe toko 39,372, ko e tokolahi taha ʻo kinautolu naʻe taku ko e ngaahi tokoua pani ʻo Kalaisí. (ʻAisea 43:10-12; Hepelū 2:11) ʻI he ʻosi ʻa e taʻu ʻe onongofulu mei ai, ʻi he 1991, ko e tumutumu ʻi māmani lahi ʻo e kau malangá naʻe toko 4,278,820, ʻa ia ko e toko 8,850 pē naʻe taku ko e toenga ʻo e kau paní. ʻOku hangē ko e ʻamanaki ki ai ʻi he maama ʻo e Tohitapú, ko e “fuʻu kakai lahi” ʻoku nau fuʻu tokolahi ange ʻi he toenga ʻo e “fanga sipi toko siʻi” ʻo lahi ange ʻi he toko 480 ki he toko taha ʻo e kau paní. (Luke 12:32; Fakahā 7:4-9) ʻI he tokanga ki he ngaahi fakalahi atu ʻa e ngaahi meʻa mahuʻinga fekauʻaki mo e Puleʻanga, ko e moʻoni ʻoku fiemaʻu ʻe he kau pani mo nau houngaʻia ʻi he ngāue fakataha mo e poupou ʻa e fuʻu kakai lahi.
ʻOku hangē ko ia kuo fakamatalaʻi ʻi he ʻīsiu ko ʻeni ʻo e Ko e Taua Leʻo, ʻoku ʻi ai ʻa e kulupu ʻoku ngāue mo e ʻIsileli fakalaumālie ʻo e ʻaho ní ʻoku fehoanaki mo e kau Netinimi mo e ngaahi hako ʻo e kau tamaioʻeiki ʻa Solomoné ʻa ia naʻa nau foki mei he nofo fakapōpula ʻi Pāpiloné mo e toenga ʻo e kau Siú; naʻe aʻu ʻo tokolahi ange ʻa e faʻahinga naʻe ʻikai ko e kau ʻIsileli naʻe fokí ʻi he kau Līvaí. (ʻĒsela 2:40-58; 8:15-20) Ko e faʻahinga “kuo foaki” mei he lotolotonga ʻo e fuʻu kakai lahí he ʻaho ní ko ha kau tangata Kalisitiane matuʻotuʻa fakalaumālie kuo nau maʻu ha taukei feʻunga koeʻuhi ko ʻenau tokangaʻi ʻa e ngaahi ʻōfisi vaʻá, ko e ngāue fefonongaʻakí, pea ʻi he lotolotonga ʻo e ngaahi fakatahaʻanga ʻe 66,000 kuo fokotuʻu he taimí ni ʻi māmani lahí.
Ki muí ni mai, naʻe fai ʻi māmani lahi ʻa e ngaahi Ako Fakafaiako ʻo e Puleʻangá ke fai ha fakahinohino ki he kau ʻovasiá mo honau tokoni ko e kau sevānití. ʻI he ʻIunaite Seteté pē, naʻe kau ki ai ʻa e kau ʻovasia ʻe toko 59,420. Ko e ‘kau tangata matuʻotuʻa fakalaumālie’ ko ʻení naʻe teuteuʻi ke nau fakahoko ʻa honau ngaahi fatongiá ke toe ola lelei ange.—1 Pita 5:1-3; fehoanaki mo ʻEfesō 4:8, 11.
ʻI he ʻuluʻi ʻōfisi ʻo e Kau Fakamoʻoni ʻa Sihová ʻi Brooklyn, kuo ngāue ai ʻi he ngaahi taʻu lahi ʻa e niʻihi ʻo e faʻahinga “kuo foaki.” ʻOku kau ki he faʻahinga ko ʻení ʻa e kau ʻovasia matuʻotuʻa fakalaumālie mei he fuʻu kakai lahí kuo nau mohu ʻi he malava mo e taukei. Ko ia, kuo fili ʻe he Kulupu Pulé ha tokosiʻi mei he kau ʻovasia ko iá ke tokoni ʻi he ngaahi fakataha ʻa e ngaahi kōmiti ʻa e Kulupu Pulé. ʻOku ʻikai ke fiemaʻu ko ha kau tangata pē kuo fuoloa taha ʻa ʻenau ngāué. Ka, ko e faʻahinga ʻoku matuʻotuʻa fakalaumālie, ko e kau tangata taukei kuo nau maʻu ʻa e ngaahi malava kehekehe ke nau feʻunga ai ke fai ha tokoni ʻi he ngaahi tafaʻaki kehekehe. Ko hono vaheʻi kinautolu ke ngāue mo ha kōmití ʻoku ʻikai ke ʻoange ai kiate kinautolu ha tuʻunga makehe. Hangē ko ia naʻe leaʻaki ʻe Sīsū ki heʻene kau ākongá, “ko kimoutolu ko e ngāhi tokoua kotoa pe.” (Mātiu 23:8) Kaekehe, ʻe tuku ki he kau tangata ko ʻení ʻa e meʻa lahi, ko ia ai, ʻe “hulu atu mo e meʻa ʻe ʻeke” meiate kinautolú.—Luke 12:48.
ʻOku tau fiefia ʻi he laka ki muʻa ʻa e kautaha ʻa Sihová ʻi he ʻaho ní. ʻI he taʻu ʻe hongofulu kuo ʻosí, kuo meimei peseti ʻe 100 ʻa e fakautuutu ʻa e tokolahi ʻo kinautolu ʻoku kau ki he ngāue fakamalangá, ʻo fehoanaki-mālie eni mo e kikite ʻo fekauʻaki mo Tēvita Lahi Ange, ko Sīsū Kalaisí: “I he tubu o ene bule moe melino e ikai hano gataaga.” (ʻAisea 9:6, PM [ʻAi 9:7]) ʻI he founga tatau pē ko ia naʻe ngāue fakataha ʻa e kau Netinimí mo e kau taulaʻeikí ʻi hono monomono ʻa e ngaahi ʻā ʻo Selusalemá, ko ia ʻi he ʻahó ni kuo fakahoko ʻa e kikite ʻo fekauʻaki mo e kautaha ʻa Sihová: “Pea ʻe langa ho ngaahi ʻa ʻe he hakoʻi muli.” (ʻAisea 60:10; Nehemaia 3:22, 26) ʻOku tonu ke fakaongoongoleleiʻi ʻa e kau Netinimi ʻo onopooní koeʻuhi ko e faivelenga kuo nau fakahāhā ʻi hono langa hake ʻa e lotu moʻoní, ʻo tokoni ki he “kau taulaʻeiki ʻa Sihova” ʻo tatau ai pē pe ko e hā ʻa e ngāue ʻe vaheʻi nai kiate kinautolu ʻi he kautaha ʻa Sihova ʻi māmani lahí.—ʻAisea 61:5, 6.