ʻOkú Ke Faʻa Fakamolemole?

NAʻE hoko ha faingataʻa ʻi he vā ʻo Uili mo hono ʻofefine taʻu 16 ko Lisa. Ko e fanga kiʻi taʻefelotoi pē naʻe tupu ʻi hona vaá ʻo faʻa iku ki heʻena fekailangakiʻi ai. Naʻe faifai atu, ne aʻu ai ʻa e ongoʻi ʻita ko eni ʻa e lotó ki ha tuʻunga ne kole ai kia Lisa ke ne mavahe mei honau ʻapí.a

ʻI he faai atu ʻa e taimí, naʻe hoko ʻo fakatokangaʻi ʻe Lisa naʻá ne hala pea naʻá ne feinga leva ke fakamolemoleʻi ia ʻe heʻene tamaí. Ka ʻi he ʻikai ke fakangaloʻi ʻa e ngaahi fehālaaki ʻa Lisa ʻi he kuo hilí, naʻe fakataleʻi ʻe heʻene tamai loto-ʻitá ʻa e ngaahi feinga ʻa Lisa ke fakamelinó. Fakakaukau atu! Naʻe ʻikai ke loto-lelei ʻa e tamaí ni ke meesi ki hono ʻofefiné tonu!

ʻI he laui senituli kuo maliu atú naʻe tuʻutuʻuni ai ke tautea mate ha tangata taʻehalaia ki ha hia naʻe ʻikai te ne fai. Naʻe fai ʻe he kau fakamoʻoní ha ngaahi fakamoʻoni loi, pea naʻe hanga kehe mo fakakuikui ʻa e kau māʻolunga fakapuleʻangá mei he fakamaau totonú. Ko e tangata tonuhia ko iá ko Sīsū Kalaisi. ʻI he taimi siʻi ki muʻa peá ne pekiá, naʻá ne lotu ʻo kole ki heʻene tamaí: “ʻAlā Tamai, fakamolemole ʻa kinautolu; he ʻoku ʻikai te nau ʻilo ʻa e meʻa ʻoku nau fai.”​—Luke 23:34.

Naʻe fakamolemoleʻi tauʻatāina ia ʻe Sīsū mei hono lotó, pea naʻá ne naʻinaʻi ki hono kau muimuí ke nau faʻifaʻitaki kiate ia ʻi he meʻá ni. (ʻEfesō 4:32) Kae kehe, hangē pē ko Uili, ʻoku ʻi ai ʻa e tokolahi ʻoku ʻikai te nau loto-lelei ke faʻa fakamolemole. ʻOku fēfē koe ʻi he fekauʻaki mo e meʻá ni? ʻOkú ke loto-lelei ke fakamolemoleʻi ʻa e niʻihi kehé ʻi he taimi ʻoku nau faihala atu ai kiate koé? Pea fēfē ʻa e ngaahi angahala mamafá? Kuo pau ke toe fakamolemoleʻi mo ia?

Ko e Fakamolemoleʻí ko ha Pole

ʻOku ʻikai faingofua maʻu pē ke faʻa fakamolemole. Pea ʻi he ngaahi taimi faingataʻá ni, kuo hoko ʻo toe lahi ange ʻa e ngaahi palopalema ʻi he ngaahi vā ʻo e tangatá. ʻOku tautefito ki he moʻui fakafāmilí ʻa ʻene fonu ʻi he ngaahi mafasia mo e ngaahi hohaʻá. Naʻe fakahā fuoloa pē ʻe he ʻaposetolo Kalisitiane ko Paulá ko e ngaahi tuʻunga peheé ʻe hoko ʻi he “kuonga fakamui.” Naʻá ne pehē: “He ko hono kakai te nau ʻofa kiate kinautolu pe, te nau ʻofa ki he paʻanga, te nau fielahi, te nau angataʻetokaʻi, . . . ko e kau taeʻofa ki he lelei, ko e kau lavaki, ko e kau ʻohonoa, ko e kau loto ʻaoʻaofia ʻi he ʻafungi.”​—2 Tīmote 3:​1-4.

Ko ia, ʻoku ʻikai ha toe veiveiua, ko kitautolu kotoa ʻoku tau fehangahangai mo e ngaahi mafasia mei tuʻa ʻa ia ʻokú ne ʻahiʻahiʻi ʻa ʻetau malava ke fakamolemoleʻi ʻa e niʻihi kehé. ʻIkai ko ia pē, ʻoku tau toe fāinga mo e ngaahi mafasia ʻi loto ʻiate kitautolu. Naʻe tangilāulāu ʻa Paula: “ʻIo, ko e lelei ʻoku ou fie fai ʻoku ʻikai te u fai; kaekehe, ko e kovi, ʻa ia ʻoku ʻikai te u fie fai, ko ia ia ʻoku ou feia. Pea kapau ko e meʻa ʻoku ʻikai te u fie fai, ko ia ia ʻoku ou fai, talaʻehai ʻoku kei ko kita ia ʻoku ngaue ki he meʻa ko ia, ka ko angahala ʻoku fale ʻiate au.” (Loma 7:​19, 20) Ko hono olá, ko e tokolahi ʻo kitautolu ʻoku ʻikai ke faʻa fakamolemole ʻo hangē ko ia ʻoku tau fakaʻamu ʻoku tonu ke tau faí. Ka ko hono moʻoní, ko e taʻehaohaoa tukufakaholó pea mo e angahalá ʻokú na fai ha tākiekina mālohi kiate kitautolu hono kotoa, ʻo toʻo meiate kitautolu ʻi he taimi ʻe niʻihi ʻa ʻetau manavaʻofa ki he kakaí.

ʻI he taimi naʻe fakalototoʻaʻi ai ke fakamolemoleʻi ha taha ʻi haʻane fakatupu ha kiʻi loto-mamahi, ko e tali ʻeni ʻa ha fefine ʻe taha: “ʻOku ʻikai ha taha ʻe mahuʻinga ange ia ʻi he feinga ʻoku fiemaʻu ki hono fakamolemoleʻi iá.” ʻI he sio atu pē ki he anga ʻo e fakamatala peheé ʻoku hā nai ʻoku ngali anga-taʻefakakaumeʻa, loto-taʻeʻofa, pea aʻu ʻo tala kehe. Kae kehe, ʻi he vakai ʻo toe loloto ange ki aí, ʻoku tau sio ai ʻoku hā mei he lea peheé ʻa e ongoʻi koto kulanoa ʻoku maʻu ʻe he kakai tokolahi ʻi heʻenau fehangahangai mo ha māmani ʻoku nau vakai ki ai ʻoku siokita, taʻetokanga mai, mo fakafili. Naʻe pehē ʻe ha tangata ʻe taha: “ʻOku vaʻingaʻaki koe ʻe he kakaí ʻi hoʻo fakamolemoleʻi kinautolú. ʻOku hangē ia ha lakaʻanga ki ha meʻa ʻe taha.”

Ko ia, ʻoku ʻikai ha ofo ko hono fakatupulekina ha fakakaukau faʻa fakamolemolé, ʻoku faingataʻa ia ʻi he ngaahi ʻaho fakaʻosí ni. Ka, ʻoku fakalototoʻaʻi mai kitautolu ʻe he Tohi Tapú ke tau faʻa fakamolemole ʻi he anga-ʻofa. (Fakafehoanaki mo 2 Kolinitō 2:7.) Ko e hā ʻoku tonu ai ke tau faʻa fakamolemolé?

[Fakamatala ʻi lalo]