“Kau Fakahīkihiki Fiefia” Fakatahalahi Fakavahe ʻa e Kau Fakamoʻoni ʻa Sihová

ʻOku tatali atu kiate koe ʻa e ngaahi ʻaho fakakoloa ʻe tolu ʻo e fakahinohino Fakatohitapu. ʻI he ngaahi fakatahalahi ko ia ʻe 180 kuo fokotuʻutuʻu ʻi he ʻIunaite Seteté pē, ngalingali pē naʻa fai ha fakatahalahi ʻo ofi ki he feituʻu ʻokú ke nofo aí. ʻOku fiemaʻu ke ke ʻi ai ʻi he taimi ʻe kamata ʻaki ai ʻa e polokalamá ha hiva ʻi he 9:40 a.m. ʻi he Falaité.

Ko e polokalama ʻi he pongipongi Falaité ʻe fai ai ha ngaahi lea talitali fiefia pea pehē foki ki he malanga he tefitoʻi fakakaukau ko e “Nofo Mavahe ʻi he Tuʻunga ko e Kau Fakahīkihiki Fiefia ʻi Māmani Lahi.” ʻE fakahanga ʻa e polokalama ʻi he hoʻatā efiafí ki he toʻutupú, ngaahi mātuʻá, pea mo e akó. Ko ha malanga ʻoku pehē “Kuó u Mateuteu ke Mali?” ʻe ʻikai fie tō mei ai ʻa e fānaú. ʻOku totonu ki he ngaahi mātuʻá ke nau fanongo tokanga ki he, “Ngaahi Mātuʻa ʻOku Nau Maʻu ʻa e Fiefia ʻi Heʻenau Fānaú.” ʻE fakaʻosiʻaki ʻa e polokalama efiafí ʻa e malanga ko e “Akó​—Ngāueʻaki Ia ke Fakahīkihikiʻi ʻa Sihova.” Ko e malanga ko ia kuo fai ki ai ʻa e lāuleá ʻoku totonu ke tokoniʻi ai ʻa e toʻutupú ke nau lavameʻa ai ʻi heʻenau vāʻihala ʻi he akoʻangá.

ʻE fakahanga ʻa e polokalama ʻi he pongipongi Tokonakí ki he papitaisó, pea ʻoku ʻomai ai ha faingamālie kiate kinautolu ʻoku taau ke papitaisó. ʻI he hoʻatā efiafí ʻe ʻi ai ha lāulea hangatonu ki he anga ʻo hono ngāueʻaki ʻe Sētane mei he ngaahi ʻaho ʻi muʻá ʻa e holi ki he fehokotaki fakasinó ke tauheleʻiʻaki ʻa e kakaí. ʻE toe ʻi ai foki mo ha malanga mālohi ko e “Maluʻi mei he Ngaahi Tauhele ʻa e Tēvoló.” Ko e polokalama ʻo e ʻaho ko iá ʻe fakaʻosiʻaki ʻa e malanga ko e “ʻUhinga ʻOku Fiemaʻu Ai ki he Faʻahinga ʻo e Tangatá ʻa e ʻIloʻi ʻo e ʻOtuá.”

ʻI he pongipongi Sāpaté, ko e malanga fakakongokonga kuo fakakaveinga ko e “Kau Fakahīkihikiʻi Fiefia Lolotonga ʻo e Ngataʻanga ʻo e Tuʻu ko ʻEní” ʻe fakahanga ai ʻa e tokangá ki he ngaahi meʻa ʻoku tuʻunuku mai ʻa ia te ne luluʻi ʻa e māmaní. ʻE fakamamafaʻi ai ʻa e fiemaʻu fakavavevave ke hola ki ha maluʻanga ki muʻa ke kamata ʻa e “fakamamahi lahi” ʻa ia naʻe lea ʻa Sīsū ʻo fekauʻaki mo iá, ʻo hangē ko ia naʻe hiki ʻi he Mātiu 24:21.

ʻE fakaʻosiʻaki ʻa e polokalama ʻi he pongipongi Sāpaté ʻa e tulama mahuʻinga ko e “Fakaʻapaʻapaʻi ʻa Kinautolu ʻOku Taaú ʻi he Motuʻa Ange Honau Taʻú.” ʻI he hoʻatā efiafí leva, ko e malanga fakahāhā ia ʻe fai ko e “Fakahīkihikiʻi ʻa e Tuʻi ʻo ʻĪtaniti!” ʻE hoko ia ko e konga mahuʻinga lahi ange ʻo e fakatahalahí.

Fai he taimí ni ha ngaahi fokotuʻutuʻu ke ʻalu ki ai. Ke ʻiloʻi ʻa e feituʻu ʻe fai ai ʻoku ofi taha ki ho ʻapí, fetuʻutaki ki he Kau Fakamoʻoni ʻa Sihová, pe tohi kiate kinautolu ʻoku nau pulusi ʻa e makasini ko ʻení.