ʻOku Ofi ʻa e Fakataha-Lahi 1998-1999 “Founga ʻa e ʻOtuá ki he Moʻuí”!
ʻI HE Pasifiki Sauté pē, ʻoku fakataimi-tēpileʻi ai ʻa e ngaahi fakataha-lahi ʻe 44 mei Siulai ki Tīsema. ʻOku hangehangē, ko e taha ʻo e ngaahi fakatahataha ʻaho tolu ko ʻení ʻe fai ia ʻi ha kolo ʻoku ʻikai ke mamaʻo mei ho ʻapí. ʻI he ngaahi feituʻu lahi tahá, ʻe kamataʻaki ʻa e polokalamá ʻi he ʻaho taki taha—Falaité ki he Sāpaté—ʻa e fasi ʻi he 9:30 pongipongi.
ʻE fakaeʻa ʻi he polokalama ʻo e pongipongi Falaité ʻa e ngaahi līpooti ʻi he fakalakalaka ʻa e malangaʻi ʻo e Puleʻangá ʻi he ngaahi tapa kehekehe ʻo e māmaní. Pea ko e tuʻunga-lea ki he fakataha-lahí ʻe fakamamafaʻi ia ʻe he malanga he tefitoʻi fakakaukau ko e, “Huhuʻi ʻa Kalaisí—Ko e Founga Ia ʻa e ʻOtuá ki he Fakamoʻuí.”
ʻI he efiafí ko e malanga fakakongokonga, “Ngaahi Mātuʻa—Fakahūhū ʻa e Founga ʻa e ʻOtuá ki Hoʻo Fānaú,” ʻe tokonaki mai ai ʻa e ngaahi fokotuʻu ʻi he founga ke ueʻi ai ʻa e kau talavoú ke ʻofa mo tauhi kia Sihova. ʻE fakaʻosiʻaki ʻa e polokalama he efiafí ʻa e malanga ko e “ʻOku ʻI Ai ha Moʻui ʻi he Hili ʻa e Maté?”
ʻOku fakahaaʻi ʻi he polokalama ʻo e pongipongi Tokonakí ʻa e ngāue ngaohi-ākonga ʻa e Kau Fakamoʻoni ʻa Sihová ʻi he ngaahi konga hokohoko ʻe tolu, “Ko Hono Tokoniʻi ʻa e Kakaí ke Nau Fou Atu ʻi he Founga ki he Moʻuí,” “Ko e Pole ke Aʻu ki he Kakaí,” mo e “Ko Hono Akoʻi ki he Kau Ākongá ʻa e Meʻa Kotoa Naʻe Tuʻutuʻuni ʻe Kalaisí.” ʻI he fakaʻosi ʻo e polokalama pongipongí, ʻe ʻi ai ʻa e fokotuʻutuʻu ke papitaiso ʻa e kau ākonga foʻoú.
Ko e malanga kamata ʻi he efiafi Tokonakí, “Tauhi mo e Hanga Atu ki he Moʻui Taʻehanongataʻangá,” ʻoku fakaʻaiʻai mai ai kiate kitautolu ke fai ʻa e fakakaukau faʻa lotu ki heʻetau ngaahi ʻuhinga fakafoʻituitui ki hono tauhi ʻo e ʻOtuá. Ko e ongo malanga ko e “Houngaʻia ʻi he ‘Ngaahi Meʻaʻofa ko e Kau Tangata,’ ʻa ē ʻOku Nau Akoʻi ʻa e Founga ʻa e ʻOtuá” mo e “Angaʻi-Tangata—Huʻihuʻi Atu ʻa e Meʻa Motuʻá pea ʻAi ʻa e Meʻa Foʻou” ʻoku ʻomai ai ha sivisiviʻi fakafoʻiveesi fakamaama ʻo e Efeso vahe 4. Ko hono hokó, ko ha enginaki Fakatohitapu ʻe ʻomai ia ʻi he malanga ko e “Tauhi Koe ke Taʻehaʻila mei he Māmaní” pea ʻi he malanga fakakongokonga konga ʻe tolu ko e “Kau Talavou—Muimui ʻi he Founga ʻa e ʻOtuá.” ʻE fakaʻosiʻaki ʻa e polokalama efiafí ʻa e malanga “Ko e Tokotaha-Fakatupú—Ko Hono ʻUlungāngá mo ʻEne Ngaahi Foungá.”
ʻOku fakahaaʻi ʻi he polokalama ʻo e pongipongi Sāpaté ha malanga fakakongokonga konga ʻe tolu ʻa ia ʻe lāulea ai ki he ngaahi vahe fakaʻosi ʻo e tohi ʻIsikelí ʻi he Tohitapú pehē ki honau kaunga fakaekikité. ʻE fakakakatoʻaki ʻa e polokalama pongipongí ʻa e tulama teunga kakato ʻe makatuʻunga ʻi he tuʻunga anga-tonu ʻo e kau talavou Hepelū ʻe toko tolú. Ko e konga mahuʻinga ʻo e fakataha-lahí ʻi he efiafí ko e malanga maʻá e kakaí, “Ko e Founga Pē ʻe Taha ki he Moʻui Taʻengatá.”
Ko e moʻoni ʻe fakakoloaʻi fakalaumālie koe ʻaki ʻa hoʻo ʻi ai ʻi he ngaahi ʻahó kotoa ʻe tolu. ʻOku talitali lelei loto-māfana koe ke ke ʻi he konga kotoa pē, ʻa ia ko e moʻoni, ʻe fai atu kiate koe taʻetotongi kotoa ia. Ki he feituʻu ofi taha atu ki ho ʻapí, fetuʻutaki ki he Fale Fakatahaʻanga fakalotofonua ʻo e Kau Fakamoʻoni ʻa Sihová pe tohi ki he kau faipulusi ʻo e makasini ko ʻení.