ʻOku Fiemaʻu ki he Fanga Sipi ʻa Sihová ʻa e Tokanga Fakaalaala
“ʻE, ke mou ʻilo muʻa ko Sihova pe ko e ʻOtua. . . . Ko e kakai aʻana ko e sipi ʻoku ne fafanga.”—SĀME 100:3.
1. ʻOku anga-fēfē ʻa hono tauhi ʻe Sihova ʻa ʻene kau sevānití?
KO Sihová ko e Tauhi-Sipi Lahí ia. Kapau ko ʻene kau sevāniti kitautolu, ʻokú ne vakai mai kiate kitautolu ko ʻene fanga sipi pea ʻomai kiate kitautolu ʻa e tokanga fakaalaalá. Ko ʻetau Tamai fakahēvaní ʻokú ne fakafiemālieʻi mo fakaongoʻimālohi kitautolu pea taki kitautolu ʻi he “ngaahi hala ʻo e maʻoniʻoni; ko hono ʻuhinga e ko hono huafa.” (Sāme 23:1-4) Ko e Tauhi-Sipi Leleí, ko Sīsū Kalaisi, ʻokú ne ʻofa lahi ʻiate kitautolu he naʻá ne līʻoa hono soulú koeʻuhi ko kitautolu.—Sione 10:7-15.
2. Ko e hā ʻa e tuʻunga ʻoku ʻi ai ʻa e kakai ʻa e ʻOtuá?
2 ʻI heʻetau maʻu ʻa e tokanga fakaalaalá, ʻoku lava ke tau lea fakataha mo e tokotaha-tohi-sāmé: “Tauhi ʻa Sihova ʻaki ʻa e fiefia: Hu ki hono ʻao mo e kaikaila. ʻE, ke mou ʻilo muʻa ko Sihova pe ko e ʻOtua: ko ia naʻa ne ngaohi kitaua, pea ko kitaua ʻoku oʻona; ʻio, ko e kakai aʻana, ko e sipi ʻoku ne fafanga.” (Sāme 100:2, 3) ʻIo, ʻoku tau loto-fiefia mo malu. Hangē naʻa tau malu mei ha fanga manu fekai ʻi ha lotoʻā sipi ʻoku ʻi ai hono ngaahi ʻā maka mālohí.—Nōmipa 32:16; 1 Sāmiuela 24:3; Sēfanaia 2:6.
Kau Tauhi-Sipi Loto-Lelei ʻo e Tākangá
3. ʻOku anga-fēfē ʻa hono tokangaʻi ʻe he kau mātuʻa Kalisitiane kuo fakanofó ʻa e tākanga ʻa e ʻOtuá?
3 Tā neʻineʻi ke tau loto-fiefia he ko e fanga sipi kitautolu ʻa e ʻOtuá! ʻOku takimuʻa ʻa e kau mātuʻa kuo fakanofó ʻi hotau lotolotongá. ʻOku ʻikai te nau “fie maʻolunga,” fakafieʻeiki kiate kitautolu, pe feinga ke puleʻi ʻa ʻetau tuí. (Nōmipa 16:13; Mātiu 20:25-28; 2 Kolinitō 1:24; Hepelū 13:7) Ka, ko e kau tauhi-sipi anga-ʻofa kinautolu ʻoku nau ngāueʻaki ʻa e akonaki ʻa e ʻaposetolo ko Pitá: “Tauhi ʻa e fanga sipi ʻa e ʻOtua ʻoku ʻiate kimoutolu, ʻo ʻoua naʻa fai fakakoloto hono leʻohi, ka ʻi he loto fiefai ʻi he funga ʻo e finangalo ʻo e ʻOtua; ʻo ʻikai ko e sio paʻanga ʻuli, ka ʻi he ʻofa ki he ngaue; pea ʻoua te mou fakafieʻeiki ki he ngaahi potungaue, kae hoko ko e faʻifaʻitakiʻanga ki he fanga sipi.” (1 Pita 5:2, 3) Naʻe tala ʻe he ʻaposetolo ko Paulá ki he kaungā-mātuʻá: “Ko ia mou lamasi kimoutolu, mo e fanga sipi kotoa, ʻa ia kuo fakanofo kimoutolu ʻe he Laumālie Maʻoniʻoni ʻi honau lolotonga ko honau kau leʻo, koeʻuhi ke mou tauhi ʻa e Siasi ʻo e ʻOtua, ʻa ia naʻa ne fakatau ʻaki hono taʻataʻa oʻona [“hono ʻAló,” NW].” Pea ko ha houngaʻia lahi ē ko e fanga sipí koeʻuhi ko e kau tangata ko ʻeni kuo fakanofo ʻe he laumālie māʻoniʻoní ke “tauhi fakaalaala ʻa e tākangá”!—Ngāue 20:28-30, NW.
4. Ko e hā ʻa e faʻahinga felāveʻi mo e tākangá naʻe ʻiloa ai ʻa Charles T. Russell?
4 Naʻe ʻoange ʻe Sīsū ki he fakatahaʻangá ʻa e “meʻaʻofa ʻi he kau tangata,” ko e niʻihi ko e “kau faifekau,” pe kau tauhi-sipi, ʻoku nau tauhi ʻa e tākanga ʻa Sihová ʻi he founga fakaalaala. (ʻEfesō 4:8, 11; King James Version) Ko e taha ʻo e kau tangata ko ʻení ko Charles T. Russell, ko e ʻuluaki palesiteni ia ʻo e Sōsaieti Taua Leʻó. Naʻe ui ia ko Faifekau Russell koeʻuhi ko ʻene ngaahi ngāue anga-ʻofa mo kaungāongoʻi ʻi hono tauhi ʻa e tākanga ʻi he malumalu ʻo e Tauhi-Sipi Tefito, ko Sīsū Kalaisí. ʻI he ʻahó ni, ko e kau mātuʻa Kalisitiané ʻoku fakanofo ia ʻe he Kulupu Pule ʻo e Kau Fakamoʻoni ʻa Sihová, pea ʻoku ʻi ai ʻa e tokanga ke ʻoua naʻa ngāueʻaki ʻa e ngaahi lea pehē ʻo hangē ko e “faifekau,” “mātuʻa,” pe “faiako” ko e ngaahi hingoa fakalakanga. (Mātiu 23:8-12) Ka neongo ia, ko e kau mātuʻa ʻi he ʻaho ní, ʻoku nau fai ʻa e ngāue fakafaifekaú, pe tauhi-sipí, ke ʻaonga ki he fanga sipi ʻoku fafanga ʻe Sihová.
5. Ko e hā ʻoku totonu ai ke feinga ʻa e kau foʻoú ke maheni mo e kau mātuʻa kuo fakanofo ʻi he fakatahaʻanga Kalisitiané?
5 ʻI he tuʻunga ko e kau mātuʻá, ʻoku kaunga mahuʻinga ʻa e kau mātuʻá ki he fakalakalaka fakalaumālie ʻa e kau foʻoú. Ko ia ai, ko e tohi foʻou ko e ʻIlo ʻA Ia ʻOku Taki Atu ki he Moʻui Taʻengatá ʻoku pehē ʻi he peesi 168: “ʻAi ke maheni mo e kau mātuʻa kuo fakanofo ʻi he fakatahaʻangá. Kuo nau maʻu ʻa e taukei lahi ʻi hono ngāueʻaki ʻa e ʻiloʻi ʻo e ʻOtuá, he kuo nau aʻusia ʻa e ngaahi tuʻunga poto ʻoku taau ki he kau ʻovasiá ʻoku fokotuʻu mai ʻi he Tohitapú. (1 Tīmote 3:1-7; Taitusi 1:5-9) ʻOua ʻe toumoua ke fakaofiofi ki ha taha ʻo kinautolu kapau ʻokú ke fiemaʻu ha tokoni fakalaumālie ke ikunaʻi ʻaki ha tōʻonga pe ko ha anga ʻa ia ʻoku fepaki mo e ngaahi fiemaʻu ʻa e ʻOtuá. Te ke ʻilo ai ʻoku muimui ʻa e kau mātuʻá ki he enginaki ʻa Paulá: ‘Fakafiemalie ki he kau loto foi, boubou ae vaivai, ke mou faʻa katakiʻi kotoabe.’—1 Tesalonaika 2:7, 8; 5:14, PM.”
ʻI he Fie Malanga ʻa e Kau Foʻoú
6. Ko e hā ʻa e founga ngāue ʻoku fai kapau ʻoku loto ha tokotaha ako Tohitapu ke hoko ko ha tokotaha malanga ʻo e Puleʻangá?
6 ʻI he hili hano maʻu ʻe ha tokotaha ako Tohitapu ʻa e ʻiló pea kuó ne haʻu ki he ngaahi fakatahá ʻi ha taimi siʻi, te ne loto nai ke hoko ko ha tokotaha malanga ʻo e Puleʻangá, ko ha tokotaha malanga ʻo e ongoongo leleí. (Maʻake 13:10) Kapau ʻoku pehē, ko e tokotaha Fakamoʻoni ʻokú ne fai ʻa e ako Tohitapu mo iá ʻoku totonu ke ne fetuʻutaki ki he ʻovasia tauhí, ʻa ia te ne fokotuʻutuʻu ki ha tokotaha ʻo e kau mātuʻá ʻi he Kōmiti Ngāue ʻa e Fakatahaʻangá mo ha tokotaha mātuʻa kehe ʻe taha ke fakataha mo e tokotaha ako Tohitapú mo ʻene faiakó. Ko e fetalanoaʻakí ʻe makatuʻunga ia ʻi he tohi ko e Organized to Accomplish Our Ministry, peesi 98 mo e 99. Kapau ʻe sio ʻa e toko ua ko ʻeni ʻo e kau mātuʻá ʻoku tui ʻa e tokotaha foʻoú ki he ngaahi akonaki tefito ʻi he Tohitapú pea kuó ne muimui ki he ngaahi tefitoʻi moʻoni ʻa e ʻOtuá, ʻe fakahā ki ai ʻokú ne taau ke kau ki he ngāue fakafaifekau ki he kakaí.a ʻI heʻene lipooti ʻene ngāue fakafaifekaú ʻaki hono ʻomai ha lipooti ngāue fakamalangá, ʻe fokotuʻu ia ki he kaati ko e Congregation’s Publisher Record ʻa ia ʻe fokotuʻu ai ʻa hono hingoá. Ko e tokotaha foʻoú ʻoku lava ʻi he taimí ni ke lipooti ʻene ngāue fakaefakamoʻoní fakataha mo e laui miliona ʻo e niʻihi kehe ʻoku nau loto-fiefia ʻi hono “malangaʻaki ʻa e folofola ʻa e ʻOtua.” (Ngāue 13:5) ʻE fai ki he fakatahaʻangá ha fanongonongo ʻo pehē ʻokú ne hoko ko ha tokotaha malanga teʻeki ai papitaiso.
7, 8. Ko e hā ʻa e ngaahi founga ʻe fai nai ai ʻa e tokoni ʻoku fiemaʻu ki he tokotaha malanga teʻeki ai papitaisó ʻi he ngāue fakafaifekaú?
7 ʻOku fiemaʻu ki ha tokotaha malanga teʻeki ai papitaiso ʻa e tokoni mei he kau mātuʻá mo e kau Kalisitiane matuʻotuʻa kehé. Ko e fakatātaá, ko ʻene fakalakalaka fakalaumālié ko e meʻa ia ke tokanga ki ai ʻa e faiako ʻo e Ako Tohi ʻa e Fakatahaʻangá ʻokú ne haʻu ki aí. ʻOku faingataʻa nai ki he tokotaha malanga foʻoú ke lea ola lelei ʻi he ngāue fale-ki-he-falé. (Ngāue 20:20) Ko ia ʻoku ngalingali te ne talitali lelei ha tokoni, tautefito mei he tokotaha naʻá ne fai ʻa e ako Tohitapu mo ia ʻi he tohi ko e ʻIlo. ʻOku taau ʻa e tokoni ʻaonga peheé, he naʻe teuteuʻi ʻe Sīsū Kalaisi ʻa ʻene kau ākongá ki he ngāue fakafaifekaú.—Maʻake 6:7-13; Luke 10:1-22.
8 Ke ola lelei ʻa ʻetau ngāue fakafaifekaú, ʻoku ʻikai ke ala tuku ʻa e teuteu lelei ki muʻá. Ko ia ai, ʻe ʻuluaki fakataha nai ha ongo malanga ke ʻahiʻahiʻi ʻa e ngaahi tuʻuaki kuo fokotuʻu ʻi he tatau fakamāhina ʻo ʻEtau Ngāue Fakafaifekau ʻo e Puleʻanga. ʻI he kamata ʻo ʻena ngāue fakamalangá, ko e tokotaha taukei angé te ne kamata ʻi he ʻuluaki matapaá pe matapā ʻe ua. Hili ʻo ha fakafeʻiloaki anga-fakakaumeʻa, ʻoku lava ke na fakatou kau ʻi hono fai ha fakamoʻoni. Ko e ngāue fakataha ʻi he ngāue fakafaifekaú ʻi ha ngaahi uike siʻi ʻe iku nai ki ha ngaahi toe ʻaʻahi pea naʻa mo ha ako Tohitapu ʻi he tohi ko e ʻIlo ʻA Ia ʻOku Taki Atu ki he Moʻui Taʻengatá. Ko e tokotaha malanga taukei angé te ne fai nai ʻa e akó ʻi ha taimi siʻi peá ne tuku ia ke fai ʻe he tokotaha fanongonongo foʻou ʻo e Puleʻangá. Ko ha fiefia ē ka ko e ongo malangá kapau ʻe fakahā ʻe he tokotaha ako Tohitapú ʻa e houngaʻia ki he ʻiloʻi ʻo e ʻOtuá!
9. Ko e hā ʻa e ngaahi fokotuʻutuʻu ʻoku fai ʻi ha loto ʻa ha tokotaha malanga ke papitaisó?
9 ʻI he fakalakalaka fakalaumālie ʻi hono tuʻunga ko ha tokotaha malanga teʻeki ai papitaisó, te ne fai nai ha fakatapui ki he ʻOtuá ʻi ha lotu pea loto ke papitaiso. (Fakafehoanaki mo Maʻake 1:9-11.) ʻOku totonu ke ne fakahā ʻa ʻene loto ke papitaisó ke ʻilo ʻe he ʻovasia tauhi ʻo e fakatahaʻangá, ʻa ia te ne fokotuʻutuʻu ki ha kau mātuʻa ke fai ha fakamanatu mo e tokotaha malangá ʻa e ngaahi fehuʻi ʻi he peesi 175 ki he 218 ʻo e Organized to Accomplish Our Ministry. Ko e ngaahi konga ʻe fā ʻa ia kuo vahevahe ki ai ʻa e ngaahi fehuʻí ʻe fai pē ia ʻi he foʻi fakataha ʻe tolu mo e kau mātuʻa kehekehe ʻe toko tolu ʻo ka malava. Kapau te nau loto-taha ko e tokotaha teʻeki ai papitaisó ʻokú ne maʻu ha ʻilo feʻunga ʻo e ngaahi akonaki ʻi he Tohitapú pea taau ʻi he ngaahi founga kehé, te nau fakahā kiate ia ʻoku taau ke ne papitaiso. Ko hono ola ʻo ʻene fakatapui mo papitaisó, ʻokú ne hoko ai ʻo ‘fakaʻilongaʻi’ ki he fakamoʻuí.—ʻIsikeli 9:4-6, PM.
Aʻusia ʻa e Ngaahi Fiemaʻu Makehé
10. Hili ʻa e kakato ʻo ʻene ako ʻa e tohi ko e ʻIlo pea kuo ʻosi papitaiso, ʻe anga-fēfē ʻa hono fakalahi ʻe ha tokotaha ʻa ʻene ʻilo Fakatohitapú?
10 ʻI he ʻosi kakato ʻo e ako Tohitapu ʻa ha tokotaha ʻi he tohi ko e ʻIlo pea kuó ne papitaiso, ʻe ʻikai toe fiemaʻu nai ke fai ha ako mo ia ʻi he tohi hono uá, ʻo hangē ko e Fāʻūtaha ʻi he Lotu ki he ʻOtua Moʻoni Pē Taha.b Ko e moʻoni, ko e tokotaha naʻe toki papitaisó te ne ako lahi ʻi heʻene teuteu ki he ngaahi fakataha ʻa e Kalisitiané mo ʻalu ki ai maʻu pē. Te ne maʻu foki mo e ʻilo ʻi hono ueʻi ia ʻi heʻene fieinua ki he moʻoní ke ne lau mo ako fakaeia pē ʻa e ngaahi tohi faka-Kalisitiané pea fetalanoaʻaki ki he ngaahi meʻa Fakatohitapú mo e kaungātuí. Kae fēfē kapau ʻe malanga hake ha ngaahi fiemaʻu makehe?
11. (a) Naʻe anga-fēfē ʻa hono tokoniʻi ʻo ʻĀpolosi ʻe Pīsila mo ʻAkuilá? (e) Ko e hā ʻa e tokoni ʻe fai nai ki ha tokotaha kei talavou naʻe toki papitaiso ʻa ia ʻokú ne tokanga ke mali?
11 Naʻa mo ʻĀpolosi, ʻa ia naʻe “mafai ʻaupito ʻi he Tohitapu” pea naʻe totonu ʻa hono akoʻi ʻo fekauʻaki mo Sīsuú, naʻá ne maʻu ha ʻaonga meia Pīsila mo ʻAkuila ʻi he taimi “naʻa na fakaafe ia, ʻo na fakamatala kiate ia ʻa e ʻalunga ʻo e lotu ʻa e ʻOtua ke mahuʻinga malie.” (Ngāue 18:24-26; fakafehoanaki mo Ngāue 19:1-7.) Ko ia ai, tau pehē ko ha tokotaha kei talavou naʻe toki papitaiso ʻoku tokanga ke faisō pea mali. Ko ha Kalisitiane taukei ange ʻe tokoni nai kiate ia ke ne maʻu ʻa e fakamatala ʻi he ngaahi kaveinga ko ʻení ʻi he ngaahi tohi ʻa e Taua Leʻó. Ko e fakatātaá, ko ha fakamatala ʻaonga ʻi he meʻa ko ʻení ʻoku hā ʻi he tohi ko e Questions Young People Ask—Answers That Work, Konga 7.c Ko e tokotaha malanga naʻá ne fai ʻa e ako Tohitapu mo iá te ne fetalanoaʻaki ki he meʻá ni mo e tokotaha foʻoú, neongo ʻe ʻikai kau ai ha ako tuʻumaʻu ia.
12. Ko e hā ʻa e tokoni ʻe tokonaki nai ki ha ongo meʻa mali naʻe papitaiso foʻou ʻoku ʻi ai haʻana ngaahi palopalema?
12 Fakatokangaʻi ha fakatātā ʻe taha. Ko ha ongo meʻa mali naʻe toki papitaiso ʻokú na kei palopalemaʻia nai ʻi hono ngāueʻaki ʻa e ngaahi tefitoʻi moʻoni mei he ʻOtuá. Te na kumi faleʻi nai ki ha tokotaha ʻo e kau mātuʻá, ʻa ia te ne fakamoleki ha ngaahi efiafi ʻo fetalanoaʻaki ʻi he Tohitapú mo kinaua pea fakahanga ʻa ʻena tokangá ki he fakamatala ʻoku maʻu ʻi he ngaahi tohi ʻa e Taua Leʻó. Kae kehe, ʻe ʻikai ke toe fokotuʻu ʻe he tokotaha mātuʻá ia ha ako Tohitapu tuʻumaʻu mo e ongo meʻa malí.
Kapau ʻe Faihala ha Tokotaha Papitaiso Foʻou
13. Ko e hā ʻoku totonu ai ki he kau mātuʻa ʻi he fakatahaʻangá ke nau fakahāhā ʻa e meesí ki he tokotaha papitaiso foʻou ʻoku faihala ka kuo fakatomalá?
13 ʻOku faʻifaʻitaki ʻa e kau mātuʻá ki he Tauhi-Sipi Lahí, ko Sihova, ʻa ia ʻokú ne pehē: “Ko ia te u fafanga ʻeku takanga ʻe au, . . . pea ko ia kuo lavea te u haʻihaʻi, pea ko ia kuo vaivai te u ʻai ke malohi.” (ʻIsikeli 34:15, 16; ʻEfesō 5:1) ʻI he laumālie ko iá, ko e ākonga ko Siutasí naʻá ne naʻinaʻi ke fakahāhā ʻa e meesí ki he kau Kalisitiane pani naʻa nau veiveiuá, pe naʻa nau tō ki he angahalá. (Siutasi 22, 23) Koeʻuhi ʻoku totonu ʻa ʻetau ʻamanekina ha meʻa lahi ange mei he kau Kalisitiane taukei angé, ko e moʻoni ʻoku totonu ke fakahāhā ʻa e meesí ki ha tokotaha papitaiso foʻou—ha kiʻi lami—ʻoku faihala ka kuo fakatomala. (Luke 12:48; 15:1-7) Ko e kau mātuʻá, ʻa ia ʻoku nau ‘fakamaau maʻa Sihová,’ ko ia ai, ke nau ʻoatu ki he fanga sipi peheé ʻa e tokanga fakaalaala pea fakatonutonu kinautolu ʻi he laumālie ʻo e anga-malū.—2 Kalonikali 19:6; Ngāue 20:28, 29; Kalētia 6:1.d
14. Ko e hā ʻoku totonu ke fai ʻi hono fai ha angahala mamafa ʻe ha tokotaha malanga naʻe toki papitaiso, pea ʻe anga-fēfē ke tokoniʻi ia?
14 Ko ia, tau pehē ko ha tokotaha malanga naʻe toki papitaiso naʻe ʻi ai ʻene palopalema ki muʻa ʻi he inú pea toe tafoki ʻo inu ʻo fuʻu hulu ʻo tuʻo taha pe ua. Pe mahalo naʻá ne ikuʻi ʻa ʻene angaʻaki fuoloa ʻa e ifi tapaká ka kuó ne vaivai ki he ʻahiʻahí ʻo ifi fakapulipuli tuʻo taha pe ua. Neongo kuo lotu ʻa hotau tokoua foʻoú ki ha fakamolemole mei he ʻOtuá, ʻoku totonu ke ne kumi tokoni ki ha taha ʻo e kau mātuʻá koeʻuhi ke ʻoua naʻa hoko ʻo angaʻaki ʻa e angahalá. (Sāme 32:1-5; Sēmisi 5:14, 15) ʻI heʻene fakahā ʻene halá ki ha tokotaha ʻo e kau mātuʻá, ʻoku totonu ke fakatonutonu ʻe he tokotaha mātuʻa ko iá ʻa e tokotaha foʻoú ʻi ha founga manavaʻofa. (Sāme 130:3) ʻE feʻunga nai ʻa e akonaki Fakatohitapú ke tokoni kiate ia ke fakatonutonu ʻa e ngaahi hala ki hono vaʻé ʻi he hili iá. (Hepelū 12:12, 13) ʻE talanoa leva ʻa e tokotaha mātuʻa ko ʻení mo e ʻovasia tauhi ʻo e fakatahaʻangá ʻo kau ki he ngaahi tuʻungá ni ke fakapapauʻi pe ko e hā ha toe tokoni ʻoku totonu ke fai.
15. ʻI he ngaahi keisi ʻe niʻihi ko e hā ʻe feʻunga nai ke fai ʻi he faiangahala ʻa ha tokotaha naʻe toki papitaiso?
15 ʻI he ngaahi keisi ʻe niʻihi ʻoku lahi ange nai ʻa e fiemaʻu ia ki aí. Kapau ʻoku ʻilo lahia, fakatuʻutāmaki ki he tākangá, pe ʻoku kau ai ha ngaahi palopalema mamafa kehe, ʻoku totonu ke vaheʻi ʻe he kulupu ʻo e kau mātuʻá ha toko ua ʻo e kau mātuʻá ke na fakatotoloʻi ʻa e meʻa ko iá. Kapau ʻoku sio ʻa e toko ua ko ʻeni ʻo e kau mātuʻá ʻoku mamafa ʻa e meʻá ni pea ʻoku fiemaʻu ai ha kōmiti fakamaau, ʻoku totonu ke na lipooti ia ki he kulupu ʻo e kau mātuʻá. ʻE fokotuʻu leva ʻe he kulupu ʻo e kau mātuʻá ha kōmiti fakamaau ke tokoniʻi ʻa e tokotaha faihalá. ʻOku totonu ke feangai ʻa e kōmiti fakamaaú kiate ia ʻi ha founga fakaalaala. ʻOku totonu ke nau feinga ke fakatonutonu ia ʻaki ʻa e Ngaahi Konga Tohitapú. Kapau ʻokú ne tali ʻa e ngaahi feinga anga-ʻofa ʻa e kōmiti fakamaaú, te nau malava leva ke fakapapauʻi ai pe ʻe ʻaonga ke ʻoua ʻe ngāueʻaki ia ki he ngaahi konga ʻi he peletifoomú ʻi he ngaahi fakataha ʻi he Fale Fakatahaʻangá, pe ʻoku totonu ke fakaʻatā ia ke ne poupou ʻi he ngaahi fakatahá.
16. Ko e hā ʻoku lava ke fai ʻe he kau mātuʻá ke tokoniʻi ha tokotaha faihala?
16 Kapau ʻe fai ha tali lelei ʻe he tokotaha faihalá, ʻe fokotuʻutuʻu leva ʻe ha toko taha pe toko ua ʻi he kōmiti fakamaaú ke fai ha ngaahi ʻaʻahi fakatauhisipi ʻi he taumuʻa ke poupouʻi ʻene tuí mo langaʻi ʻa ʻene houngaʻia ki he ngaahi tuʻunga māʻoniʻoni ʻa e ʻOtuá. Ko ha tokotaha ʻo kinaua ʻe ngāue nai mo ia ʻi he ngāue fakamalangá ʻi he taimi ki he taimi. Te na fai nai ha ngaahi fetalanoaʻaki Fakatohitapu mo ia, ʻo na ngāueʻaki nai ha ngaahi kupu feʻungamālie ʻi he Taua Leʻo mo e Awake! ʻo ʻikai ko hono fokotuʻu ha ako Tohitapu tuʻumaʻu. ʻI he tokanga fakaalaala peheé, ʻe mālohi nai ai ʻa e tokotaha faihalá ke talitekeʻi ʻa e ngaahi vaivai ʻa e kakanó ʻi he ngaahi ʻaho ʻoku hanga mai mei muʻá.
17. Ko e hā ʻa e ngaahi meʻa ʻe fai kapau ʻoku ʻikai fakatomala mo liʻaki ʻe he tokotaha faihala naʻe ʻosi papitaisó hono ʻalunga angahalaʻiá?
17 Ko e moʻoni, ʻoku ʻikai ko ha kalofanga ʻa e toki papitaisó ia ki he fai angahala taʻefakatomalá. (Hepelū 10:26, 27; Siutasi 4) Kapau ʻoku ʻi ai ha tokotaha faihala naʻe papitaiso ʻoku ʻikai ke fakatomala mo liʻaki hono ʻalunga angahalaʻiá, ʻe kapusi ia mei he fakatahaʻangá. (1 Kolinitō 5:6, 11-13; 2 Tesalonaika 2:11, 12; 2 Sione 9-11) ʻI he ngali feʻunga ke fai ʻa e meʻa ko ʻení, ʻe fili ʻe he kulupu ʻo e kau mātuʻá ha kōmiti fakamaau. Kapau ʻoku kapusi, ʻe fai ʻa e fanongonongo nounou ko ʻení: Ko “ . . . kuo tuʻusi ia.”e
Tokoniʻi Kinautolu ke ‘Tuiaki Atu ki he Matuʻotuʻá’
18. Ko e hā ʻoku lava ai ke tau fakapapauʻi ko e kau Kalisitiane papitaiso foʻoú mo e niʻihi kehe ʻe lahi maʻu pē ʻa e meʻa ke nau ako ki ai ʻo fekauʻaki mo Sihova mo hono finangaló?
18 Ko e tokolahi ʻo e kau sevāniti ʻa e ʻOtuá te nau nofo pe ʻi he tākangá. ʻOku fakafiefia foki, ko e tokotaha taki taha ʻo kitautolu ʻe malava ke ʻunu ʻo ofi ange ki heʻetau Tamai fakahēvaní koeʻuhi he te tau malava maʻu pē ke ako lahi ange ʻo fekauʻaki mo ia mo hono finangaló. (Koheleti 3:11; Sēmisi 4:8) Ko e laui afe naʻe papitaiso ʻi he Penitekosi ʻi he 33 H.K. ko e moʻoni naʻe lahi ʻa e meʻa ke nau ako ki aí. (Ngāue 2:5, 37-41; 4:4) Naʻe pehē mo e kau Senitailé, naʻe ʻikai ha ʻātakai Fakatohitapu. Hangē ko ʻení, naʻe moʻoni ʻeni ʻi he faʻahinga naʻe papitaiso ʻi he ʻosi ʻo e malanga ʻa Paula ʻi he ʻAleopeiko ʻi ʻAtenisí. (Ngāue 17:33, 34) ʻI he ʻahó ni foki, ko e kau papitaiso foʻoú ʻoku lahi ʻa e meʻa ke nau akó pea ʻoku fiemaʻu ha taimi mo e tokoni ke ʻai ke mālohi ange ai ʻa ʻenau fakapapau ke fai maʻu pē ʻa e meʻa ʻoku totonú ʻi he ʻafio mai ʻa e ʻOtuá.—Kalētia 6:9; 2 Tesalonaika 3:13.
19. ʻOku lava fēfē ke tokoniʻi ʻa e faʻahinga ʻoku nau papitaisó ke nau ‘tuiaki atu ki he matuʻotuʻá’?
19 ʻI he taʻu taki taha ʻoku papitaiso ai ʻa e laui afe pea ʻoku fiemaʻu ki ai ha tokoni koeʻuhi ke nau ‘tuiaki atu ki he matuʻotuʻá.’ (Hepelū 6:1-3) ʻI he leá, faʻifaʻitakiʻangá, mo e tokoni ʻaonga ʻi he ngāue fakamalangá, te ke lava nai ai ʻo tokoni ki ha niʻihi ke ʻai ʻa e angaʻitangata foʻoú mo “laka ʻi he moʻoni.” (3 Sione 4; Kolose 3:9, 10) Kapau ko ha tokotaha malanga taukei koe, ʻe fakaafeʻi nai koe ʻe he kau mātuʻá ke ke tokoni ki ha kaungātui foʻou ʻi he ngāue fakamalangá pe fetalanoaʻaki ʻi ha ngaahi poini pau Fakatohitapu mo ia ʻi ha ngaahi uike siʻi koeʻuhi ke ʻai ke mālohi ange ʻene tui ki he ʻOtuá, ʻene houngaʻia ki he ngaahi fakataha faka-Kalisitiané, mo e ngaahi meʻa pehē. Ko e vahaʻangatae ʻo e kau tauhi-sipí mo e tākangá ʻoku hangē ko ia ʻoku ʻi ha tamai ʻoku akonaki pe ha faʻē ʻoku anga-fakaalaala. (1 Tesalonaika 2:7, 8, 11) Ka neongo ia, ko ha kau mātuʻa tokosiʻi mo e kau sevānití ʻoku ʻikai te nau lava ke tokangaʻi ʻa e meʻa hono kotoa pē ʻoku fiemaʻu ʻi he fakatahaʻangá. Ko kitautolu hono kotoa ʻoku hangē ha fāmili ʻa ia ko hono ngaahi mēmipá ʻoku nau fetokoniʻaki. Ko e tokotaha taki taha ʻo kitautolu ʻoku lava ke ne fai ha meʻa ke tokoni ki hotau kaungālotú. Ko koe tonu ʻe lava nai ke ke fai ha fakalototoʻa, fakafiemālieʻi ʻa e loto-siʻí, mo poupouʻi ʻa e vaivaí.—1 Tesalonaika 5:14, 15.
20. Ko e hā ʻoku lava ke ke fai ke fakamafola atu ʻa e ʻiloʻi ʻo e ʻOtuá mo tokonaki ʻa e tokanga fakaalaalá ki he fanga sipi ʻoku fafanga ʻe Sihová?
20 ʻOku fiemaʻu ki he faʻahinga ʻo e tangatá ʻa e ʻiloʻi ʻo e ʻOtuá, pea ʻi he tuʻunga ko e Fakamoʻoni ʻa Sihová, ʻoku lava ke ke kau fiefia ʻi hono fakamafola atu iá. ʻOku fiemaʻu ki he fanga sipi ʻa Sihová ʻa e tokanga fakaalaala, pea te ke lava ʻo fai anga-ʻofa ʻi he tokoni ki hono tokonaki ʻa e meʻa ko ʻení. ʻOfa ke tāpuakiʻi ʻe Sihova ʻa hoʻo ngāue fakafaifekaú, pea ʻofa ke ne fakapaleʻi koe ʻi hoʻo ngaahi feinga ʻaki ho lotó ke tokoni ki he fanga sipi ʻokú ne fafangá.
[Fakamatala ʻi lalo]
a ʻI he taimi ko ʻení, ʻe ʻoange nai ki he tokotaha foʻoú ʻa e tatau ʻo e tohi ko e Organized to Accomplish Our Ministry.
b Naʻe pulusi ʻe he Watchtower Bible and Tract Society of New York, Inc.
c Naʻe pulusi ʻe he Watchtower Bible and Tract Society of New York, Inc.
d Ko ha fokotuʻutuʻu pehē ki he kau malanga teʻeki ai ke papitaisó naʻe fakaeʻa ʻi he kupu ko e “Tokoniʻi ʻa e Niʻihi Kehé ke Lotu ki he ʻOtuá,” ʻoku hā ʻi he The Watchtower ʻo Nōvema 15, 1988, peesi 15-20.
e Kapau ko e tuʻutuʻuní ke tuʻusi pea ʻoku fai ha tangi, ʻoku taʻofi ʻa e fanongonongó kaeʻoua ke ʻilo hono ikuʻangá. Sio ki he peesi 147-148 ʻo e tohi ko e Organized to Accomplish Our Ministry.
Ko e Hā Haʻo Tali?
◻ ʻOku anga-fēfē ʻa hono tauhi ʻe Sihova ʻa ʻene fanga sipí?
◻ Ko e hā ʻoku fai ʻi he fie malanga ʻa e faʻahinga foʻoú?
◻ ʻOku lava fēfē ʻa e kaungātuí ke tokoni ki he faʻahinga foʻou ʻoku ʻi ai ʻenau ngaahi fiemaʻu makehé?
◻ Ko e hā ʻa e tokoni ʻoku lava ʻe he kau mātuʻá ʻo fai kiate kinautolu ʻoku nau faihala ka ʻoku nau fakatomalá?
◻ ʻE anga-fēfē ke ke tokoni ki ha tokotaha papitaiso foʻou ke ‘tuiaki atu ki he matuʻotuʻá’?
[Fakatātā ʻi he peesi 18]
Ko e kau tauhi manavaʻofa ʻoku nau tauhi fakaalaala ʻa e tākanga ʻa e ʻOtuá