Līpooti ʻa e Kau Fanongonongo ʻo e Puleʻangá

“Ko e Koto Moʻoni ʻa Hoʻo ʻU Tuʻutuʻuni Kotoa”

TAIMI NOUNOU ki muʻa peá ne maté, naʻe enginaki ʻe Mōsese ʻa e kakai ʻo ʻIsilelí ke nau talangofua ki he kotoa ʻo e ngaahi tuʻutuʻuni ʻa Sihová. Naʻá ne pehē: “Mou ʻai homou loto ki he ngaahi mea ʻoku ou fakapapau atu he ʻaho ni, ʻa ia te mou tuʻutuʻuni ki hoʻomou fanau, ke tauhi mo fai ʻa e ngaahi lea kotoa ʻo e lao ni. He talaʻehai ko e meʻa maʻamaʻa ia kiate kimoutolu; he ko hoʻomou moʻuiʻanga.”​—Teutalōnome 32:​46, 47.

ʻI he ngaahi taʻu ʻe laui teau ki mui maí, naʻe fakaeʻa ai ʻe he tokotaha-tohi-sāmé ʻa e mahuʻinga ʻo e ngaahi akonaki kotoa ʻa e ʻOtuá ʻi heʻene pehē: “ʻOku ke ofi koe, Sihova; pea ko e koto moʻoni ʻa hoʻo ʻu tuʻutuʻuni kotoa.” (Sāme 119:151) ʻI he ʻuluaki senitulí, naʻe toe lave ai ʻa Sīsū tonu ki he mahuʻinga ʻo e “ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4) Pea ʻi he malumalu ʻo e tataki ʻa e ʻOtuá naʻe tohi ai ʻe he ʻaposetolo ko Paulá “ko e potu Folofola kotoa pe ne fakamanava mei he ʻOtua, ʻoku ʻaonga.”​—2 Tīmote 3:16.

ʻOku hā mahino, ʻoku ʻamanekina ʻe Sihova ko e ʻOtuá mei heʻene kau lotú ke nau tokanga fakamātoato ki he pōpoaki kotoa ʻoku fakahā mai kiate kitautolu ʻi he ngaahi peesi ʻo ʻene Folofolá. ʻOku ʻikai ha konga tohi ʻe taha ʻi he Tohitapú ʻe taʻemahuʻinga. Ko e anga ia ʻa e ongoʻi ʻa e Kau Fakamoʻoni ʻa Sihová ʻo fekauʻaki mo e Folofola ʻa e ʻOtuá, ʻo hangē ko ia ʻoku fakatātaaʻi ʻi he meʻa hono hokó ʻa ia naʻe hokosia ʻi Malitiasi.

Naʻe nofo ʻa Mr. D​—— ʻi ha kolo mamaʻo, ʻa ia naʻá ne ʻi aí ko ha tangata-leʻo poʻuli. ʻI ha taimi lahi, naʻá ne fekumi loto-moʻoni ki ha founga totonu ke lotu ai ki he ʻOtuá. ʻI he lolotonga hono taimi ngāue poʻulí, naʻá ne kamata ke lau ʻa e Tohitapú. Naʻe faifai atu pē ʻo ʻosi ʻa e Tohitapú kotoa heʻene laú. Naʻá ne ako ai ko e huafa ʻo e ʻOtuá ko Sihova​—ko e huafa ia ʻoku ʻasi tā tuʻo lahi ʻi heʻene Tohitapu faka-Hinituú. Naʻá ne ʻiloʻi ai tautefito ki he tohi Fakahaá naʻe fakamānako ʻaupito.

Naʻá ne fifili leva pe ʻoku ʻi ai nai ha lotu ʻoku muimui ki he Tohitapú fakakātoa. Naʻá ne fakatokangaʻi ai ko e ngaahi lotu naʻá ne maheni mo iá, ʻi he ngaahi tuʻunga lelei tahá ʻoku nau muimui pē ki he ngaahi konga ʻo e Tohitapú. Ko e ngaahi lotu ia ʻe niʻihi naʻa nau tali ʻa e Ngaahi Konga Tohitapu Faka-Hepeluú kae liʻaki ʻa e Ngaahi Konga Tohitapu Faka-Kalisi Kalisitiané. Ko e ngaahi lotu kehe naʻa nau tukunoaʻi ʻa e Ngaahi Konga Tohitapu Faka-Hepeluú ʻo pehē ko e ngaahi meʻa mahuʻinga pē ʻoku ʻaongá ʻa ē ʻoku ʻi he Ngaahi Konga Tohitapu Faka-Kalisi Kalisitiané.

ʻI he ʻaho ʻe taha naʻe sio atu ai ʻa Mr. D​—— ki ha ongo mātuʻa ʻokú na viviku ʻi he ʻuhá peá ne fakaafeʻi kinaua ke na fakamalumalu ʻi hono falé. Ko e ongo Fakamoʻoni ʻa Sihova kinaua. Naʻe pukepuke ʻe he uaifí ʻa e tohi Revelation​—Its Grand Climax At Hand!a Tuai ē kemo naʻe kole leva ʻe Mr. D​—— ʻa e tohí kiate kinaua. Naʻe ongoʻi ʻe he ongo Fakamoʻoní ko e fakamatala ko ia ʻi he kikite ʻo e tohi Fakahaá naʻe fuʻu faingataʻa ia kiate ia ke ne mahinoʻi, ko ia ai naʻá na tuʻuaki ange pē kiate ia ha tohi kehe. Ka naʻe vilitaki pē ʻa Mr. D​—— ia ke ne maʻu ʻa e tohi Revelation.

ʻI he taimi naʻá ne maʻu ai ʻene tataú, naʻá ne lau fakavavevave ʻa e tohí. Naʻá ne tali leva ha ako Tohitapu mo e Kau Fakamoʻoni ʻa Sihová. Naʻe vave ʻa e maongo kiate ia ʻa e moʻoniʻi meʻa ko ia ko e Kau Fakamoʻoní naʻa nau tauhi maʻu ʻa e Tohitapú fakakātoa ʻi ha tuʻunga māʻolunga. Naʻá ne kamata ke kau maʻu pē ki he ngaahi fakatahá ʻi he Fale Fakatahaʻanga ʻo e Kau Fakamoʻoni ʻa Sihová, ʻi aí ʻoku akoʻi fakalelei ai ʻa e Ngaahi Konga Tohitapu Faka-Hepeluú mo e Ngaahi Konga Tohitapu Faka-Kalisi Kalisitiané fakatouʻosi. Ko ha tokotaha fanongonongo ia ʻo e Puleʻangá he taimí ni pea ko ha mēmipa ʻosi papitaiso ia ʻo e fakatahaʻanga Kalisitiané.

[Fakamatala ʻi lalo]