Fehuʻi mei he Kau Lau Tohí

ʻOku tau fanongo ʻi he taimi ʻe niʻihi ki hotau ngaahi tokouá ʻoku nau leaʻaki pe lotu ʻo kole ʻa e Puleʻanga ʻo e ʻOtuá ke hoko mai ki he māmaní. Ko ha kupuʻi lea totonu ia?

ʻI hono fakalea mahinó, ʻoku ʻikai ko ha founga Fakatohitapu ia ʻo hono fakahaaʻi ʻo e ngaahi meʻá ni. ʻOku fakahēvani ʻa e Puleʻanga ʻo e ʻOtuá ia. Ko ia, naʻe lava ai ʻe he ʻaposetolo ko Paulá ke ne tohi: “ʻIo ʻe hamusi au ʻe he ʻEiki mei he ngaue kovi kotoa pe, pea te ne fakamoʻui au, ʻo aʻu ki heʻene fakahu au ki hono puleʻanga fakalangi​—ke ʻo ʻEne ʻAfio ʻa e kololia ʻo lauikuonga pea taʻengata. Emeni.”​—2 Tīmote 4:​18; Mātiu 13:44; 1 Kolinitō 15:50.

Naʻe fokotuʻu ʻa e Puleʻangá ʻi hēvani ʻi he 1914, pea ʻe ʻikai ʻaupito ke hiki hifo ia ki he Palataisi fakamāmani ʻe toe fakafoki maí pe ki ha toe feituʻu kehe. Ko Sīsū Kalaisi ʻa e Tuʻi ʻo e Puleʻangá. ʻI he tuʻunga ko e Tuʻí, kuo maʻu ai ʻe Sīsū ʻa e mafai ki he kau ʻāngeló. Ko ia ai, ko e feituʻu totonu ʻo hono tuʻunga-pulé ʻoku ʻi he nima toʻomataʻu ia ʻo e ʻOtuá ʻi hēvani. ʻOku kau fakataha atu kiate ia ʻa e kau Kalisitiane paní ʻi he tuʻunga ko e ngaahi tuʻi mo e kau taulaʻeiki ʻi hēvani.​—ʻEfesō 1:​19-​21; Fakahā 5:​9, 10; 20:6.

ʻOku ʻuhinga leva ʻení, ʻoku ʻikai totonu ke tau kei leaʻaki ki he ʻOtuá ʻa e kole ʻoku hā ʻi he konga ʻo e Lotu ʻa e ʻEikí ʻoku pehē: “Ke hoko hoʻo pule, ke fai ho finangalo, hange ko ia ʻi he langi ke pehe foki ʻi māmani”? (Mātiu 6:​10) ʻI hono kehe ʻaupitó, ʻoku totonu ʻa e lotu ia ko iá pea ʻoku kei mohu ʻuhinga.

ʻE toki ngāue mai ʻa e Puleʻanga ʻo e ʻOtuá ia ʻi he kahaʻú ʻi ha founga pau ki he māmani ko ʻení, pea ko e meʻa ia ke ʻi hotau ʻatamaí ʻi he taimi ʻoku tau lotu ai mo ngāueʻaki ʻa e ngaahi kupuʻi lea meimei tatau ʻo e Lotu ʻa e ʻEikí. Ko e fakatātaá, ʻoku tala ki muʻa ʻe he Tāniela 2:44 ʻe hanga ʻe he Puleʻangá ʻo fakaʻauha ʻa e ngaahi puleʻanga kotoa pē pea te ne fetongi ʻa e tuʻunga-pule ʻo e māmani ko ʻení. ʻOku lea ʻa e Fakahā 21:2 ʻo fekauʻaki mo e Selusalema Foʻou ʻoku ʻalu hifo mei hēvani. Ko Selusalema Foʻoú ʻoku faʻu ʻaki ʻa e kau Kalisitiane pani ʻe toko 144,000 ʻa ia te nau hoko ko e fefine mali kia Kalaisi. ʻOku nau toe kaungāʻea fakataha foki mo Sīsū ʻi he Puleʻangá. Ko ia ʻoku fakamatala ʻa e Fakahā 21:2 ki hono fakahanga hifo ʻa ʻenau tokangá ki he māmaní, ʻo iku ai ki he ngaahi tāpuaki lahi ki he faʻahinga anga-tonu ʻo e tangatá.​—Fakahā 21:​3, 4.

ʻI he teʻeki ai ke fakahoko ʻa e ngaahi meʻá ni mo e ngaahi kikite fakaofo kehé, ʻe kei hokohoko atu pē ʻa e totonu ke lotu kia Sihova ʻo fehoanaki mo e ngaahi lea ʻa Sīsū, “Ke hoko hoʻo pule.” Ka ʻoku totonu ke tauhi maʻu ʻi he ʻatamaí ko e Puleʻanga ko iá ʻe ʻikai ke hoko moʻoni mai ia ki he palanite ko ʻeni ko Māmaní. Ko e founga-pule faka-Puleʻangá ʻoku ʻi hēvani ia, ʻikai ʻi māmani.

[Maʻuʻanga ʻo e Tā ʻi he peesi 31]

Māmani: Based on NASA photo