Līpooti ʻa e Kau Fanongonongo ʻo e Puleʻangá

Hola ki he Kautaha Fakateokalati ʻa Sihová

ʻI HE kuonga muʻá naʻe ueʻi ai ʻa e palōfita ko ʻAiseá ke ne fakahā: ‘Mou fakalangilangiʻi ʻa Sihova ʻi he ngaahi motu ʻo e tahí.’ (Aisea 24:15) ʻOku vakai ʻa e Kau Fakamoʻoni ʻa Sihová ki he ngaahi motu ʻo e tahí ko e konga ia ʻo e “mamani” ʻa ia naʻe pehē ʻe Sīsū “ke fanongonongo” ki ai “ʻa e ongoongolelei.”—Mātiu 24:14; Maake 13:10.

Ko e ʻOtu Motu Mākuesá ʻoku tuʻu ia ʻi he maile ʻe 900 nai ki he tokelau-hahake ʻo Tahití. Ko e konga ia ʻo e ngaahi motu mamaʻo ʻi he Pasifiki Tongá ʻoku ui ko e French Polynesia. Ko e lelei ko ia ʻo e kelekele moʻunga afí, pea ʻea māfana mo hauhaú, ʻoku tupu maʻuiʻui ai ʻa e ʻakaú ʻi he ʻotu motú ni. Kae kehe, ko e ʻotu Mākuesá, ʻoku toe fakafua mai ai ha faʻahinga fua ia ʻe taha. Fakakaukau atu ki he tuʻunga ʻo ha fāmili ʻe taha ʻa ia naʻa nau tali ʻa e pōpoaki ʻo e Puleʻangá ʻi he motu ko ia ko Hiva Oa.

Ko Jean pea mo hono uaifí, Nadine, naʻe ʻikai ke na fiefia ʻi he sōsaieti ko ia naʻe lau ko e sivilaise ʻo ʻIulope Hihifo ʻa ia naʻá na nofo aí. Ko ia naʻá na fakakaukau ke siʻaki atu ʻa e tōʻonga moʻui moʻumoʻua ko iá ka na hiki atu mo ʻena tamá ki he ʻOtu Motu Mākuesá. Ko honau fale foʻoú, ʻa ia naʻe langaʻaki ʻa e kofe, naʻe tuʻu ia ʻi ha teleʻa mamaʻo. Ke aʻu ki he ngaahi kaungāʻapi ofi tahá, naʻe pau ke nau fononga atu ʻi ha hala tokakovi ʻi he moʻungá ʻi ha houa ʻe ua. Ko e kolo ofi taha ʻoku ʻi ai ha toketaá, ʻapiakó, mo ha falekoloa fakamoveteveté ʻoku houa ʻe tolu ia ki ai ʻi ha siipi.

Ko Jean mo Nadine naʻe ʻikai ke na mahuʻingaʻia kinaua ʻi he lotú. Ka naʻá na kau atu pē ʻi he ngaahi lāulea fekauʻaki mo e tupuʻanga o e moʻuí. ʻOkú na faʻa fakamatalaʻi ke mahino ʻi he taimi lahi, ʻa e fakakaukau fihituʻu ko ia ʻo e ʻevolūsoné. Ka naʻe hala ke ʻomi ʻe heʻena ngaahi fakakaukaú kiate kinaua ha fakafiemālie.

Hili ʻenau nofo maomaonganoa ʻi he taʻu ʻe ono, ne nau ʻohovale ʻi hano talitali ha ʻaʻahi ange ʻa ha toko ua ʻo e Kau Fakamoʻoni ʻa Sihová. Ne ʻosi ʻilo ʻe he ongo Fakamoʻoní ia ʻa e nofoʻanga ʻo Jean mo Nadine mei he kakai ʻo e kolo taupotu maí. Hangē ko ia kuo angaʻakí, ko e pōtalanoá ne taki atu ai ki ha fetalanoaʻaki fekauʻaki mo e fakakaukau ʻo e ʻevolūsoné. Ki he fiefia ʻa e ongo meʻá, naʻe ʻi he ongo Fakamoʻoní ha tatau ʻo e tohi Life—How Did It Get Here? By Evolution or by Creation?, ʻa ia naʻe pulusi ʻe he Kau Fakamoʻoni ʻa Sihová. Naʻe fiefia ʻa Jean mo Nadine ke maʻu ha tohi ʻokú ne ʻomi ha fakamatala fakaʻāuliliki pe naʻe anga-fēfē ʻa e hoko mai ʻa e moʻuí.

ʻI ha taimi nounou mei ai, ne kamata ha ako Tohitapu. ʻI ha vahaʻa taimi ko e taʻu nai ʻe tolu, ne fai ai ʻe Jean mo Nadine ha fakalakalaka tuʻumaʻu. Ne na hoko ai ʻo tuipau kuo vavé ni ke ngaohi ʻa e māmaní kotoa ko e palataisi. Hili ʻa e ʻalu hake ʻo toko tolu ʻa e fānaú ʻi honau fāmilí, ko e fononga ko ia houa ʻe fā ke maʻu ʻa e ngaahi fakataha faka-Kalisitiané ʻi he Fale Fakatahaʻangá ne hoko ia ko ha ngāue faingataʻa moʻoni. Ka naʻe ʻikai ke taʻofi ai ʻenau maʻu fakatahá. Ne faifai atu pē pea fakahāhā ʻe Jean mo Nadine ʻena fakatapui kia Sihová ʻaki ʻena papitaiso ʻi he vaí. Ne na fai eni ʻi ha fakataha-lahi naʻe fai ʻi he kolo lahí, ʻa ia ko e tumutumu ʻo e kau maʻu fakatahá ko e kakai ʻe toko 38!

Ke tokoniʻi ʻa e kiʻi kulupu tokosiʻi ʻo e kau malangaʻi ʻo e Puleʻangá, ne fakakaukau ai ʻa e kiʻi fāmilí ke nau hiki mei honau ʻapi lingolingoá. Naʻá nau hiki ki ha kolo ʻoku toko tahaafe nai ʻa e kau nofo aí, ʻa ia ʻoku ngāue ai ʻa Jean he taimí ni ko ha sevāniti fakafaifekau ʻi he fakatahaʻanga ʻa e Kau Fakamoʻoni ʻa Sihova ʻi he koló pē. Ko e fāmilí ni, ʻa ia naʻá nau tomuʻa hola ki he ʻotu motú ke hao ʻi he sivilaisé, ʻoku nau lau ko ha monū ia ʻa hono maʻu ʻa e hufangaʻanga moʻoní pē, ʻa e kautaha fakateokalati ʻa Sihová.