Aʻu ki he Tokolahi Ange mo e Ongoongo Leleí

ʻI HEʻEKU fakakaukau fekauʻaki mo e kakai ʻi hoku fonuá, naʻá ku fakatokangaʻi ai ko e ʻiloʻi pē ʻe he tokolahi ia ʻa e Kau Fakamoʻoni ʻa Sihová mei he ngaahi maʻuʻanga ongoongó. Naʻá ku fakakaukau, ko e kakaí ni ʻoku totonu ke fai ki ai ha fetuʻutaki, koeʻuhi ke lava nai ai ʻo nau ʻilo ʻa e Kau Fakamoʻoni ʻa Sihová mo e meʻa ʻoku nau tui moʻoni ki aí. Ka ʻe lava fēfē ke u tokoni? Ko hoku husepānití ko ha mātuʻa Kalisitiane, pea naʻá ne ʻomai kiate au ʻa e tataki fakapotopoto mo e ngaahi fokotuʻu.

Naʻá ma maʻu ha fakakaukau tefito ʻi he kupu ko e “Ngaahi Makasini ʻOkú Ne ʻOmai ʻa e Fakafiemālie ʻAonga,” naʻe pulusi ʻi he ʻīsiu ʻo e makasini Awake! ʻo Sanuali 8, 1995. Fekauʻaki mo e ngāue ʻa ha Fakamoʻoni, ʻoku pehē ʻe he kupú: “Kuó ne ʻai ia ko ha poini ke tānaki ʻa e ngaahi tatau motuʻa ange ʻo e ngaahi makasini Awake! ʻe niʻihi kuo fokotuʻu ʻe he Kau Fakamoʻoni kehé ʻi ʻapí. Peá ne ʻaʻahi leva ki he ngaahi ʻōfisi ko ē ʻokú ne ongoʻi te nau fakahaaʻi nai ha mahuʻingaʻia makehe ʻi he niʻihi ʻo e ngaahi tuʻunga-leá.”

ʻAki e tokoni ʻa hoku husepānití, naʻá ku tānaki leva ha ngaahi tatau ʻe laui teau ʻo e ngaahi makasiní. Mei hení naʻá ku malava ai ke filifili ha ngaahi tuʻunga-lea kehekehe ʻo feʻunga ki he kakai te u feinga ke fetuʻutaki ki aí.

ʻI hono ngāueʻaki ʻa e ngaahi tohi telefoní mo e ngaahi lēkooti fakapuleʻangá, naʻá ku tānaki ha lisi ʻoku kau ki ai ʻa e ngaahi falemahaki, ngaahi fale tali-fononga ki he toʻutupú, mo e ngaahi ʻapi neesi. Naʻá ku toe lisi foki ai mo e kau fai putu, kau ʻōfisa ako mo e kau loea, kau toketā, mo e kau ngāue ʻo e ngaahi pilīsoné mo e ngaahi fakamaauʻanga laó. Naʻe kau ʻi heʻeku lisí ʻa e kau talēkita ʻo e ngaahi fokotuʻutuʻu ki he kau ʻolokahōliká mo e faʻahinga ʻoku maʻunimā ʻe he faitoʻo kona tapú, ngaahi feohiʻanga ki he ngaahi ʻīsiu fakaeʻātakaí, ki he kau faingataʻaʻiá mo e faʻahinga ne maʻukovia ʻi he taú, pea ki he fekumi fakaemeʻatokoni fakatupu iví. Naʻe ʻikai foki ke u fakangaloʻi ʻa e kau pule ʻo e ngaahi ʻōfisi ki he lelei ʻa e kakaí, ngaahi ngāue fakasōsialé, mo e ngaahi meʻa fakafāmilí.

Ko e Hā Te u Leaʻakí?

Ko e ʻuluaki meʻa naʻá ku faí ʻi hono fai ha ʻaʻahi, ko hono fakahaaʻi mahino au. Naʻá ku lave leva ki heʻeku ʻaʻahí ʻe vave pē ʻi ha ngaahi miniti siʻi.

ʻI he taimi pē ʻoku ou femātaaki ai mo e tokotaha pulé, ʻoku ou pehē: “Ko e taha au ʻo e Kau Fakamoʻoni ʻa Sihová. Kae kehe, ʻoku ʻikai te u ʻi hení ke fai ha fetalanoaʻaki fakalotu, ʻa ia ʻe ʻikai feʻunga nai ia ʻi he lolotonga ʻo e ngaahi houa ngāué.” ʻOku faʻa hoko ai ha ʻatimosifia fiemālie ange. Pea ʻi he fakatatau ki he tuʻungá ʻa ʻeku fakamatalá, ʻoku ou hoko atu: “ʻOku tafaʻaki ua ʻa ʻeku ʻaʻahí. ʻUluakí, ʻoku ou fakaʻamu ke fakahaaʻi ʻa ʻeku houngaʻia ʻi he ngāue ʻoku fokotuʻutuʻu ʻe ho ʻōfisí. Ko ia ai, ʻoku ʻikai totonu ke taʻefakatokangaʻi ʻa e taha ʻokú ne fakamoleki ʻa hono taimí mo e iví maʻá e kakaí fakalūkufua. ʻOku taau moʻoni ʻa e meʻá ni ke fakaongoongoleleiʻi.” ʻI he ngaahi tuʻunga lahi naʻe ʻohovale ʻa e tokotaha naʻe fakaofiofi ki ai ʻi he founga ko ʻení.

ʻI he aʻu mai ki he taimi ko iá naʻe hangehangē ne fifili leva ʻa e tokotahá pe ko e hā ʻa e ʻuhinga hono ua ʻo ʻeku ʻaʻahí. ʻOku ou hoko atu: “Ko e ʻuhinga ʻeni hono ua ʻo ʻeku ʻaʻahí: Mei heʻemau makasini Awake!, ʻa ia ʻoku pulusi fakavahaʻapuleʻangá, kuó u filifili mei ai ha ngaahi kupu ʻa ia ʻoku lave tautefito ki hoʻo faʻahinga ngāué mo e ngaahi palopalema ʻoku fekauʻaki mo iá. ʻOku ou tui te ke saiʻia ke ʻilo ki he anga ʻo e vakai ʻa ha pepa fakavahaʻapuleʻanga ki he ngaahi palopalemá ni. Te u fiefia ke tuku atu ʻa e ngaahi tataú ni maʻau.” Naʻe faʻa tala mai kiate au ʻa hono fakahoungaʻi ʻa ʻeku ngaahi feingá.

Ngaahi Ola Fakaʻohovale mo Fakafiemālie

ʻI heʻeku ngāueʻaki ʻa e lea ko ʻení, naʻe talitali anga-fakakaumeʻa au ʻe he tokolahi tahá; ko e toko taha pē mei he toko 17 naʻá ne fakasītuʻaʻi aú. Naʻá ku maʻu ʻa e ngaahi meʻa naʻe hokosia lahi ʻa ia naʻe fakatou fakaʻohovale mo fakafiemālie.

Ko e fakatātaá, hili ha feinga tuʻo fā mo talitali anga-kātaki, naʻá ku lavameʻa ʻi he fetaulaki mo ha ʻinisipēkita ako fakavahe. Ko ha tangata femoʻuekina ʻaupito ia. Ka, naʻá ne fuʻu anga-fakakaumeʻa peá ne fetalanoaʻaki mo au ʻi ha kiʻi taimi. ʻI heʻeku mavahé, naʻá ne pehē: “ʻOku ou houngaʻia moʻoni ʻi hoʻo feingá, pea kuo pau ke u lau fakalelei hoʻo tohí.”

ʻI he taimi ʻe taha, naʻá ku ʻaʻahi ai ki ha fakamaauʻanga fakavahe, ʻo fetaulaki mo e fakamaau pulé, ko ha tangata matuʻotuʻa. ʻI heʻeku hū atu ki hono ʻōfisí, naʻá ne sio fakaʻita hake mei heʻene ʻū pepá.

“Ko e ngaahi houa ngāué ko e pongipongi Tūsité pē, pea te u toki faingamālie ai ki ha faʻahinga fakamatala pē,” ko ʻene lea fakaʻitá mai ia.

“Tuku mai muʻa ke u kole fakamolemole atu ki heʻeku haʻu ʻi he taimi ʻoku ʻikai feʻungamālié,” naʻá ku tali vave ange pea tānaki atu, “Ko e moʻoni, te u fiefia ke u toe haʻu ʻi ha taimi kehe. Ka ko ʻeku ʻaʻahí ko ha meʻa fakafoʻituitui moʻoni ia.”

Naʻe fieʻilo ʻa e fakamāú ʻi he taimi ko iá. Naʻá ne ʻeke mai, ʻi ha tō siʻisiʻi ange ʻene fefeká, ʻa e meʻa naʻá ku fiemaʻú. Naʻá ku toe ʻai ange te u toki ʻaʻahi atu ʻi he Tūsité.

“Kātaki, tangutu hifo hena,” ko ʻene fakamatemateé mai ia, ʻou ʻohovale lahi. “Ko e hā ʻokú ke fiemaʻú?”

Naʻe hoko atu ai ki ha fetalanoaʻaki longomoʻui, peá ne kole fakamolemole mai ki heʻene fuʻu anga-taʻefakakaumeʻa ʻi he kamatá koeʻuhi he naʻá ne mātuʻaki femoʻuekina moʻoni.

“ʻOkú ke ʻiloʻi ʻa e meʻa ʻoku ou saiʻia ai fekauʻaki mo e Kau Fakamoʻoni ʻa Sihová?” ko e ʻeke mai ia ʻe he fakamāú hili ha kiʻi taimi. “ʻOku nau maʻu ʻa e ngaahi tefitoʻi moʻoni makatuʻunga lelei ʻa ia ʻoku ʻikai te nau afe mai ai. Naʻe feingaʻaki ʻe Hitilā ʻa e meʻa kotoa naʻá ne ala lavá, ka naʻe kei ʻikai pē ke ʻalu ʻa e Kau Fakamoʻoní ia ki he taú.”

ʻI heʻema hū toko ua atu ki he ʻōfisi ʻe taha, naʻe fakatokangaʻi kimaua ʻe he kau sēkelitali ʻi aí. Pea lea anga-momoko hangatonu mai leva ʻa e sēkelitali pulé, “ʻOku ʻikai ʻaupito tali ʻe he palesitení ia ha kau ʻaʻahi.”

“Ka te ne tali ʻe ia kimaua,” naʻá ku tali fiemālie ange, “koeʻuhi ko kimauá ko e ongo Fakamoʻoni ʻa Sihova. ʻOku ʻikai ko ha ongo meʻa kolekole kimaua, pea ko ʻema ʻaʻahí ʻe ʻikai toe lōloa ange ia ʻi he miniti ʻe tolú.” Naʻá ku lotu tōtōivi ʻi hoku lotó, “ʻE Sihova, kātaki ʻo ʻai muʻa ʻeni ke iku lelei!”

Naʻe tali mai ʻa e sēkelitalí ʻi ha anga taʻemahuʻingaʻia, “Sai pē, te u ʻahiʻahi.” Naʻá ne ʻalu. Hili ha miniti ʻe ua, ʻa ia ne hangē ia kiate au ha fuʻu taimi lōloá, ne toe ʻasi mai ʻoku muimui mai ai ʻa e palesitení tonu. ʻI he ʻikai lea maí, naʻá ne taki atu ʻa e hala ki hono ʻōfisí, ʻo fakalaka atu ʻi he ongo loki kehe ʻe ua.

ʻI he kamata ʻo ʻemau fetalanoaʻakí, naʻá ne hoko ʻo anga-fakakaumeʻa ange. Naʻá ne loto-lelei ʻo tali ʻa e ngaahi ʻīsiu makehe ʻo e makasini Awake! ʻi heʻema tuʻuaki angé. Naʻá ma fakamālō kia Sihova ki he faingamālie ko ʻeni, ke fai ai ha fakamoʻoni lelei fekauʻaki mo e taumuʻa ʻo ʻetau ngāué.

ʻI he sio atu ki he ngaahi meʻa fakaofo lahi ne hokosiá, kuó u hoko ai ʻo houngaʻia kakato ange ʻi he meʻa naʻe leaʻaki ʻe he ʻaposetolo ko Pitá: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ngāue 10:​34, 35) Ko e finangalo ia ʻo e ʻOtuá ke ʻoange ki he kakai ʻi he ʻātakai kotoa pē, ngaahi lea, pe ngaahi tuʻunga fakasōsiale ʻa e faingamālie ke ʻilo ki heʻene taumuʻa ki he faʻahinga ʻo e tangatá pea ki he māmaní.​—Fakamatala ʻOmai.