Faʻifaʻitaki ki he Taʻefilifilimānako ʻa Sihová
1 ʻOku tokanga ʻa Sihova fekauʻaki mo e kakaí. ʻOkú ne talitali lelei taʻefilifilimānako ha taha pē ʻokú ne fai hono finangaló. (Ng. 10:34, 35) ʻI he taimi naʻe malanga ai ʻa Sīsū ki he kakaí, naʻe taʻefilifilimānako mo ia foki. (Luke 20:21) ʻOku fiemaʻu ke tau faʻifaʻitaki ki heʻena faʻifaʻitakiʻangá, ʻo hangē ko ia naʻe fai ʻe Paulá, ʻa ia naʻá ne tohi: “ʻOku taha ai pe ʻa e ʻEiki ʻo e kakai kotoa pe, pea mohu meʻa maʻa e kakai kotoa pe ʻoku tautapa kiate ia.”—Loma 10:12.
2 Ko hono talaki ʻa e ongoongo lelei ʻo e Puleʻanga ʻo e ʻOtuá ki he tokotaha kotoa pē ʻa ia ʻoku tau fetaulaki mo iá ʻokú ne ʻomai ʻa e lāngilangi ki he ʻOtuá. Kuo pau ke tau hokohoko atu hono vahevahe ʻa e pōpoaki fakaofo ko ʻení ki he niʻihi kehé, neongo ʻa honau faʻahingá, tuʻunga fakasōsialé, akó, pe tuʻunga fakapaʻangá. (Loma 10:11-13) ʻOku ʻuhinga ʻení ko e malanga ki he faʻahinga te nau fanongó—tangata, fefine, talavou, mo e taʻumotuʻa. ʻOku fiemaʻu ke tau ʻaʻahi ki he matapā kotoa pē ke ʻoange ki he tokotaha-ʻapi taki taha ha faingamālie ke fanongo ki he moʻoní.
3 Mahuʻingaʻia ʻi he Tokotaha Kotoa Pē: Ko ʻetau taumuʻá ke talanoa mo e tokotaha kotoa pē te tau malava ke lea ki aí. ʻI he fakakaukau ki he meʻá ni, kuo lavameʻa ai ʻa e kau malanga ʻe niʻihi ʻi he faifakamoʻoni ki he kakai ʻi he ngaahi ʻōfisi fakatoketaá, ngaahi fale mahakí, ngaahi ʻapi nēsí, ngaahi ʻōfisi uelofeá, pea mo e ngaahi senitā kuo fakaleleiʻí. Tānaki atu ki aí, kuo fakamoʻoni ʻa e kau malangá ki he kau talēkita ʻo e putú, kau tauhi mo e kau faleʻi he ʻapiakó, mo e kau fakamāú. ʻI he fakaofiofi ki he kau ʻōfisá, ʻoku feʻungamālie ke fakahā ʻa e houngaʻia kiate kinautolu ki he ngāue ʻaonga ʻoku nau tokonaki ki he koló. Ke anga-fakaʻapaʻapa, pea filifili ʻa e ngaahi kupu taimi totonu ʻa ia ʻoku kaunga tefito ki heʻenau faʻahinga ngāué pea ki he ngaahi palopalema ʻoku fehangahangai mo iá.
4 ʻI he fakatātā ʻe taha, ko ha tuofefine naʻá ne malava ke lea ki ha fakamaau ʻi hono ʻōfisí. ʻI he hili ha fetalanoaʻaki lelei, naʻá ne tala ange ʻa e fakamatala ko ʻení: “ʻOkú ke ʻilo ʻa e meʻa ʻoku ou saiʻia ai fekauʻaki mo e Kau Fakamoʻoni ʻa Sihová? ʻOku nau maʻu ʻa e ngaahi tefitoʻi moʻoni lelei mei he meʻa ʻoku ʻikai te nau afe mei aí.” Ko ha fakamoʻoni lelei ē naʻe fai ki he tokotaha maʻu mafai lahi ko ʻení.
5 ʻOku ʻikai malava ke tau ʻilo ʻa e loto ʻo e kakaí. Kae kehe, ʻi he talanoa mo e tokotaha kotoa pē ʻoku tau fetaulakí, ʻoku tau fakahā ai ʻetau tui ki he malava ʻa e ʻOtuá ke tataki ʻetau ngāué. Tānaki atu ki ai, ʻoku ʻoange ai heni ki he kakaí ʻa e monū ke fanongo pea tali ʻa e pōpoaki ʻo e ʻamanakí. (1 Tim. 2:3, 4) ʻAi ke tau ngāue fakapotopotoʻaki hotau taimí pea feinga ke faʻifaʻitaki ki he taʻefilifilimānako ʻa Sihová ʻaki ʻa e aʻu ki he kotoa ʻo e kakai te tau aʻu ki ai mo e ongoongo leleí.—Loma 2:11; Ef. 5:1, 2.