Fakahaaʻi e Mahuʻingaʻia Fakafoʻituitui—ʻAki ʻa e Malanga Taʻefilifilimānako
1 ʻI ha vīsone, naʻe mamata ai ʻa e ʻapositolo ko Sioné ki ha ʻāngelo ʻoku puna ʻi he loto langí ʻo talaki ʻa e ongoongo lelei taʻengatá ki he “puleʻanga kotoa pē, mo e matakali, mo e lea, mo e faʻahinga.” (Fkh. 14:6) ʻOku tau muimui ki he faʻifaʻitakiʻanga ʻa e ʻāngeló ʻaki ʻa e malanga taʻefilifilimānako? ʻI he ʻikai ke fakatokangaʻí, ʻe lava ke tau maʻu ʻa e ngaahi fakakaukau filifilimānako pe tomuʻa fehiʻa. Ko ʻetau fakakaukau ki he kakai ʻoku tau fetaulaki mo iá ʻe lava ke uesia ai ʻa e anga ʻo ʻetau ʻoatu ʻa e ongoongo leleí kia kinautolú. Ko ia ai, ʻoku fiemaʻu ke tau fakahāhā ʻa e tokanga anga-ʻofa moʻoni ʻi he taimi ʻoku tau malanga ai ki ha kakai mei ha puipuituʻa kehekehe.
2 Fakakaukau ki Ho Feituʻu Ngāué: ʻOku ʻi ai ha kau nofo hili mai pe kau kumi hūfanga ʻoku nau nofo ʻi ho feituʻu ngāué? ʻE faingofua nai ke tau tukunoaʻi kinautolu. Tomuʻa fekumi ki he faʻahinga ko ení pea feinga ke ʻiloʻi lelei ange kinautolu. Ko e hā ʻenau ngaahi fiemaʻú mo ʻenau ngaahi hohaʻá, ʻenau ngaahi saiʻiá mo e ngaahi meʻa ʻoku ʻikai te nau saiʻia aí, ʻenau ngaahi loto-moʻuá mo e meʻa ʻoku nau tomuʻa fehiʻa aí? Feinga ke feʻunuʻaki hoʻo lea kamata fekauʻaki mo e pōpoaki ʻo e Puleʻangá ʻo fakatatau ki ai. (1 Kol. 9:19-23) Hangē ko e ʻapositolo ko Paulá, ʻoku totonu ke tau ongoʻi ʻoku tau moʻuaʻaki ke vahevahe atu ʻa e ongoongo leleí ki he tokotaha kotoa pē ʻi hotau feituʻu ngāué, ʻo kau ai ʻa e faʻahinga ʻoku nau haʻu mei ha fonua muli, ʻa e faʻahinga ʻoku kehe ʻenau anga fakafonuá, faʻahinga ʻoku nau lea ʻi ha lea kehe pea mo e faʻahinga ʻoku nau tuʻumālie.—Loma 1:14.
3 Ko ia ai, ʻe lava fēfē ke ke faifakamoʻoni ki ha taha ʻoku lea ʻi ha lea kehe? Ngāueleleiʻaki ʻa e kiʻi tohi Good News for People of All Nations. Te ke toe faʻofaʻo nai ha ngaahi tuleki pe polosiua ʻi he ngaahi lea ʻoku leaʻaki lahi ʻi ho feituʻu ngāué. (Sio ki he ʻEtau Ngāue Fakafaifekau ʻo e Puleʻanga ʻo Siulai 2003, p. 8, pal. 2-3.) Tānaki atu ki aí, ʻoku feinga ʻa e kau malanga ʻe niʻihi ke ako ha lea fakafeʻiloaki mo ha lea kamata faingofua ʻi ha ngaahi lea kehe. ʻOku faʻa maongo ki he kakaí ʻa e fanongo ki ha taha ʻoku feinga ke lea ange kia kinautolu ʻi heʻenau leá tonu, naʻa mo ʻi ha tuʻunga mātuʻaki fakangatangata, pea ʻe tohoakiʻi nai ai kinautolu ki he ongoongo leleí.
4 Faʻifaʻitaki kia Sihova: ʻI he aʻu ki he kakai mei he ngaahi puipuituʻa kehekehé, ʻoku tau faʻifaʻitaki ai ki hotau ʻOtua taʻefilifilimānako, ʻa Sihova, ʻa ia “ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”—Fakaʻītali ʻamautolu; 1 Tim. 2:3, 4.